ନୂଆଦିଲ୍ଲୀ,୪-୧୦: ବର୍ତ୍ତମାନ ଅର୍ଥନୈତିକ ମାନ୍ଦାବସ୍ଥା ଲାଗି ରହିଥିବା ବେଳେ ଦେଶର ଜିଡ଼ିପି ଅଭିବୃଦ୍ଧି ଧାରା ତ୍ୱରାନ୍ବିତ କରିବାକୁ ସରକାର ସଂସ୍କାର ପ୍ରକ୍ରିୟା ଜାରି ରଖିବେ। ଅର୍ଥ ବ୍ୟବସ୍ଥାକୁ ସୁଧାରିବା ଲାଗି ଆଗାମୀ ଦିନରେ ବିଭିନ୍ନ ଘୋଷଣା କରାଯିବ ବୋଲି ସରକାରଙ୍କ ଥିଙ୍କ ଟ୍ୟାଙ୍କ ନୀତି ଆୟୋଗ ସିଇଓ ଅମିତାଭ କାନ୍ତ ଗୁରୁବାର କହିଛନ୍ତି। ନୂଆଦିଲ୍ଲୀରେ ଓ୍ବାର୍ଲଡ ଇକୋନୋମିକ ଫୋରମ୍ର ଇଣ୍ଡିଆ ଇକୋନୋମିକ ସମିଟରେ ଯୋଗଦେଇ ସେ କହିଛନ୍ତି ଯେ, ୨୦୦୫ ପରଠାରୁ ବର୍ତ୍ତମାନ ପର୍ଯ୍ୟନ୍ତ ଦେଶର ୩୦୦ ନିୟୁତ ଲୋକଙ୍କୁ ଦାରିଦ୍ର୍ୟତା ମଧ୍ୟରୁ ସରକାର ବାହାରକୁ ଆଣିଛନ୍ତି। ଗତ ପାଞ୍ଚ ବର୍ଷରେ ଜିଡିପି ଅଭିବୃଦ୍ଧି ୭.୫% ହାର ଛୁଇଁଛି। ୨୦୧୭-୧୮ ଆର୍ଥତ୍କ ବର୍ଷ ଶେଷ ତ୍ରୈମାସରେ ଦେଶର ଜିଡିପି ୮.୧% ରହିଥିଲା। ଏହା ୨୦୧୯-୨୦ ଏପ୍ରିଲ-ଜୁନ ତ୍ରୈମାସରେ ୫% ଖସିଥିବା ସେ ପ୍ରକାଶ କରିଛନ୍ତି।
ସରକାରଙ୍କ ସଂସ୍କାର ପଦକ୍ଷେପ ଉପରେ ମତ ରଖି ସେ କହିଛନ୍ତି, ଅର୍ଥ ବ୍ୟବସ୍ଥାରେ ସୁଧାର ଲାଗି ସରକାର ଏବଂ ରିଜର୍ଭ ବ୍ୟାଙ୍କ ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ଆର୍ବିଆଇ ଏହାର ରେପୋକୁ ୧୧୦ ବେସିସ୍ ପଏଣ୍ଟ କମାଇବା ଫଳରେ ଏହା ବର୍ତ୍ତମାନ ୫.୪%ରେ ରହିଛି। ରାଷ୍ଟ୍ରାୟତ୍ତ ବ୍ୟାଙ୍କଗୁଡିକୁ ପୁଞ୍ଜି ଯୋଗାଣ, ବ୍ୟାଙ୍କ ମିଶ୍ରଣ, ରପ୍ତାନି କ୍ଷେତ୍ର ପାଇଁ ପ୍ୟାକେଜ୍ ଏବଂ କର୍ପୋରେଟ ଟିକସ ହ୍ରାସ କରାଯାଇଛି। ଆଗକୁ ଆହୁରି ନୂଆ ଘୋଷଣା କରାଯିବ। ସେହିଭଳି ରାଷ୍ଟ୍ରାୟତ୍ତ ସଂସ୍ଥାଗୁଡିକରୁ ପୁଞ୍ଜି ପ୍ରତ୍ୟାହାର, ସମ୍ପତ୍ତିର ମୁଦ୍ରାକରଣକୁ ଗୁରୁତ୍ୱ, ନିବେଶକଙ୍କୁ ବ୍ରାଉନଫିଲ୍ଡ ନିବେଶ ଲାଗି ଉତ୍ସାହିତ କରାଯାଉଛି। ବିଶ୍ୱ ବଜାରକୁ ଧ୍ୟାନରେ ରଖି କର୍ପୋରେଟ ଟିକସକୁ ହ୍ରାସ କରାଯାଇଛି। କୃଷି, ଖଣି ଏବଂ କୋଇଲା ଭଳି କ୍ଷେତ୍ରଗୁଡିକରେ ଆଗାମୀ ଦିନରେ ବିଭିନ୍ନ ସଂସ୍କାର ଘୋଷଣା କରାଯିବ। ଦୀର୍ଘ ମିଆଦି ଭିତ୍ତିରେ ୯ରୁ ୧୦% ଅଭିବୃଦ୍ଧି ଧାରା ଜାରି ରହିଲେ ଏହା ଦ୍ୱାରା ବୃହତ୍ତ ସଂଖ୍ୟକ ଲୋକଙ୍କୁ ଦାରିଦ୍ର୍ୟତା ଭିତରୁ ବାହାରକୁ ଆଣିବା ସହଜ ହେବ ବୋଲି ସେ ପ୍ରକାଶ କରିଛନ୍ତି।
ସେ ଆହୁରୀ କହିଛନ୍ତି, ଡିଜିଟାଲ ଇଣ୍ଡିଆ ପଦକ୍ଷେପ ମୁତାବକ ଦେଶର ପରୋକ୍ଷ ଟିକସ କ୍ୟାଶଲେସ ଏବଂ ପେପରଲେସ ହୋଇଛି। ବିଶ୍ୱ ବ୍ୟାଙ୍କର ଇଜଅଫ ଡୁଇଁ ବିଜନେସ ତାଲିକାରେ ଭାରତ ପ୍ରାୟ ୬୫ ସ୍ଥାନ ଉପରକୁ ଉଠିଛି। ଆଗାମୀ ୨ ବର୍ଷରେ ଏହି ତାଲିକାର ଶୀର୍ଘ ୫୦ ଏବଂ ୫ ବର୍ଷରେ ଶୀର୍ଘ ୨୦ ମଧ୍ୟରେ ସ୍ଥାନୀତ ହେବାକୁ ଲକ୍ଷ୍ୟ ରଖାଯାଇଛି।