ମୁମ୍ବାଇ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ତାଙ୍କର ୬୯ ତମ ଜନ୍ମ ଦିନ ପାଳନ କରୁଥିବା ବେଳେ ସବୁଆଡୁ ତାଙ୍କ ନିକଟକୁ ଛୁଟିଛି ଶୁଭେଚ୍ଛାର ସୁଅ। ବଲିଉଡ୍ ମଧ୍ୟ ମୋଦିଙ୍କୁ ଶୁଭେଚ୍ଛା ଜଣାଇଛି। ଏହି କ୍ରମରେ ମୋଦିଙ୍କ ବଲିଉଡ୍ ସହ ଥିବା ସମ୍ପର୍କ କଥା ଯଦି ଆଲୋଚନା କରାଯାଏ ତେବେ ନିକଟରେ ଏକ ସାକ୍ଷାତ୍କାରରୁ ଏହା ଜଣାପଡିଥିଲା। କିଛିଦିନ ପୂର୍ବେ ବଲିଉଡ୍ ଖିଲାଡି ବୟ ଅକ୍ଷୟ କୁମାର ମୋଦିଙ୍କ ସହ ଏକ ସାକ୍ଷାତ୍କାରରେ ତାଙ୍କୁ ପଚାରିଥିଲେ ଯେ ସେ ବଲିଉଡ୍ ମୁଭି ଦେଖନ୍ତି ନା ନାହିଁ। ହେଲେ ଉତ୍ତରରେ ମୋଦି କହିଥିଲେ ଏବେ ତାଙ୍କୁ ସମୟର ଅଭାବ ଯୋଗୁ ସେ ସିନେମା ଦେଖି ପାରୁ ନାହାଁନ୍ତି। ଶେଷଥର ପାଇଁ ବଲିଉଡ୍ ମହାନାୟକ ଅମିତାଭ ବଚ୍ଚନ ତାଙ୍କୁ ନିଜ ଅଭିନୀତ ମୁଭି ‘ପା’ ଦେଖିବା ପାଇଁ ଅନୁରୋଧ କରିଥିଲେ ବୋଲି ସେ କହିଥିଲେ। ସେମିତି ଅନୁପମ ଖେରଙ୍କ ସହ ମୋଦି ‘ଏ ଓ୍ବେଡନେଶଡେ’ ମଧ୍ୟ ଦେଖିବାକୁ ଯାଇଥିବା କହିଥିଲେ। ଅନ୍ୟପଟେ ଅକ୍ଷୟ ଯେତେବେଳେ ତାଙ୍କୁ ପଚାରିଥିଲେ କେଉଁ ହିନ୍ଦୀ ଗୀତ ତାଙ୍କୁ ଗୁଣୁଗୁଣେଇବାକୁ ଭଲଲାଗେ ସେଥିରେ ସେ ୧୯୬୧ ମସିହାରେ ଲତା ମଙ୍ଗେସକର ଗାଇଥିବା ୨ଟି ଗୀତ ବିଷୟରେ କହିଥିଲେ। ତେଣୁ ଏଥିରୁ ଅନୁମାନ କରାଯାଇ ପାରେ ଯେ ମୋଦିଙ୍କର ମନୋରଞ୍ଜନ ଦୁନିଆ ପ୍ରତି ଏତେଟା ଆକର୍ଷଣ ନାହିଁ।