ଭୋଗରାଇ, ୨୫।୧୦(ଡି.ଏନ.ଏ.)-ଲଘୁଚାପ ପ୍ରଭାବରେ ଭୋଗରାଇ ସମେତ ଆଖପାଖ ଅଞ୍ଚଳରେ ବୁଧବାରଠାରୁ ଅବିଶ୍ରାନ୍ତ ବର୍ଷା ଲାଗିରହିଛି। ତୁହାକୁ ତୁହା ବର୍ଷା ହେବା ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଗୁରୁବାର ସାରାଦିନ ବର୍ଷା ପ୍ରକୋପରେ ଦୂରଦୂରାନ୍ତକୁ ଯାଉଥିବା ଯାତ୍ରୀବାହୀ ବସ୍, ଅଟୋଗୁଡ଼ିକରେ ଯାତ୍ରୀ ସଂଖ୍ୟା କମ୍ ପରିଲକ୍ଷିତ ହୋଇଥିଲା। ହାଟ, ବଜାର, ରାସ୍ତାଘାଟରେ ଲୋକଙ୍କ ଯାତାୟାତ ଏକ ପ୍ରକାର ଶୂନଶାନ୍ ହୋଇଛି। ଆହୁରି ଦୁଇଦିନ ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ସୂଚନା ଦେଇଛି। ରବିବାର ଅମାବାସ୍ୟା ତିଥି ଥିବାରୁ ସମୁଦ୍ର ଉତ୍ତାଳ ହୋଇଛି। ସମୁଦ୍ରର ଢ଼େଉ ତାଳସାରୀ, ଉଦୟପୁର, ଶଙ୍କରପୁର, ତାଜପୁର ଓ ମନ୍ଦାମଣୀ ଆଦି କୂଳ ଆଡ଼କୁ ମାଡ଼ି ଆସିବାରୁ କୂଳବାସୀ ଭୟଭୀତ ହୋଇପଡିଛନ୍ତି। ଏ ସମସ୍ତ ପର୍ଯ୍ୟଟନ ସ୍ଥଳୀରେ ସମୁଦ୍ରକୁ ନ ଯିବା ପାଇଁ ପର୍ଯ୍ୟଟକଙ୍କୁ ପ୍ରଶାସନ ପକ୍ଷରୁ ବାରଣ କରାଯାଇଛି। ଭୋଗରାଇରେ ୩୧.୨ ମି.ମି., ଜଳେଶ୍ୱରରେ ୧୧ମି.ମି., ବାଲିଆପାଳରେ ୨୫ମି.ମି., ବସ୍ତାରେ ୪୬ ମି.ମି. ସହିତ ଜିଲାରେ ସର୍ବମୋଟ୍ ୩୩୦.୨ ମି.ମି. ବର୍ଷା ହୋଇଥିବା ଜରୁରୀକାଳୀନ ଦପ୍ତର ସୂଚନା ମିଳିଛି।