ଭବାନୀପାଟଣା, ୨୯ା୭ (ଡି.ଏନ୍.ଏ): କେନ୍ଦ୍ର ଆର ରାଏଜ୍ ସରକାର ଛାତ୍ରୀଛାତ୍ରକୁଁ ଗୁଣାତ୍ମକ ଶିକ୍ଷା ଦେବାର ଲାଗି ଅନେକ ଯୋଜନା କାଯ୍କାରି କରି କୋଟି କୋଟି ଟଁକା ସାରୁଛନ୍। ହେଲେ କଳାହାଣ୍ଡି ଲେଖେଁ ଗୁଟେ ଆଦିବାସୀ ବହୁଲ ଜିଲାରେ ପ୍ରାଥମିକ ଶିକ୍ଷା ବାଟବନା ହେଉଥିବାର ଅଭିଯୋଗ ହେଉଛେ। ଉଦାହରନ୍ ହିସାବେ କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ବଡ଼ଛତ୍ରଙ୍ଗ ଉନ୍ନିତ ପ୍ରାଥମିକ ବିଦ୍ୟାଲୟକେ ନିଆଯାଇପାରେ।
ସୂଚନା ହିସାବେ ବଡ଼ଛତ୍ରଙ୍ଗ ଉନ୍ନିତ ପ୍ରାଥମିକ ବିଦ୍ୟାଲୟରେ ୧ମରୁ ୧୦ମ ଶ୍ରେଣୀ ତକ୍ ଛାତ୍ରୀଛାତ୍ରକଁର ପାଠ୍ପଢ଼ା ବେବସ୍ତା ରହିଛେ। ଏହେଦେ ସ୍କୁଲରେ ମୋଟ ୩୦୧ ଛାତ୍ରୀଛାତ୍ର ପାଠ୍ ପଢ଼ୁଥିଲାବେଲେ ସେଥ୍ରୁ ୧୨୧ ଛାତ୍ରୀ ଆର ୧୮୦ ଝନ୍ ଛାତ୍ର ରହିଛନ୍। ସେନ୍ତା ୧୦ଟା ଶ୍ରେଣୀର ଛୁଆକୁ ପାଠ୍ପଢ଼ାବାର ଲାଗି ୭ ଝନ୍ ଶିକ୍ଷକ ନିୟୋଜିତ ହେଇଛନ୍। ଶିକ୍ଷା ଅଧିକାର ଆଇନ୍ ହିସାବେ ପ୍ରାଥମିକସ୍ତର ଲାଗି ୩୦ ଝନ୍ ଛାତ୍ରୀଛାତ୍ରକଁର ଲାଗି ଝନେ ଶିକ୍ଷକ ନିୟୋଜିତ ହେବାର କଥା। ହେଲେ ଇ ସ୍କୁଲରେ ୧୦ଟା ଶ୍ରେଣୀର ଲାଗି ୭ ଝନ୍ ନ ଶିକ୍ଷକ ରହିଛନ୍। ସ୍କୁଲର ୧୦ କି.ମି. ଭିତରେ ୯ମ ୧୦ମ ଶ୍ରେଣୀ ପଢ଼ବାର ଲାଗି ଇଟା ଗୁଟେନ ହାଇସ୍କୁଲ। ଯେନ୍ଥିରଲାଗି ବହୁତ୍ ଦୂରିଆରୁ ଛାତ୍ରୀଛାତ୍ର ଇଠାନ୍କେ ପାଠ୍ପଢ଼ି ଆସୁଛନ୍। ହେଲେ ଦୁଖର କଥା ବିଦ୍ୟାଲୟରେ ଗଣିତ, ବିଜ୍ଞାନ ଆର ଇଂରାଜୀ ଲେଖେଁ ବିଷେ ପାଠ୍ ପଢ଼ାବାର ଲାଗି ଅଭିଜ୍ଞ ଶିକ୍ଷକ ନଁାଇଁନ। ସ୍କୁଲଟା ଉନ୍ନିତ ହେଲା ଉତାରୁ ହାଇସ୍କୁଲର ମାଏନ୍ତା ପାଇଛେ ସତ୍, ହେଲେ ଇଠାନେ ଆଏଜ୍ତକ ଝନେ ପ୍ରଧାନଶିକ୍ଷକ ନିଯୁକ୍ତ ନାଇଁ ହେଇପାରି। ଯେନ୍ଥିରଲାଗି ୧୦ ବଛର୍ରୁ ଅଧ୍କା ହେଲା ସ୍କୁଲର ଝନେ ସହକାରୀ ଶିକ୍ଷକ ପ୍ରଧାନଶିକ୍ଷକ ଦାଇତିଅ ତୁଲେଇ ଆସୁଛନ୍। ସେନ୍ତା ୨୦୧୨ ସାଲେ ସ୍କୁଲର ପୁରନା କୁଠାରୁ ନୂତନ କୁଠାକେ ଉଠେଇ ନିଆଯାଇଛେ। ହେଲେ ନୂତନ କୁଠାରେ ବାଡ଼ା, ପିଇଲା ପାଏନ୍ର ବେବସ୍ତା ନଁାଇଁନ। ଯେନ୍ଥିରଲାଗି ଏଭେ ବି ପୁରନା କୁଠାଥି ଏମ୍.ଡି.ଏମ୍ ରଁଧାବଢ଼ା ହେଉଛେ। ନୂତନ୍ କୁଠାନୁ ପାଖାପାଖି ୧ କି.ମି. ଦୂରେ ଥିବାର ପୁରନା କୁଠାକେ ଛାତ୍ରୀଛାତ୍ର ଖରା, ବରଷାରେ ଚାଲି ଚାଲି ଖାଇ ଯାଉଛନ୍। ବିଦ୍ୟାଳୟରୁ ୧୦ କି.ମି. ଭିତରେ ଥିବାର ଦୁଇ ପଁଚେତ୍ ବିରିକୋଟ ଆର ବାଗଡ଼ିଆଣିର ଅନେକ ଗଁାର ଛାତ୍ରୀଛାତ୍ର ଇ ହାଇସ୍କୁଲରେ ପାଠ୍ପଢ଼ୁଛନ୍। ସେମାନେ ଝାର ଜଂଗଲ ଭିତରେ ଅତଡ଼ିଆ ରାସ୍ତାରେ ୫ରୁ ୧୦ କି.ମି. ଦୂରେ ଥିବାର ଇ ସ୍କୁଲକେ ଫିଦିନ୍ ପାଠ୍ପଢ଼ି ଆସୁଛନ୍। ହେଲେ ଇଥ୍ରେ ଛାତ୍ରୀମାନକର ସୁରକ୍ଷା ଉପରେ ଅଭିଭାବକମାନେ ଚିନ୍ତା ପରକଟ କରିଛନ୍। ଇତାକେ ଗୁରୁତ୍ ଦେଇ ଜିଲା ଆଦିବାସୀ ସମନ୍ବିତ ସଂସ୍ଥା ତରଫୁ ୧ଶହ ଛାତ୍ରୀକଁର ରହିବାର ସୁବିଧା ଥିବାର ଛାତ୍ରୀନିବାସ ତିଆର ଲାଗି ଗଲା ୨୦୧୪-୧୫ ସାଲେ ୫୭ ଲାଖ୍ ଟଁକାର ଅନୁଦାନ ଦିଆଯାଇଛେ। ହେଲେ ଛାତ୍ରୀନିବାସ ତିଆରି କାମ୍କେ ୩ ବଛର୍ରୁ ଅଧ୍କା ବିତିଯାଇଥିଲେ ବି କାମ୍ ପୂରା ନାଇଁ ହେଇପାରି। ଆଏଜ୍ତକ ଛାତ୍ରୀ ନିବାସରେ ପିଇଲା ପାଏନ୍ ଆର ବିଦ୍ୟୁତ୍ ସଂଯୋଗ ନାଇଁ ହେଇପାରି। ଇ ଦିଗେ ଜିଲା ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଂଚଲବାସୀ ଦାବି କରିଛନ୍।
