ଓଣ୍ଟାରିଓ: ଗୃହପାଳିତ ପ୍ରାଣୀ ବିଲେଇଙ୍କୁ କିଏ ବା ନ ଜାଣେ। କେଉଁ ଆବହମାନ କାଳରୁ ଏହି ପୋଷା ଜୀବ ମଣିଷ ସହିତ ରହିଆସିଛି। ହେଲେ ବିଲେଇର ମନ କିପରି ଅଛି, ସେ ଖୁସି ଅଛି ନା ଦୁଃଖୀ ଏକଥା ଜାଣିବା ବହୁତ କଷ୍ଟକର। ହାତଗଣିତ ମଣିଷ ହିଁ ବିଲେଇର ମନୋଭାବକୁ ପଢ଼ିପାରିଥାନ୍ତି। କାନାଡ଼ାର ୟୁନିଭରସିଟି ଅଫ୍ ଗୁଏଲ୍ପର ଡିପାର୍ଟମେଣ୍ଟ ଅଫ୍ ଆନିମଲ ବାୟୋ ସାଇନ୍ସର ବିଶେଷଜ୍ଞମାନେ କରିଥିବା ଏକ ସର୍ଭେରୁ ଏପରି ତଥ୍ୟ ପଦାକୁ ଆସିଛି।
ବିଲେଇଙ୍କ ମୁହଁକୁ ଏହି ମାଂସାଶୀ ପ୍ରାଣୀକୁ କେତେ ବୁଝିପାରେ ମଣିଷ? ଏହାର ଉତ୍ତର ଖୋଜିବାକୁ ୟୁନିଭର୍ସିଟିର ବିଶେଷଜ୍ଞ ଟିମ୍ ପକ୍ଷରୁ କାନାଡ଼ାରେ ସର୍ଭେ କରାଯାଇଥିଲା, ଯେଉଁଥିରେ ସାମିଲ ହୋଇଥିଲେ ୮୫ ଦେଶର ୬୦୦୦ ଜଣ। ସର୍ଭେରେ ବିଭିନ୍ନ ପ୍ରଜାତିର ବିଲେଇଙ୍କ ଭିଡିଓ ପ୍ରଦର୍ଶିତ ହୋଇଥିଲା। ସର୍ଭେରେ ସାମିଲ ହୋଇଥିବା ୬୦% ଲୋକ ବିଲେଇଙ୍କ ହାବଭାବ ଦେଖି ସେମାନଙ୍କ ମନୋଭାବ ଜାଣିବାକୁ ଉଦ୍ୟମ କରିଥିଲେ। ହେଲେ ସେମାନଙ୍କ ମଧ୍ୟରୁ ମାତ୍ର ୧୩% ହିଁ ୭୫% ସ୍କୋର କରିପାରିଥିଲେ। ଏଥିରୁ ଜଣାପଡ଼ିଛି, ବିଲେଇଙ୍କ ଚେହେରା ପଛରେ ଅନେକ ଭାବନା ଲୁଚି ରହିଥାଏ ହେଲେ ହାତଗଣତି ଲୋକ ହିଁ ତାକୁ ପଢ଼ିପାରିଥାନ୍ତି।
ଗବେଷଣା ଟିମ୍ର ପ୍ରମୁଖ ସଦସ୍ୟ ପ୍ରଫେସର ଜର୍ଜିଆ ମେସନଙ୍କ କହିବା କଥା, ତାଙ୍କ ପାଳିତ ବିଲେଇକୁ ଦେଖି ସେ ସହଜରେ କହିଦେଇପାରିବେ ତାଙ୍କ ବିଲେଇ ଖୁସି ଅଛି କି ଦୁଃଖୀ। ହେଲେ ଅଧିକାଂଶ ଲୋକଙ୍କ ପକ୍ଷେ ଏହା ବୁଝିବା କଷ୍ଟକର। ଏହାକୁ ଜାଣିବା ପାଇଁ ସେ କେତେଜଣ ବିଶେଷଜ୍ଞଙ୍କୁ ନେଇ ସର୍ଭେ କରିଥିଲେ। ଏଥି ଲାଗି ଅଲଗା ଅଲଗା ପ୍ରଜାତିର ଶବ୍ଦଶୂନ୍ୟ (ସାଇଲେଣ୍ଟ) ଭିଡିଓ ପ୍ରଦର୍ଶିତ କରାଯାଇଥିଲା। ହେଲେ ଏଥିରେ ସେମାନଙ୍କ ମୁଖମଣ୍ଡଳ ବ୍ୟତୀତ ଅନ୍ୟ ସବୁ ଅଂଶକୁ ଲୁଚାଇ ଦିଆଯାଇଥିଲା। ବିଲେଇଟି କେଉଁ ପରିସ୍ଥିତିରେ ଅଛି ତାକୁ ପ୍ରଦର୍ଶନ କରାଯାଇ ନ ଥିଲା।