ଖୋର୍ଦ୍ଧା ଅଫିସ,୨୫।୫: ଏକ ହତ୍ୟା ମାମଲାରେ ସମ୍ପୃକ୍ତ ଅଭିଯୁକ୍ତ ବୁଲୁଥିବା ବେଳେ ପୋଲିସ ନିର୍ଦ୍ଦୋଷ ଓ ସାଧାରଣ ଲୋକଙ୍କୁ ବାନ୍ଧି ହଇରାଣ କରୁଛି। ଖୋର୍ଦ୍ଧା ସଦର ପୋଲିସ ବିରୋଧରେ ଏଭଳି ଅଭିଯୋଗ ଆଣିଛନ୍ତି ବ୍ରଜମୋହନପୁର ଗ୍ରାମବାସୀ। ପ୍ରତିବାଦ କରିବାରୁ ମିଥ୍ୟା ମାମଲାରେ ଫସାଇ ଜେଲ ପଠାଇ ଦେବାକୁ ପୋଲିସ ଧମକ ଦେଉଛି ବୋଲି ଗ୍ରାମବାସୀ ଅଭିଯୋଗ କହିଛନ୍ତି। ମଙ୍ଗଳବାର ଏହାର ପ୍ରତିବାଦରେ ଶତାଧିକ ମହିଳା ପୁରୁଷ ଜିଲା ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟ ଘେରାଉ କରିବା ସହ ସଦର ଥାନା ପୋଲିସ ବିରୋଧରେ ବର୍ଷିଥିଲେ। ପୋଲିସ ବିଭାଗରେ ସ୍ବଚ୍ଛତା ଆଣିବା ଲାଗି ସରକାର ମୋ ସରକାରରେ ଅନ୍ତର୍ଭୁକ୍ତ କରିଛନ୍ତି। ତେବେ ପୋଲିସ କାହା ସ୍ବାର୍ଥରେ କାମ କରୁଛି। ଏଠାରେ ମୋ ସରକାର ପ୍ରହସନ ପାଲଟିଛି ବୋଲି ଗ୍ରାମବାସୀ କହିଛନ୍ତି। ଏହି ଘଟଣାର ନିରପେକ୍ଷ ତଦନ୍ତ ଲାଗି ଏସ୍ପିଙ୍କୁ ଦାବିପତ୍ର ପ୍ରଦାନ କରିଛନ୍ତି। ଅଭିଯୋଗରେ ଦର୍ଶାଯାଇଛି ଯେ, ୨୦୧୨ ମସିହାରେ ବ୍ରଜମୋହନପୁର ଗ୍ରାମର ବିଭୂତି ବୈରଗଞ୍ଜନଙ୍କୁ ଗୋପୀନାଥପୁର ଗ୍ରାମର ଜଣେ ଯୁବକ ହତ୍ୟା କରିଥିଲେ। ଏଯାବତ୍ ପୋଲିସ ଅଭିଯୁକ୍ତଙ୍କୁ ଗିରଫ କରିପାରିନାହିଁ। ଅନ୍ୟପଟେ ଅଭିଯୁକ୍ତଙ୍କୁ ପୋଲିସ ଧରିବା ପରିବର୍ତ୍ତେ ହତ୍ୟାର ଶିକାର ବିଭୂତିଙ୍କ ସାନଭାଇଙ୍କୁ ଗିରଫ କରିଛି। ଫଳରେ ସଦର ଥାନାଧିକାରୀଙ୍କ ଭୂମିକାକୁ ନେଇ ପ୍ରଶ୍ନ ଉଠାଇଛନ୍ତି ଗ୍ରାମବାସୀ। ଘଟଣାର ନିରପେକ୍ଷ ତଦନ୍ତ କରି ସଦର ଥାନାଧିକାରୀଙ୍କୁ ଏଠାରୁ ତୁରନ୍ତ ବଦଳି ଲାଗି ଦାବି କରିଛନ୍ତି। କେଉଁ କାରଣରୁ ତାଙ୍କୁ ଗିରଫ କରାଯାଇଛି, ତାଙ୍କ ବିରୋଧରେ କ’ଣ କେସ୍ ରହିଛି, ତାହା ବାରମ୍ବାର ପଚାରିଲେ ମଧ୍ୟ ପୋଲିସ ପକ୍ଷରୁ କୌଣସି ଉତ୍ତର ଦିଆଯାଉନାହିଁ। ଥାନାକୁ ବାରମ୍ବାର ଆସିଲେ, ଜେଲ୍ରେ ପୂରାଇ ଦେବାକୁ ଧମକ ଦିଆଯାଉଛି ବୋଲି କେତେଜଣ ଗ୍ରାମବାସୀ କହିଛନ୍ତି। ଏ ସମ୍ପର୍କରେ ଏସ୍ପି ସିଦ୍ଧାର୍ଥ କଟାରିଆ କହିଛନ୍ତି, ଏବେ ସ୍ବତନ୍ତ୍ର ଓ୍ବାରେଣ୍ଟି ଡ୍ରାଇଭ୍ ଚାଲିଛି। ପୁରୁଣା କେସ୍ରେ ତାଙ୍କୁ ଗିରଫ କରାଯାଇଛି। ଗ୍ରାମବାସୀ ଦେଇଥିବା ଅଭିଯୋଗକୁ ତର୍ଜମା କରାଯାଇ ପଦକ୍ଷେପ ଗ୍ରହଣ କରାଯିବ।