କରାଚୀ,୨୮।୭(ପି.ଟି.)- ପାକିସ୍ତାନ ତାରକା ଦ୍ରୁତ ବୋଲର ମହମ୍ମଦ ଅମୀର ମାତ୍ର ୨୭ ବର୍ଷ ବୟସରେ ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି। ତେବେ ଏହା ଅନେକଙ୍କର ହଜମ ହୋଇନାହିଁ। ପୂର୍ବତନ ପାକିସ୍ତାନ ମହାନ୍ ଦ୍ରୁତ ବୋଲର ଓ୍ବାସିମ ଆକ୍ରମ ଓ ସୋଏବ ଅଖତାର ଅମୀରଙ୍କ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି।
୨୭-୨୮ ବର୍ଷରେ ଜଣେ ବୋଲର କ୍ୟାରିୟରର ଶ୍ରେଷ୍ଠ ପ୍ରଦର୍ଶନ କରିଥାଏ। ତେବେ ଏହି ବୟସରେ ଅମୀରଙ୍କ ଅବସର ନିଷ୍ପତ୍ତି ମୋତ ଆଶ୍ଟର୍ଯ୍ୟ କରିଛି ବୋଲି ଆକ୍ରମ କହିଛନ୍ତି। ଏହି ବୟସରେ ଜଣେ ବୋଲର ଶ୍ରେଷ୍ଠ ଦଳଗୁଡିକ ବିପକ୍ଷରେ ଭଲ ପ୍ରଦର୍ଶନ କରିବାର ସୁଯୋଗ ହାସଲ କରିଥାଏ। ଟେଷ୍ଟ ହେଉଛି କ୍ରିକେଟର ସବୁଠାରୁ ଶ୍ରେଷ୍ଠ ଫର୍ମାଟ। ତେଣୁ ଜଣେ ବୋଲର ଏହି ଫର୍ମାଟରେ ନିଜର ଦକ୍ଷତା ଓ ପ୍ରତିଭା ପ୍ରଦର୍ଶନ କରିବାର ସୁଯୋଗ ହାସଲ କରିଥାଏ। ପାକିସ୍ତାନ ଆଗାମୀ ଅଷ୍ଟ୍ରେଲିଆ ଗସ୍ତରେ ଦୁଇଟି ଓ ଇଂଲଣ୍ଡ ଗସ୍ତରେ ୩ଟି ଟେଷ୍ଟ ମ୍ୟାଚ୍ ଖେଳିବାର କାର୍ଯ୍ୟକ୍ରମ ରହିଛି। ଏପରିସ୍ଥଳେ ପାକିସ୍ତାନ ଅମୀରଙ୍କୁ ଆବଶ୍ୟକ କରୁଛି। କିନ୍ତୁ ତାଙ୍କର ଏହି ଅବସର ନିଷ୍ପତ୍ତି ଆମକୁ ନିରାଶ କରିଛି ବୋଲି ଆକ୍ରମ ଟୁଇଟ କରି ଉଲ୍ଲେଖ କରିଛନ୍ତି।
ସ୍ପଟ୍ ଫିକ୍ସିଂରେ ସମ୍ପୃକ୍ତ ହୋଇ ଅମୀର ବାସନ୍ଦ ହୋଇଥିଲେ ଓ ସେ କ୍ୟାରିୟରରେ ମାତ୍ର ୩୬ଟି ଟେଷ୍ଟ ଖେଳିଛନ୍ତି। ପାକିସ୍ତାନ କ୍ରିକେଟକୁ ଯେତେବେଳେ କିଛି ଦେବାର ବେଳ ଆସିଲା ସେତେବେଳେ ଅମୀର ଟେଷ୍ଟରୁ ଅବସର ନେଲେ। ମୋତେ ୨୭ ବର୍ଷ ହୋଇଥିଲେ ମୁଁ ଆହୁରି ୫୦ ଟେଷ୍ଟ ଖେଳିଥାନ୍ତି ବୋଲି ଅଖତାର କହିଛନ୍ତି। ଟେଷ୍ଟ ଫର୍ମାଟରେ ପାକିସ୍ତାନର ପ୍ରଦର୍ଶନ ଆଶାନୁରୂପ ହୋଇନାହିଁ ଓ ଏଥିରେ ପାକିସ୍ତାନ ସଂଘର୍ଷ କରୁଛି। ତେଣୁ ଅମୀରଙ୍କ ଆବଶ୍ୟକତା ରହିଥିବା ବେଳେ ତାଙ୍କର ଏହି ନିଷ୍ପତ୍ତି ମୋତେ ନିରାଶ କରିଛି। ତେବେ ପୂର୍ବତନ ଦ୍ରୁତ ବୋଲର ଓ୍ବାକର ୟୁନିସ୍ ଅମୀରଙ୍କୁ ହ୍ବାଇଟ୍ ବଲ୍ କ୍ରିକେଟ ପାଇଁ ଶୁଭେଚ୍ଛା ଜଣାଇଛନ୍ତି। ସେ ନୈରାଶ୍ୟବ୍ୟକ୍ତ କରିନାହାନ୍ତି। ପୂର୍ବତନ ଓପନର ତଥା ଅଧିନାୟକ ରମିଜ ରାଜା ମଧ୍ୟ ଏ ନେଇ ନୈରାଶ୍ୟବ୍ୟକ୍ତ କରିଛନ୍ତି। ଏତେ କମ୍ ବୟସରେ ଅମୀର ଟେଷ୍ଟ କ୍ରିକେଟରୁ ସନ୍ନ୍ୟାସ ନେଉଥିବାରୁ ଆମେ ନିରାଶ ହୋଇଛୁ। ଟେଷ୍ଟ ପାଇଁ ପାକିସ୍ତାନ ତାଙ୍କୁ ଆବଶ୍ୟକ କରୁଥିଲା। ଏବେ ସେ ପାକିସ୍ତାନ କ୍ରିକେଟକୁ କିଛି ଦେବାର ସମୟ ଆସି ପହଞ୍ଚିଥିଲା। କିନ୍ତୁ ଅନ୍ମୀରଙ୍କ ନିଷ୍ପତ୍ତି ଆମକୁ ଆଶ୍ଟର୍ଯ୍ୟ କରିଛି ବୋଲି ରାଜା କହିଛନ୍ତି।
