ଅବହେଳିତ ଏମ୍ଏସ୍ଏମ୍ଇ ଉଦ୍ୟୋଗୀ : ପାଉଁଶ ଯୋଗାଇଦେବାକୁ କାରଖାନା କର୍ତ୍ତୃପକ୍ଷଙ୍କୁ ଆରଆଇସିଙ୍କ ପତ୍ର
05 ଯାଜପୁର ଅଫିସ,୭ା୧୦: ଯାଜପୁର ଜିଲାର ଲଘୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମଏସଏମଇ)ଗୁଡିକ ବିଭିନ୍ନ କ୍ଷେତ୍ରରେ ଅବହେଳିତ ହେଉଛନ୍ତି। ଏମ୍ଏସ୍ଏମ୍ଇ ଉଦ୍ୟୋଗୀଙ୍କୁ ଋଣ ଯୋଗାଇ ଦେବାରେ ଜିଲାର ବ୍ୟାଙ୍କଗୁଡ଼ିକ ଆଦୌ ଆଗ୍ରହ ପ୍ରକାଶ କରୁନାହାନ୍ତି। ତେଣୁ ଅଗଷ୍ଟ ଶେଷ ସୁଦ୍ଧା ଜିଲା ଆଞ୍ଚଳିକ ଶିଳ୍ପ କେନ୍ଦ୍ର ପକ୍ଷରୁ ଦିଆଯାଇଥିବା ୪୫ଟି ପ୍ରସ୍ତାବ ପଡ଼ିରହିଛି। ଏହାବାଦ ପାଉଁଶ ଇଟା (ଫ୍ଲାଏଆସ୍) କାରଖାନା ମାଲିକମାନେ କଳିଙ୍ଗନଗର ଶିଳ୍ପ କାରଖାନାରୁ ଆବଶ୍ୟକ ପାଉଁଶ ନ ପାଇ ହଇରାଣ ହେବା ସହିତ କ୍ଷତିର ସମ୍ମୁଖୀନ ହେଉଛନ୍ତି। ଏଭଳି ସ୍ଥିତିରେ ଉଦ୍ୟୋଗୀମାନେ ବ୍ୟାଙ୍କରୁ ଆଣିଥିବା ଋଣ ଶୁଝିବା ନେଇ ସମସ୍ୟାରେ ପଡୁଛନ୍ତି। ୨୫ା୯ା୨୦୧୯ରେ ଯାଜପୁରରୋଡରେ ଅନୁଷ୍ଠିତ ଉଦ୍ୟୋଗ ସମସ୍ୟା ସମାଧାନ ଶିବିରରେ ଏନେଇ ଉଦ୍ୟୋଗୀଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଥିଲା। ଏହାକୁ ଭିତ୍ତିକରି କଳିଙ୍ଗନଗର ଆଞ୍ଚଳିକ ଶିଳ୍ପକେନ୍ଦ୍ରର(ଆରଆଇସି) ଜେନେରାଲ ମ୍ୟାନେଜର ସମ୍ପୃକ୍ତ ଶିଳ୍ପ କାରଖାନା କର୍ତ୍ତୃପକ୍ଷଙ୍କୁ ସ୍ଥାନୀୟ ପାଉଁଶ ଇଟା କାରଖାନାଗୁଡ଼ିକୁ ସହଜରେ ପାଉଁଶ ଯୋଗାଇ ଦେବା ପାଇଁ ଅନୁରୋଧ କରିଛନ୍ତି।
କୃଷି କ୍ଷେତ୍ର ପରେ ଦେଶର କର୍ମନିଯୁକ୍ତି କ୍ଷେତ୍ରରେ ଏମ୍ଏସ୍ଏମ୍ଇ ବଡ ଭାଗିଦାରୀ ତୁଲାଇ ଆସୁଛି। ଯାଜପୁର ଜିଲା ଶିଳ୍ପ କେନ୍ଦ୍ର ଅଧୀନରେ ୧୮ହଜାର ନିଯୁକ୍ତି ସୁଯୋଗ ସୃଷ୍ଟି କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। କିନ୍ତୁ ବ୍ୟାଙ୍କ ଓ ଶିଳ୍ପ କାରଖାନାର ଅସହଯୋଗ ଯୋଗୁ ମାସିକ ଅଗ୍ରଗତି ରିପୋର୍ଟ ନୈରାଶ୍ୟଜନକ ରହିଆସୁଛି। ବିଶେଷ କରି ପାଉଁଶ ଇଟା କାରଖାନା ମାଲିକମାନେ କଳିଙ୍ଗନଗର ଶିଳ୍ପ କାରଖାନାଗୁଡିକରୁ ପାଉଁଶ ନ ପାଇ ବେଶ କ୍ଷତିର ସମ୍ମୁଖୀନ ହେଉଛନ୍ତି। କଳିଙ୍ଗନଗର ଆଞ୍ଚଳିକ ଶିଳ୍ପ କେନ୍ଦ୍ର ଦ୍ୱାରା ପ୍ରୋସତ୍ାହିତ ହୋଇ ଇଟା କାରଖାନା ସ୍ଥାପନ କରୁଛନ୍ତି। ଏହି ସମୟରେ ସ୍ଥାନୀୟ ଇଟା କାରଖାନାର ମାଲିକଙ୍କୁ ଅଗ୍ରାଧିକାର ଭିତ୍ତିରେ ପାଉଁଶ ଯୋଗାଇ ଦେବାକୁ ଶିଳ୍ପ କାରଖାନାର ସମ୍ପୃକ୍ତ ଅଧିକାରୀମାନେ ଚୁକ୍ତି କରୁଛନ୍ତି। କିନ୍ତୁ ପରବର୍ତ୍ତୀ ସମୟରେ ଏହି ଚୁକ୍ତିକୁ ଭୁଲିଯାଇ ପଡୋଶୀ ଭଦ୍ରକ ଜିଲାର ପାଉଁଶ ଇଟା କାରଖାନା ମାଲିକଙ୍କୁ ପାଉଁଶ ଯୋଗାଇ ଦେଉଥିବା ଶୁଣିବାକୁ ମିଳୁଛି। ଏ ସଂକ୍ରାନ୍ତରେ ଗତ ଉଦ୍ୟୋଗ ସମାଧାନ ଶିବିରରେ ରଘୁନାଥ ଫ୍ଲାଏଆଶ ବ୍ରିକ୍ସର ପ୍ରମୋଟର ପି. ଖୁଣ୍ଟିଆ, ରାଜା ଇଣ୍ଟରପ୍ରାଇଜେସର ମହମ୍ମଦ ସାବିର, ଶ୍ରୀଗୁରୁ ବ୍ରିକ୍ସର ବିକାଶ ସାହୁ, ଅନ୍ନପୂର୍ଣ୍ଣ ଡିସି ଚିଫ ବ୍ରିକ୍ସ, କ୍ଷଣପ୍ରଭା ବେଉରିଆ, ୟୁଏସ ବ୍ରିକ୍ସର ଅରୁଣ କୁମାର ମଲ୍ଲିକ, ମନୋଜ କୁମାର ରାଉତ ପ୍ରମୁଖ ପାଉଁଶ ଇଟା ମାଲିକମାନେ କଳିଙ୍ଗନଗର ଜିନ୍ଦଲ ଷ୍ଟେନଲେସ ଷ୍ଟିଲରୁ ଆବଶ୍ୟକ ପାଉଁଶ ମିଳୁ ନ ଥିବା ଅଭିଯୋଗ କରିଥିଲେ। ଫଳରେ ଏହି କ୍ଷୁଦ୍ର, ମଧ୍ୟମ ଉଦ୍ୟୋଗୀମାନେ ଇଟା ତିଆରି କରି ନ ପାରି ହଇରାଣ ହେଉଛନ୍ତି। ଗ୍ରାମୀଣ ଏବଂ ଅର୍ଦ୍ଧ ସହର ଅଞ୍ଚଳରେ କର୍ମ ନିଯୁକ୍ତିର ବୃହତ ସୁଯୋଗ ସୃଷ୍ଟି କରିଥିବା ଏହି କ୍ଷେତ୍ର ପ୍ରତି ଅବହେଳା କରିବା ସମୀଚିନ ନୁହେଁ ବୋଲି ଉଦ୍ୟୋଗୀମାନେ ମତପ୍ରକାଶ କରିଛନ୍ତି। ଏହାବାଦ ବ୍ୟାଙ୍କମାନେ ଉଦ୍ୟୋଗୀଙ୍କୁ ଆର୍ଥିକ ସହାୟତା ଦେବାରେ ପଛଘୁଞ୍ଚା ଦେଉଛନ୍ତି। ହତାଶ ହୋଇ ସେମାନେ ମହାଜନଙ୍କ ଉପରେ ନିର୍ଭର କରୁଛନ୍ତି। ଅତ୍ୟାଧିକ ଋଣ ଭାର ସେମାନଙ୍କ ସ୍ବପ୍ନରେ ବାଧକ ସାଜିଛି। ଏଭଳି ଭାବରେ କଞ୍ଚାମାଲର ଅଭାବ ସାଙ୍ଗକୁ ବ୍ୟାଙ୍କର ଅସହଯୋଗ ଉଦ୍ୟୋଗୀଙ୍କୁ ପଥଭ୍ରଷ୍ଟ କରୁଛି। ଜିଲାରେ ପେପର ପ୍ଲେଟ, ଫ୍ଲାଏଆସ ଇଟାଭାଟି, ଫେବ୍ରିକେଶନ, ଆଲୁମିନିୟମ ୟୁଟେନସିଲ, ମସରୁମ ସିଡସ୍, ଏମଏସ ଷ୍ଟିଲ ଫେବ୍ରିକେସନ, ଟେଲରିଂ, ଅଗରବତୀ, ଫର୍ନିଚର, ଟେଣ୍ଟ ହାଉସ, ରେଡିମେଡ ଗାର୍ମେଟ ପ୍ରଭୃତି ଉଦ୍ୟୋଗୀ ଆଗ୍ରହ ପ୍ରକାଶ କରିଥିବାବେଳେ ଜିଲାର ବ୍ୟାଙ୍କଗୁଡିକ ନୀରବ ରହିଛନ୍ତି। ଏ ସଂକ୍ରାନ୍ତରେ କଳିଙ୍ଗନଗର ଶିଳ୍ପକେନ୍ଦ୍ରର ଆଞ୍ଚଳିକ ପରିଚାଳକ ତାଙ୍କ ପତ୍ରସଂଖ୍ୟା ୨୦୬୬/୩ା୧୦ା୨୦୧୯ରେ ଏକ ନିର୍ଦ୍ଦିଷ୍ଟ ଶିଳ୍ପ କମ୍ପାନୀକୁ ସ୍ଥାନୀୟ ପାଉଁଶ ଇଟା ମାଲିକଙ୍କୁ ଆବଶ୍ୟକ ଫ୍ଲାଏଆସ ଯୋଗାଇ ଦେବାକୁ ସୂଚିତ କରିଛନ୍ତି।