ବ୍ରଜରାଜନଗର,୫ା୪(ଡି.ଏନ.ଏ.): ବହୁଚର୍ଚ୍ଚିତ ସମର୍ଥ ହତ୍ୟାକାଣ୍ଡର ୯ଦିନ ପରେ ମଙ୍ଗଳବାର ପୋଲିସ ଖବରଦାତା ସମ୍ମିଳନୀ କରି ଏହାର ଉଦ୍ଦେଶ୍ୟ ସମ୍ପର୍କରେ ଅବଗତ କରାଇଛି। ଅଭାବରେ ପଡ଼ି ଅଭିଯୁକ୍ତ ନାବାଳକ ସମର୍ଥଙ୍କୁ ଅପହରଣ କରିଥିବା ଝାରସୁଗୁଡା ଏସ୍ପି ସ୍ମିଥ ପରମାର ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସେ ଆହୁରି କହିଛନ୍ତି, ମୁଖ୍ୟ ଅଭିଯୁକ୍ତ ଅମିତ ଶର୍ମାଙ୍କ ସହ ମୃତକଙ୍କ ପରିବାରର ଘନିଷ୍ଟତା ଥିଲା। ସମର୍ଥଙ୍କ ବାପା ସୁମିତ ଅଗ୍ରୱାଲଙ୍କ ବ୍ୟବସାୟ ଠିକ୍ ଚାଲୁଥିବାରୁ ତାଙ୍କ ପାଖରେ ଟଙ୍କାର ଅଭାବ ନ ଥିଲା। ଏପଟେ ଅମିତ ଧାର କରଜରେ ବୁଡିଥିବାରୁ ସମର୍ଥଙ୍କୁ ଅପହରଣ କରି ସୁମିତଠାରୁ ଟଙ୍କା ଆଦାୟ କରିବାର ଯୋଜନା କରିଥିଲେ। ସମର୍ଥଙ୍କ କ୍ରିକେଟ ଖେଳ ପ୍ରତି ଦୁର୍ବଳତା ଥିଲା। ସମର୍ଥ ସବୁଦିନ ପରି ଗତ ୨୭ତାରିଖ ଅପରାହ୍ନ ୪ଟାରେ ସ୍କୁଟି ଧରି ଖେଳପଡିଆକୁ ଯାଇଥିଲେ। ପୂର୍ବ ପ୍ରସ୍ତୁତି ଅନୁଯାୟୀ ଅମିତ ସେଠାରେ ପହଞ୍ଚତ୍ କ୍ରିକେଟ କିଟ୍ସ କିଣିବାକୁ କହି ସମର୍ଥଙ୍କୁ ଡାକି ଆଣିଥିଲେ। ପରେ ସେ ତାଙ୍କ ସହଯୋଗୀ ତଥା ଅନ୍ୟତମ ଅଭିଯୁକ୍ତ ଦିନେଶ ଅଗ୍ରଓ୍ବାଲ ଓ ସମର୍ଥଙ୍କୁ ନିଜ କାର୍ରେ ବସାଇ ବୁର୍ଲା ଅଭିମୁଖେ ବାହାରିଥିଲେ। ଝାରସୁଗୁଡା ପାର ହେବାକ୍ଷଣି ସମର୍ଥ ପାଟିକରିବାରୁ ଅଭିଯୁକ୍ତମାନେ ତାଙ୍କ ମୋବାଇଲ ଆଣି ସୁଇଚ ଅଫ କରିଦେଇଥିଲେ। ପରେ ସେମାନେ ବୁର୍ଲାରେ ଥିବା ତୃତୀୟ ଅଭିଯୁକ୍ତ ଗଣେଶ ନାୟକଙ୍କ ପାଖକୁ ଫୋନ କରି ଏକ ରୁମ ରଖିବା ପାଇଁ କହିଥିଲେ। ସେହି ରାତ୍ରିରେ ବୁର୍ଲାରେ ରହି ୨୮ତାରିଖ ସକାଳେ ସେମାନେ ପେଟ୍ରୋଲ ଓ କଟୁରି କିଣି ବରଗଡ଼ ଅଭିମୁଖେ ବାହାରିଥିଲେ। ସେଠାରେ କଟୁରି ସାହାଯ୍ୟରେ ସମର୍ଥଙ୍କ ବେକ କାଟି ପେଟ୍ରୋଲ ଢାଳି ନିଆଁ ଲଗାଇ ଫେରାର ମାରିଥିଲେ। ଏପଟେ ସମର୍ଥ ପରିବାର ଅଭିଯୋଗକ୍ରମେ ପୋଲିସ ତିନି ଗୋଟି ଟିମ କରି ଅପରେଶନ ଆରମ୍ଭ କରିଥିଲା। ସମର୍ଥଙ୍କୁ ୨୮ତାରିଖ ସକାଳେ ସେମାନେ ହତ୍ୟା କରି ସୁମିତଙ୍କୁ ଫୋନରେ ଟଙ୍କା ମାଗିଥିଲେ। ତେବେ ଏତେ ଶୀଘ୍ର ହତ୍ୟା କରିଦେବା ବିଶ୍ୱାସ ବାହାରେ ଥିବା ଏସ୍ପି ପ୍ରକାଶ କରିଛନ୍ତି। ଖବରଦାତା ସମିଳନୀରେ ଡିଏସ୍ପି ନିର୍ମଳ ମହାପାତ୍ର, ଝାରସୁଗୁଡା ଥାନା ଅଧିକାରୀ ସାବିତ୍ରୀ ବଳ ଉପସ୍ଥିତ ଥିଲେ।
