ଜଣେ ଚରିତ୍ର ଅଭିନେତା ଭାବରେ ସେ ନିଜର ଦକ୍ଷତା ଦେଖାଇବାରେ ସକ୍ଷମ ହୋଇଛନ୍ତି। ତା’ ସହ ନିଜର ପ୍ରତିଭାର ଆଉ ଏକ ପରିଚୟ ସେ ଦେଇଛନ୍ତି ଜଣେ ନାଟ୍ୟକାର ଭାବରେ। ସାମ୍ପ୍ରତିକ ଘଟଣାବଳୀକୁ ନେଇ ନାଟକ ରଚନା କରି ସେ ସାଉଁଟିଛନ୍ତି ଢେର ପ୍ରଶଂସା। ଏହି ଅଭିନେତା-କମ୍-ନାଟ୍ୟକାର ହେଲେ ଦିଲୀପ କୁମାର ନାୟକ। ସେତେବେଳେ ତାଙ୍କୁ ମାତ୍ର ୧୦ବର୍ଷ। ଗଁ।ରେ ପରିବେଷିତ ଏକ ଗୀତିନାଟ୍ୟରେ ତାଙ୍କୁ ଅଭିନୟ କରିବାର ସୁଯୋଗ ମିଳିଥିଲା। ପୁଣି ଭୂମିକାଟି ଥିଲା ନାରୀ ଚରିତ୍ର। ବାସ୍, ଏହି ସୁଯୋଗକୁ ସେ ସଦୁପଯୋଗ କରିବାକୁ ପଛାଇ ନ ଥିଲେ। ତା’ପରେ ଅଭିନୟ ସତେଯେମିତି ତାଙ୍କର ନିଶା ପାଲଟି ଯାଇଥିଲା। ଛୋଟ ପରଦାରେ ପ୍ରସାରିତ ବିକ୍ରମ ବେତାଳ ଧାରାବାହିକରେ ପୋଲିସ ଭୂମିକାରେ ଅଭିନୟ କରିବା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି। ଇତି ମଧ୍ୟରେ ସେ ଟେଲି ଧାରାବାହିକ-ଆହୁତି, ଆମ ଘର ଲକ୍ଷ୍ମୀ, ଦୁର୍ଗା, ତୋ ଅଗଣାର ତୁଳସୀ ମୁଁ, ସିନ୍ଦୂର ବିନ୍ଦୁ, ତୋ ପାଇଁ ମୁଁ, ରାଣୀରେ ଅଭିନୟ କରିସାରିଛନ୍ତି। ଏହାବ୍ୟତୀତ ଓଡ଼ିଆ ଚଳଚ୍ଚିତ୍ର ‘ସୁନ୍ଦରଗଡ଼ର ସଲମାନ ଖଁ।, ତୋତେ ଭଲ ପାଏ ୧୦୦ରୁ ୧୦୦, କୁଇନ୍, ବିଜୁବାବୁ, ଦୀପୁ-ଦ ଡ୍ୟାନ୍ସ ବୟ ଏବଂ ବାବୁ ଭାଇଜାନ୍ରେ ତାଙ୍କୁ ଭିନ୍ନ ଭିନ୍ନ ଚରିତ୍ରରେ ଦେଖିବାକୁ ମିଳିଛି। କେବଳ ଅଭିନୟ ନୁହେଁ, ନାଟକ ରଚନା ମୋତେ ବେଶ୍ ଆତ୍ମସନ୍ତୋଷ ଦେଇଛି। ପୋଲିସ୍, ଓକିଲ, ଗଁ। ମୁଖିଆ କିମ୍ବା ବାପା ଭୂମିକା-ଏଗୁଡିକୁ ମୁଁ ପ୍ରଥମରୁ ହିଁ ସିରିୟସ ଭାବରେ ନେଇଥାଏ। ସମାଜକୁ ନୂଆ ବାର୍ତ୍ତା ଦେବାରେ ନାଟକର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ତେଣୁ ନାଟକ ରଚନା ସମୟରେ ମୁଁ ତାକୁ ପ୍ରାଧାନ୍ୟ ଦେଇଥାଏ ବୋଲି କହନ୍ତି କେନ୍ଦ୍ରାପଡ଼ାର ବଲୁରିଆ ଅନ୍ତର୍ଗତ ଅରାଜି ଗ୍ରାମରେ ଜନ୍ମିତ ଦିଲୀପ।