ନୟାଗଡ଼ ଅଫିସ,୧୬।୧୦-ମହାନ ଜନନାୟକ, ମିଶାଇଲ ମ୍ୟାନ, ଭାରତର ପୂର୍ବତନ ରାଷ୍ଟ୍ରପତି ତଥା ଭାରତରତ୍ନ ଡ. ଏ.ପି.ଜେ. ଅବଦୁଲ କଲାମଙ୍କ ପୁଣ୍ୟ ଜନ୍ମତିଥିରେ ମଙ୍ଗଳବାର ତାଙ୍କର ପ୍ରତିମୂର୍ତ୍ତି ଅନାବରଣ ଉତ୍ସବ ନୟାଗଡ଼ ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି ା ନୟାଗଡ଼ ବ୍ଲକ ଶିକ୍ଷକ ସମାଜ ଦ୍ୱାରା ସ୍ଥାପିତ ଏହି ପ୍ରତିମୂର୍ତ୍ତିକୁ ଜିଲା ଶିକ୍ଷା ଅଧିକାରୀ ଶିବ ଶଙ୍କର ପ୍ରଧାନ ମୁଖ୍ୟ ଅତିଥିଭାବେ ଯୋଗଦେଇ ଅନାବରଣ କରିଥିଲେ। ସମ୍ମାନିତ ଅତିଥିଭାବେ ବ୍ଲକ ଶିକ୍ଷାଧିକାରୀ ଗୀତାଞ୍ଜଳି ସାହୁ ଯୋଗଦେଇ କଲାମଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ ା ଜିଲାରେ ଏହି ପ୍ରତିମୂର୍ତ୍ତି ସର୍ବପ୍ରଥମେ ସ୍ଥାପନ ହୋଇଥିବା ବେଳେ ଅବଦୁଲ କଲାମଙ୍କ ଆଦର୍ଶରେ ସମସ୍ତ ଶିକ୍ଷକ ତଥା ଛାତ୍ରୀଛାତ୍ର ଅନୁପ୍ରାଣିତ ହେବାପାଇଁ ଅତିଥିମାନେ ମତବ୍ୟକ୍ତ କରିଥିଲେ ା ଅକ୍ଟୋବର ୧୫ କଲାମଙ୍କ ଜନ୍ମଦିବସକୁ ମିଳିତ ଜାତିସଂଘ ପକ୍ଷରୁ ‘ବିଶ୍ୱ ଶିକ୍ଷାର୍ଥୀ ଦିବସ’ ଭାବେ ସମଗ୍ର ବିଶ୍ୱରେ ପାଳନ କରାଯାଉଥିବା ବେଳେ ଅଗାମୀ ଦିନରେ ବିଦ୍ୟାଳୟ ସ୍ତରରେ କଲାମଙ୍କ ଜନ୍ମଦିବସ ପାଳନ କରାଯିବା ପାଇଁ ଶିକ୍ଷକ ସମାଜ ପକ୍ଷରୁ ଜିଲା ଶିକ୍ଷା ଅଧିକାରୀଙ୍କୁ ଅନୁରୋଧ କରାଯାଇଥିଲା ା ଅନ୍ୟମାନଙ୍କ ମଧ୍ୟରେ ପୂର୍ବତନ ବ୍ଲକ ଶିକ୍ଷାଧିକାରୀ ଦାମୋଦର ଖିଲାର, ଅତିରିକ୍ତ ବ୍ଲକ ଶିକ୍ଷାଧିକାରୀ ନୀଳାମ୍ବର ତ୍ରିପାଠୀ, ନିରଞ୍ଜନ ନାୟକ ଏବଂ ଧନେଶ୍ୱର ସେଠୀ ପ୍ରମୁଖ ଉପସ୍ଥିତ ରହିଥିବା ବେଳେ ଶିକ୍ଷକ ନେତା ବଟକୃଷ୍ଣ ମିଶ୍ର, ଲକ୍ଷ୍ମୀଧର ସାହୁ ପ୍ରମୁଖ ସହଯୋଗ କରିଥିଲେ।