ସାଉଥାମ୍ପଟନ,୨୧।୬(ପି.ଟି.)- ଟିମ୍ ଇଣ୍ଡିଆର ଆଘାତ ସମସ୍ୟା ବଢ଼ିବାରେ ଲାଗିଛି। ଏହାର ସଦ୍ୟତମ ଶିକାର ହୋଇଛନ୍ତି ଅଲରାଉଣ୍ଡର ବିଜୟ ଶଙ୍କର। ବୁଧବାର ଅଭ୍ୟାସ ଅବସରରେ ସେ ଆହତ ହୋଇଛନ୍ତି। ବର୍ଷା ପ୍ରଭାବିତ ଏହି ଅଭ୍ୟାସ ସେସନରେ ବ୍ୟାଟିଂ କରୁଥିବା ବେଳେ ଯଶପ୍ରୀତ ବୁମ୍ରାଙ୍କ ୟର୍କର ତାଙ୍କ ଗୋଡ ଆଙ୍ଗୁଠିରେ ବାଜିଥିଲା। ଫଳରେ ସେ ଯନ୍ତ୍ରଣା ଅନୁଭବ କରିଥିଲେ ଓ ଶେଷରେ ତାଙ୍କୁ ଟ୍ରେନିଂ ଛାଡିବାକୁ ପଡିଥିଲା। ତେବେ ଏଥିରେ କୌଣସି ବ୍ୟସ୍ତ ହେବାର ନାହିଁ ବୋଲି ଦଳୀୟ ସୂତ୍ରରୁ ଜଣାଯାଇଛି। ବିଜୟ ଯନ୍ତ୍ରଣା ଅନୁଭବ କରିଥିଲେ ମଧ୍ୟ ସେଭଳି କିଛି ବିପଦ ନାହିଁ ବୋଲି ସ୍ପଷ୍ଟ କରାଯାଇଛି।
ଗୁରୁବାର ଶଙ୍କର ସ୍ଲିପର ପିନ୍ଧି ସାମାନ୍ୟ ଛୋଟୋଉଥିବାର ଲକ୍ଷ୍ୟ କରାଯାଇଥିଲା। ଏହା ପରେ ଅବଶ୍ୟ ସେ ଜଗିଂ କରିବାର ଦେଖାଯାଇଥିଲା। ସେ ମଧ୍ୟ କେତୋଟି ଅତ୍ୟାବଶ୍ୟକୀୟ ବ୍ୟାୟାମ କରିଥିଲେ। ତେବେ ଅନ୍ୟ ଭାରତୀୟ ଖେଳାଳିମାନେ ଫିଲ୍ଡିଂ ଅଭ୍ୟାସ କରିବା ସହ ନେଟ୍ ସେସନରେ ଭାଗ ନେଇଥିଲେ। ଭାରତୀୟ ବ୍ୟାଟିଂ ଲାଇନର ଚତୁର୍ଥ ନମ୍ବର ବ୍ୟାଟ୍ସମ୍ୟାନ ଭାବେ ଶଙ୍କର ବିବେଚିତ ହେଉଛନ୍ତି। ସେ ମଧ୍ୟ ଭଲ ମିଡିୟମ ପେସ୍ ବୋଲିଂ କରିଥାନ୍ତି। ଗତ ପାକିସ୍ତାନ ବିପକ୍ଷ ମ୍ୟାଚ୍ରେ ଶଙ୍କର ଅଧିନାୟକ ସର୍ଫରାଜ ଅହମ୍ମଦଙ୍କ ସମେତ ୨ଟି ଉଇକେଟ ଅକ୍ତିଆର କରି ଭାରତ ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ।
ଉଲ୍ଲେଖଥାଉ କି, ପୂର୍ବରୁ ତାରକା ତଥା ଅଭିଜ୍ଞ ଓପନର ଶିଖର ଧାଓ୍ବନ ବୁଢା ଆଙ୍ଗୁଠି ଭାଙ୍ଗିବା କାରଣରୁ ବିଶ୍ୱକପ୍ରୁ ବାଦ୍ ପଡିସାରିଛନ୍ତି। ସେହିପରି ଦ୍ରୁତ ବୋଲର ଭୁବନେଶ୍ୱର କୁମାର ମଧ୍ୟ ହାମଷ୍ଟ୍ରିଙ୍ଗ୍ ଇଞ୍ଜୁରି କାରଣରୁ ଦୁଇଟି ମ୍ୟାଚ୍ରୁ ବାଦ୍ ପଡିଛନ୍ତି। ଏବେ ଶଙ୍କର ଆହତ ହେବା ପରେ ଭାରତୀୟ ଟିମ୍ ମ୍ୟାନେଜମେଣ୍ଟର ଚିନ୍ତା ବଢ଼ିଯାଇଛି। ଭୁବନେଶ୍ୱର ୮ ଦିନ ବୋଲିଂ କରିପାରିବେ ନାହିଁ। ବର୍ମିଂହାମ୍ରେ ଜୁନ୍ ୩୦ରେ ଖେଳାଯିବାକୁ ଥିବା ଗୁରୁତ୍ୱପୂର୍ଣ୍ଣ ଇଂଲଣ୍ଡ ବିପକ୍ଷ ମ୍ୟାଚ୍ ଖେଳିବାକୁ ସେ ଫିଟ୍ ହୋଇଯାଇଥିବେ ବୋଲି ଆଶା କରାଯାଉଛି। ଟୁର୍ନାମେଣ୍ଟର ଅନ୍ତିମ ଭାଗରେ ଭୁବନେଶ୍ୱର ଫିଟ୍ ହେବା ନେଇ ଟିମ୍ ମ୍ୟାନେଜମେଣ୍ଟ ବିଶ୍ୱାସ ପ୍ରକଟ କରିଛି। ବିଶ୍ୱକପ୍ରେ ଭୁବନେଶ୍ୱର ପୁଣି ସାମିଲ ହେବା ନେଇ ଆଶାକ୍ଷୀଣ ବୋଲି କୁହାଯାଇଛି। ସେ ଚଲାବୁଲା କରିବା ସହ ଜଗିଂ କରୁଥିବାର ଲକ୍ଷ୍ୟ କରାଯାଇଛି। ତେବେ ସେ ନେଟ୍ ସେସନରେ ଭାଗ ନେଇ ନ ଥିଲେ। ଷ୍ଟାଣ୍ଡବାଇ ଦ୍ରୁତ ବୋଲରଭାବେ ଖଲିଲ ଅହମ୍ମଦ ଦଳ ସହିତ ରହିଛନ୍ତି। ସେଭଳି ଖରାପ ପରିସ୍ଥିତି ସୃଷ୍ଟି ହୁଏ ଓ ଯଦି ଭୁବନେଶ୍ୱର ଫିଟ୍ ନ ହୋଇ ବିଶ୍ୱକପ୍ରୁ ବାଦ୍ ପଡନ୍ତି, ତାହେଲେ ଅଭିଜ୍ଞ ଈଶାନ୍ତ ଶର୍ମାଙ୍କୁ ଦଳରେ ସାମିଲ କରାଯାଇପାରେ। କାରଣ ଈଶାନ୍ତ ତାଲିକାରେ ରହିଛନ୍ତି। ବିଶ୍ୱକପ୍ରେ ଆଘାତ ସମସ୍ୟା କେବଳ ଭାରତ ଲାଗି ନୁହଁ ଅନ୍ୟ ଦଳଗୁଡିକ ପାଇଁ ମଧ୍ୟ ଚିନ୍ତା ସୃଷ୍ଟି କରିଛି।