କଣିହାଁ, ୨୬ା୫(ଡି.ଏନ.ଏ.) – କାରଖାନାରେ ଖଟିବା ଠାରୁ ବଳିଯାଉଛି ପାଣି ସଂଗ୍ରହ ପାଇଁ ଶ୍ରମର ପରିମାଣ। ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ବି ଧାଡ଼ିରେ ଛିଡା ହେବା ଛଡା ଆଉ କିଛି ବିକଳ୍ପ ନାହିଁ। ଶୋଷକୁ ଶାନ୍ତ କରିବାକୁ ଦିନ ଆରମ୍ଭରୁ ହିଁ ଟ୍ୟାପ ସମ୍ମୁଖରେ ଆଗ ଧାଡିରେ ଛିଡା ହେବାକୁ ଆରମ୍ଭ ହେଉଛି ପ୍ରତିଯୋଗିତା। ଏତେ ପରିଶ୍ରମ ପରେ ବି ପଛରେ ରହି ପାଣି ପାଇପାରୁ ନ ଥିବା ଲୋକେ ବିଳମ୍ବିତ ରାତି ପର୍ଯ୍ୟନ୍ତ ଅପେକ୍ଷା କରୁଛନ୍ତି। ଆଉ ଏ ସମସ୍ୟାର ସମ୍ମୁଖୀନ ହେଉଛନ୍ତି ମହାରତ୍ନ ମାନ୍ୟତା ପ୍ରାପ୍ତ ଏନ୍ଟିପିସି ପ୍ରକଳ୍ପ ଶକ୍ତିଦ୍ୱାର ନିକଟସ୍ଥ ହଟିଂବାସୀ। ଏତେ ନିକଟରେ ଥାଇ ବି ପ୍ରକଳ୍ପ ଅଧିକାରୀଙ୍କ ଦୃଷ୍ଟି ପଡୁନି ସେମାନଙ୍କ ସମସ୍ୟା ଉପରେ। ପ୍ରଶାସନ ମଧ୍ୟ ଜାଣି ଅଜଣା ହେଉଛି। ଫଳରେ ସଂଘର୍ଷ କରି ପାଣି ସଂଗ୍ରହ କରିବା ଛଡା ଆଉ କିଛି ଉପାୟ ନାହିଁ ବୋଲି କହିଛନ୍ତି ହଟିଂବାସୀ।
ହଟିଂ ବାସିନ୍ଦା ସୁନୀଲ, କାଳନ୍ଦୀ, ପ୍ରତାପ ଟୁଡୁ, ଏମ୍ ମୁର୍ମୁ , ବାପୁନି ଜେନା, ଗଣେଷ କୁମାର ପ୍ରମୁଖଙ୍କ କହିବା ମୁତାବକ, ଏଠାରେ ପାଣି ସମସ୍ୟା ଦୀର୍ଘ ୨୫ ବର୍ଷର। ବିଭିନ୍ନ ଜିଲାରୁ ଶ୍ରମିକମାନେ ଆସି ହଟିଂରେ ରହୁଥିଲେ ମଧ୍ୟ ସରକାର ଓ ପ୍ରକଳ୍ପ କର୍ତ୍ତୃପକ୍ଷଙ୍କ ଅବହେଳାର ଶିକାର ହୋଇଆସୁଛନ୍ତି। ଏବେ ପାନୀୟ ସମସ୍ୟାରେ ପ୍ରାୟ ହଜାରେ ଲୋକ ଯୁଝି ହେଉଛନ୍ତି। ହଟିଂ ସ୍କୁଲ ସହ ଅନ୍ୟ ୨ ସ୍ଥାନରେ ଥିବା ନଳକୂଅ ଦୀର୍ଘଦିନ ହେଲା ଅଚଳ। ପ୍ରକଳ୍ପର ଦୂଷିତ ପାଣିକୁ ଲୋକେ ଶୌଚ ପାଇଁ ବ୍ୟବହାର କରୁଛନ୍ତି। ଶୁଦ୍ଧ ପାନୀୟ ଜଳ ପାଇଁ ପ୍ରକଳ୍ପ ଶକ୍ତିଦ୍ୱାର ନିକଟରେ ଗୋଟିଏ ସଂଯୋଗରେ ୩ଟି ଟ୍ୟାପର ବ୍ୟବସ୍ଥା ହୋଇଥିଲା। ଦୀର୍ଘ ଦିନ ହେଲା ମାତ୍ର ଗୋଟିଏ ଟ୍ୟାପରୁ ପାଣି ବାହାରୁଥିବାବେଳେ ୨ଟି ଖରାପ ହୋଇଯାଇଥିଲା। ବର୍ତ୍ତମାନ ସେହି ଗୋଟିଏ ଟ୍ୟାପ୍ରୁ ମଧ୍ୟ ଆବଶ୍ୟକ ମୁତାବକ ପାଣି ବାହାରୁନି। ମାସେ ହେଲାଣି ଘଣ୍ଟା ଘଣ୍ଟା ଧରି ଖରାତରାରେ ଧାଡ଼ିରେ ଛିଡା ହେବାକୁ ପଡୁଛି। ଏପରିକି ପାଣି ଆସୁ ନ ଥିବାରୁ ବିଳମ୍ବିତ ରାତି ପର୍ଯ୍ୟନ୍ତ ମଧ୍ୟ ଲୋକେ ଗରା ମାଠିଆ ଧରି ଅପେକ୍ଷା କରୁଛନ୍ତି। ଏଥିପାଇଁ ସରକାର ଓ ପ୍ରକଳ୍ପ ଦୃଷ୍ଟି ନ ଦେଲେ ହଟିଂବାସୀ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦିଆଯାଇଛି। ଏ ସମ୍ପର୍କରେ ଏନ୍ଟିପିସି ପ୍ରକଳ୍ପ ଜନ ସମ୍ପର୍କ ଅଧିକାରୀ ଅମିତ କୁମାର ବେହେରାଙ୍କୁ ପଚାରିବାରେ କହିଛନ୍ତି, ହଟିଂକୁ ପାନୀୟ ଜଳ ବ୍ୟବସ୍ଥା ହୋଇଥିଲା। ଟ୍ୟାଙ୍କର ଯୋଗେ ମଧ୍ୟ ପାଣି ଯାଉଛି। କେଉଁଠି ଅସୁବିଧା ହେଉଛି ତାହାର ତଦାରଖ କରାଯାଇ ସମସ୍ୟା ସମାଧାନ କରାଯିବ।