ସମ୍ବଲପୁର,୨୪ା୪(ବ୍ୟୁରୋ) – ରବିଧାନ ଅମଳ ଅବସ୍ଥାକୁ ଆସି ଯାଇଥିଲା। କରୋନା କଟକଣା ସତ୍ତ୍ୱେ ଚାଷର ଉପଯୁକ୍ତ ଯତ୍ନ ନେଇଥିଲା ଚାଷୀ। ହେଲେ ସମ୍ବଲପୁର ଜିଲାରେ ମଙ୍ଗଳବାର ସନ୍ଧ୍ୟାର ବର୍ଷା ଓ କରାମାଡ ସବୁ ଯେମିତି ଓଲଟପାଲଟ କରିଦେଲା । କ୍ଷେତରେ ହସୁଥିବା ସୁନାର ଫସଲ ଏବେ ଉଜୁଡି ଯାଇଛି । ପାଚିଲା ଧାନକେଣ୍ଡା ସବୁ ଝଡି କ୍ଷେତରେ ଲୋଟିଛି । ମାତ୍ର ୧୫ ମିନିଟର ତାଣ୍ଡବ ଚାଷୀ ପରିବାରକୁ ହତାଶା ମଧ୍ୟକୁ ଟାଣି ନେଇଛି। ଗତ ଦୁଇଦିନ ଧରି କୃଷି ବିଭାଗ ପକ୍ଷରୁ କ୍ଷୟକ୍ଷତି ଆକଳନ କରାଯାଇଛି । ହେଲେ ଚାଷୀ କେବେ ଓ କେତେ ଆର୍ଥତ୍କ ସହାୟତା ପାଇବେ ସେ ନେଇ ସଂଶୟରେ ପଡିଛି ା ଏପରି ପରିସ୍ଥିତିରେ ଧାରକରଜ କରି ଫସଲ କରିଥିବା ଚାଷୀ ଏବେ ଚିନ୍ତାରେ ପଡିଛି ା
ସମ୍ବଲପୁର ମହାନଗରରେ ସାମିଲ ହୋଇଥିବା ମାନେଶ୍ୱର ବ୍ଲକର ୧୨ପଞ୍ଚାୟତର ଚାଷୀଙ୍କ ଫସଲ ବୀମାଭୁକ୍ତ କରାଯାଇନାହିଁ । ବ୍ୟାଙ୍କ ଓ ସମବାୟ ସମିତି ଋଣୀ ଓ ଅଣଋଣୀ ଚାଷୀଙ୍କ ବୀମା କରାଇନାହାନ୍ତି। ବୁଧବାର ଓ ଗୁରୁବାର କୃଷି ବିଭାଗ ପକ୍ଷରୁ ପ୍ରାଥମିକ କ୍ଷୟକ୍ଷତି ଆକଳନ କରାଯାଇଛି । ଯୁଯୁମୁରା ତହସିଲଦାର ସୁମନ ମିଞ୍ଜ କ୍ଷତିଗ୍ରସ୍ତ କ୍ଷେତ ବୁଲି କ୍ଷୟକ୍ଷତି ଆକଳନ କରିଛନ୍ତି । ସେହିପରି ମାନେଶ୍ୱର ତହସିଲଦାର ମଧ୍ୟ କୃଷି ବିଭାଗ ସହ ମିଶି କ୍ଷୟକ୍ଷତି ଆକଳନ କରି ଚୂଡାନ୍ତ ରିପୋର୍ଟ ଦେବାକୁ ରାଜସ୍ବ ନିରୀକ୍ଷକମାନଙ୍କୁ ନିର୍ଦ୍ଦେଶ ଦେଇଛନ୍ତି । ମିଳିଥିବା ରିପୋର୍ଟ ଅନୁସାରେ ବର୍ଷା ଓ କରାମାଡରେ ଯୁଯୁମୁରା ଓ ମାନେଶ୍ୱର ବ୍ଳକରେ ଅଧିକ ପ୍ରଭାବିତ ହୋଇଛି । ରେଙ୍ଗାଲି, ନାକଟିଦେଉଳ,ଜନକିରା ବ୍ଳକରେ ଆଂଶିକ କ୍ଷତି ହୋଇଛି । ମୋଟ ୪ହଜାର ହେକ୍ଟର ରବିଧାନ ଫସଲ ଓ ୬ ଶହ ହେକ୍ଟର ପନିପରିବା ଚାଷ ନଷ୍ଟ ହୋଇଯାଇଛି । ମାନେଶ୍ୱର ବ୍ଳକରେ ୧୪ ପଞ୍ଚାୟତର ୭୧ ଗ୍ରାମର ୧୧୪୧ ହେକ୍ଟର, ଯୁଯୁମୁରା ବ୍ଲକରେ ୭ ପଞ୍ଚାୟତର ୩୩ ଗ୍ରାମର ୧୯୬୨ ହେକ୍ଟର, ଧନକଉଡା ବ୍ଲକରେ ୭ ପଞ୍ଚାୟତର ୨୪ ଗ୍ରାମରେ ୮୫୫ ହେକ୍ଟର ଜମି ପ୍ରଭାବିତ ହୋଇଛି । ଚାଷୀମାନେ କହିଛନ୍ତି , କରାମାଡରେ ପାଚିଲା ଧାନ ଝଡି ପଡିବାରୁ ପାଣିରେ ଭିଜି ବିଲରେ ଗଜା ହୋଇଯିବ । ପ୍ରଥମେ କରୋନା, ଏବେ ପ୍ରକୃତି ଚାଷୀ କୂଳକୁ ଉପରେ ଦାଉ ସାଜିଲା ା ରାଜ୍ୟ ସରକାର ଏ ସଂକ୍ରାନ୍ତରେ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି ା