ଅନୁଗୋଳ ଅଫିସ, ୮।୪- ଲକ୍ଡାଉନ ସମୟରେ ବାହାରେ ବୁଲାବୁଲି କରୁଥିବା ଅନୁଗୋଳର କେତେଜଣ ଅମାନିଆଙ୍କୁ ପୋଲିସ ଉତ୍ତମ ମଧ୍ୟମ ଦେଇଛି। ସେହିପରି ବଅଁରପାଳ ଅଞ୍ଚଳରେ କ୍ରିକେଟ ଖେଳୁଥିବା କେତେଜଣଙ୍କୁ ପୋଲିସ ଥାନାକୁ ଉଠାଇ ଆଣିବା ସହ ବ୍ୟାଟ୍, ବଲ ଓ ଉଇକେଟ୍ ଜବତ କରିଥିବା ସୂଚନା ମିଳିଛି। ଜିଲାରେ ନିୟମ ଉଲ୍ଲଂଘନ କରିଥିବା ୪୭ ଜଣଙ୍କ ନାମରେ ବିଭିନ୍ନ ଥାନାରେ ୯ଟି ମାମଲା ରୁଜୁ କରାଯାଇଛି ବୋଲି ଏସ୍ପି ଜଗମୋହନ ମୀନା ସୂଚନା ଦେଇଛନ୍ତି। ସେହିପରି କ୍ୱାରାଣ୍ଟାଇନ୍ ନିୟମ ଉଲ୍ଲଂଘନ କରି ୨ ଜଣ ଗିରଫ ହୋଇ କ୍ବାରାଣ୍ଟାଇନ୍କୁ ଯାଇଛନ୍ତି। ଅନୁଗୋଳ ଥାନା ଅଞ୍ଚଳରେ ଦୁଇଟି ମାମଲା ରୁଜୁ ହୋଇଥିବା ବେଳେ ୯ ଜଣଙ୍କୁ ଗିରଫ ସହ ୯ଟି ମୋଟର ସାଇକେଲ ପୋଲିସ ଜବତ ହୋଇଛି। ବଅଁରପାଳ ଥାନା ପୋଲିସ ୩ ମାମଲାରେ ୩୨ ଜଣଙ୍କୁ ଗିରଫ କରିବା ସହ ଗୋଟିଏ କାର୍, ୫ଟି ମୋଟର ସାଇକେଲ ଜବତ କରିଛି। ବନ୍ତଳା ପୋଲିସ ୩ ଜଣଙ୍କୁ ଗିରଫ କରିବା ସହ ତାଳଚେର ଅଞ୍ଚଳର ଜଣଙ୍କୁ ଗିରଫ କରିଛି। ହଣ୍ଡପା ଥାନା ପୋଲିସ ଦୁଇଟି ମାମଲାରେ ଦୁଇ ଜଣଙ୍କୁ ଗିରଫ କରିବା ସହ ମଦ ଜବତ କରିଛି। ପାଲଲହଡା ପୋଲିସ ସ୍ଥାନୀୟ ତହସିଲଦାରଙ୍କ ନେତୃତ୍ୱରେ ସହରର ମୁଖ୍ୟ ବଜାର ସହ ବିଭିନ୍ନ ଛକରେ ବାଇକ୍ରେ ଆସୁଥିବା ଲୋକଙ୍କୁ ତାଗିଦ କରିବା ସହ ୧୦ରୁ ଅଧିକ ବାଇକ୍ ଜବତ କରିଛି। କ୍ବାରାଣ୍ଟାଇନ୍ ନିୟମ ଉଲ୍ଲଂଘନ କରିଥିବା ନେଇ ଆଠମଲ୍ଲିକ ଓ ଖମାର ଥାନାରେ ଦୁଇଟି ମାମଲା ରୁଜୁ ସହ ୨ ଜଣକୁ ଗିରଫ କରାଯାଇ କ୍ବାରାଣ୍ଟାଇନ୍ରେ ରଖାଯାଇଥିବା ଏସ୍ପି ସୂଚନା ଦେଇଛନ୍ତି। ସେହିପରି ଅନୁଗୋଳ ସହରର ଗୋଟିଏ ସ୍ଥାନରେ ଘର କାମ ନିର୍ମାଣ ବେଳେ ଅନୁଗୋଳ ଉପଜିଲାପାଳ ବାସୁଦେବ ଶତପଥୀ ଚଢ଼ାଉ କରିଥିଲେ। ଘର ମାଲିକ ଅଣଓଡ଼ିଆ ଶ୍ରମିକଙ୍କୁ ଲଗାଇ କାର୍ଯ୍ୟ କରୁଥିବା ଦେଖି ସେମାନଙ୍କୁ ଉଠାଇ ଆଣିବା ସହ ପୋଲିସ ଜିମା ଦେଇଥିଲେ।
