କୋଲକାତା,୭ା୭: ବିଶିଷ୍ଟ ଅର୍ଥନୀତିଜ୍ଞ ତଥା ନୋବେଲ ପୁରସ୍କାର ବିଜେତା ଅମର୍ତ୍ତ୍ୟ ସେନ୍ ‘ଜୟ ଶ୍ରୀରାମ’ ପଶ୍ଚିମବଙ୍ଗର ସଂସ୍କୃତି ନୁହେଁ, ଏହା ଲୋକଙ୍କୁ ପିଟିବା ଲାଗି ଉଦ୍ଦିଷ୍ଟ ବୋଲି କହିବା ପରେ ଏହାକୁ ଭାଜପା ପକ୍ଷରୁ ସମାଲୋଚନା କରାଯାଇଛି। ପଶ୍ଚିମବଙ୍ଗ ଭାଜପା ମୁଖ୍ୟ ଦିଲୀପ ଘୋଷ କହିଛନ୍ତି ଯେ, ତାଙ୍କର ପଶ୍ଚିମବଙ୍ଗ ସଂସ୍କୃତି ସମ୍ପର୍କରେ କୌଣସି ଧାରଣା ନାହିଁ କି ରାଜ୍ୟବାସୀ ଏନେଇ ସହମତ ନୁହନ୍ତି। ପଶ୍ଚିମବଙ୍ଗର ପ୍ରତ୍ୟେକ ଗ୍ରାମରେ ‘ଜୟ ଶ୍ରୀରାମ’ ଉଚ୍ଚାରଣ କରାଯାଉଛି। ଭାଜପାକୁ ଭୋଟ ଦେଇ ରାଜ୍ୟବାସୀ ସେମାନଙ୍କ ମତ ଦେଇସାରିଛନ୍ତି ବୋଲି ଘୋଷ ପ୍ରକାଶ କରିଛନ୍ତି। ଏଠାରେ ଉଲ୍ଲେଖଯୋଗ୍ୟ ଯେ, ଶୁକ୍ରବାର ଯାଦବପୁର ବିଶ୍ୱବିଦ୍ୟାଳୟ ଜନସମାବେଶକୁ ଉଦ୍ବୋଧନ ଦେଇ ଅମର୍ତ୍ତ୍ୟ ସେନ୍ ଏଭଳି ମତ ରଖିଥିଲେ। ଏମିତିକି ପଶ୍ଚିମବଙ୍ଗରେ ରାମନବମୀ ପୂର୍ବରୁ ପାଳନ କରାଯିବା ସେ ଶୁଣିନାହାନ୍ତି ବୋଲି ମଧ୍ୟ କହିଥିଲେ।