ବିଦିଶା, ୨।୭: କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ବୋମା ପକାଇ ଉଡାଇ ଦେବାକୁ ଧମକ ଦିଆଯାଇଛି ବୋଲି ମଧ୍ୟପ୍ରଦେଶର ବିଦିଶା ଜିଲାର ଗଞ୍ଜବାସୌଦା ବିଧାୟିକା ଲିନା ଜୈନ ଅଭିଯୋଗ କରିଛନ୍ତି। ତାଙ୍କ ନିକଟକୁ ଆସିଥିବା ଏକ ପତ୍ରରେ ଅମିତ ଶାହଙ୍କ ସହ ତାଙ୍କୁ ମଧ୍ୟ ହତ୍ୟା କରାଯିବାର ଧମକ ଦିଆଯାଇଛି। ଏହାସହ ମଧ୍ୟପ୍ରଦେଶର ଏକ ରେଳ ଷ୍ଟେଶନ ଏବଂ ଶାସକୀୟ ଡାକ୍ତରଖାନା ଉଡାଇଦେବାକୁ ଉକ୍ତ ପତ୍ରରେ ଲେଖାଯାଇଛି। ସୋମବାର, ମଧ୍ୟାହ୍ନରେ ଏହି ପତ୍ର ଡାକ ଯୋଗେ ତାଙ୍କ ପାଖକୁ ଆସିଥିଲା ବୋଲି ସେ ଲିନା କହିଛନ୍ତି। ପତ୍ର ଦେଖିବା ପରେ ସେ ପୋଲିସରେ ଅଭିଯୋଗ କରିଥିଲେ। ସେପଟେ ଶାସକୀୟ ଡାକ୍ତରଖାନାର ପ୍ରଭାରୀ ଡା.ରବିନ୍ଦ୍ର ଚିଡାରଙ୍କୁ ମଧ୍ୟ କେହି ଅଜ୍ଞାତ ବ୍ୟକ୍ତି ଫୋନ କରି ଡାକ୍ତରଖାନା ଉଡାଇଦେବାକୁ ଧମକ ଦେଇଛନ୍ତି। ସେ ଏ ନେଇ ପୋଲିସରେ ଅଭିଯୋଗ କରିଛନ୍ତି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।
