ବିଜୟନଗରମ,୨୬।୯(ପି.ଟି.)- ସ୍ଥାନୀୟ ଡ. ଭିଭିଜି ରାଜୁ ଏସିଏ ସ୍ପୋଟର୍ସ କମ୍ପ୍ଲେକ୍ସରେ ବୋର୍ଡ ସଭାପତି ଏକାଦଶ ଓ ଦକ୍ଷିଣ ଆଫ୍ରିକା ମଧ୍ୟରେ ୩ ଦିନିଆ ଅଭ୍ୟାସ ମ୍ୟାଚ୍ ଗୁରୁବାରଠାରୁ ଆରମ୍ଭ ହୋଇଛି। ତେବେ ପ୍ରବଳ ବର୍ଷା ଯୋଗୁ ପ୍ରଥମ ଦିନର ଖେଳ ସମ୍ପୂର୍ଣ୍ଣ ରୂପେ ଧୋଇଯାଇଛି। ଲଞ୍ଚ୍ ପର ସେସନରେ ଖେଳ ବାତିଲ କରିବାକୁ ଅମ୍ପାୟରମାନେ ନିଷ୍ପତ୍ତି ନେଇଥିଲେ। ବର୍ଷା ଯୋଗୁ ଟସ୍ ମଧ୍ୟ ପଡିପାରି ନ ଥିଲା। ବିଶାଖାପାଟନାରେ ଆସନ୍ତା ୨ ତାରିଖରୁ ପ୍ରଥମ ଟେଷ୍ଟ ମ୍ୟାଚ୍ ଆରମ୍ଭ ହେବାର କାର୍ଯ୍ୟକ୍ରମ ଥିବାରୁ ଏହି ଓ୍ବାର୍ମ ମ୍ୟାଚ୍ର ଅଧିକ ଗରୁତ୍ୱ ରହିଛି। ସଭାପତି ଏକାଦଶ ଅଧିନାୟକ ରୋହିତ ଶର୍ମାଙ୍କ ଉପରେ ସମସ୍ତଙ୍କ ନଜର ରହିଛି। ଟେଷ୍ଟ ସିରିଜରେ ତାଙ୍କୁ ଓପନର ଭାବେ ଦଳରେ ସାମିଲ କରାଯାଇଥିବାରୁ ଏହି ଅଭ୍ୟାସ ମ୍ୟାଚ୍ରେ ସେ ଇନିଂସ ଓପନ୍ କରବା ଆଶା କରାଯାଉଛି। ତାରକା ଦ୍ରୁତ ବୋଲର ଯଶପ୍ରୀତ୍ ବୁମ୍ରା ଇଞ୍ଜୁରି କାରଣରୁ ଦଳରୁ ବାଦ୍ ପଡିଥିବାରୁ ତାଙ୍କ ବଦଳ ଖେଳାଳି ଉମେଶ ଯାଦବ ମଧ୍ୟ ଫୋକସରେ ରହିବେ। ଅନ୍ୟତମ ଓପନର ମୟଙ୍କ ଅଗ୍ରଓ୍ବାଲଙ୍କ ପ୍ରଦର୍ଶନ ଉପରେ ମଧ୍ୟ ସମସ୍ତଙ୍କ ନଜର ରହିବ।
