ଜଳେଶ୍ୱର,୨୭।୫(ସ୍ବ.ପ୍ର.)-ବାତ୍ୟା ଅମ୍ଫନ୍ ପ୍ରଭାବରେ ବାଲେଶ୍ୱର ଜିଲା ଜଳେଶ୍ୱର ଅଞ୍ଚଳରେ ମୋଟ ଚାଷ ହୋଇଥିବା ୮ହଜାର ହେକ୍ଟର ଜମି ମଧ୍ୟରୁ ୩୨୪ ହେକ୍ଟର ଜମି କ୍ଷତିଗ୍ରସ୍ତ ହୋଇଛି ବୋଲି ପ୍ରଶାସନ ପକ୍ଷରୁ ରିପୋର୍ଟ ଦିଆଯାଇଛି ା ଏହି ଆକଳନ ତ୍ରୁଟିପୂର୍ଣ୍ଣ ବୋଲି ଜଳେଶ୍ୱର ଅଞ୍ଚଳର ବହୁ ଚାଷୀ ଅଭିଯୋଗ ଆଣିଛନ୍ତି। ଏହାର ପୁନଃ ଆକଳନ କରାଯିବାକୁ ଦାବି ହୋଇଛି।
ଉକ୍ତ ରିପୋର୍ଟରେ ରାଜସ୍ବ ବିଭାଗ ପକ୍ଷରୁ ୩୦୬ ଗୃହ ଆଂଶିକ ଭାବେ ଭାଙ୍ଗିଥିବା ବେଳେ ଶତକଡ଼ା ୩୩ରୁ ଅଧିକ ୩୨୪ ହେକ୍ଟର ଜମିର ଧାନ ନଷ୍ଟ ହୋଇଥିବା ଦର୍ଶାଯାଇଛି। ଜଳେଶ୍ୱର ବ୍ଲକ ଅଞ୍ଚଳରେ ଚଳିତବର୍ଷ ୮ହଜାର ହେକ୍ଟର ଜମିରେ ଅଧିକ ଅମଳକ୍ଷମ ଚାଷ ହୋଇଥିଲା। ଝଡ଼ବାତ୍ୟା ଆସୁଥିବା ପୂର୍ବ ସୂଚନା ପାଇ ଚାଷୀମାନେ ପ୍ରାୟ ୭୦ଭାଗ ଜମିର ଧାନ ଅମଳ କରିଥିଲେ। ୩୦ ପ୍ରତିଶତ ଅଞ୍ଚଳର ଧାନ ଅମଳ ହୋଇ ନ ପାରି ବିଲରେ ଥିବା ତତ୍କାଳୀନ କୃଷି ଅଧିକାରୀମାନେ ମନ୍ତବ୍ୟ ରଖିଥିଲେ। ଏହି ଦୃଷ୍ଟିରୁ ପ୍ରାୟ ୨୫୦୦ ହେକ୍ଟର ଜମିରେ ଧାନ ବିଲରେ ଅମଳ ନ ହୋଇ ରହିଯାଇଥିବା କୁହାଯାଇଛି। ବାସ୍ତବରେ ଝଡ଼ବତାସ ପରେ ମଧ୍ୟ ବହୁ ସ୍ଥାନରେ ଧାନକଟା ଚାଲିଛି। ବିଲରେ ପାଣି ଜମି ରହିଥିବାରୁ ହାର୍ଭେଷ୍ଟର ଯାଇ ନ ପାରି ଦୈନିକ ମଜୁରିରେ ଧାନକଟା ଚାଲିଛି। ଏପରିସ୍ଥଳେ ସ୍ଥାନୀୟ ପ୍ରଶାସନ ଜଳେଶ୍ୱରରେ ୩୨୪ ହେକ୍ଟର ଜମି କ୍ଷତିଗ୍ରସ୍ତ ବୋଲି ଜାଣିବା ପରେ ଚାଷୀଙ୍କ ମଧ୍ୟରେ ଚାପା ଉତ୍ତେଜନା ଦେଖାଦେଇଛି। କୃଷକ ସଭା ସଭାପତି ବାଣୀଦାସ ମହାପାତ୍ର, ସିପିଏମ୍ ଆଞ୍ଚଳିକ ସଭାପତି ଦିଲୀପ ଗିରି, ଚାଷୀ ଦୀନେଶ ଜେନା, ବିଦୁ କାନୁନ୍ଗୋ, ହରିଶଙ୍କର ରାଜ, ହରିନାରାୟଣ ପାତ୍ର, ଶିବନାରାୟଣ ପାତ୍ର, କମଳାକାନ୍ତ କର, ବାବୁନି ଦେ, ଶଶୀ ବ୍ରହ୍ମ, ରବୀନ୍ଦ୍ର ଗିରି, ଶୀତାଂଶୁ ସେନାପତି ପ୍ରମୁଖ ଏହି ଆକଳନ ତ୍ରୁଟିପୂର୍ଣ୍ଣ ବୋଲି ଅଭିଯୋଗ କରିଛନ୍ତି। ଅଞ୍ଚଳରେ ଏକ କୃଷକ ଟିମ୍ ଗଠନ କରାଯାଇ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯିବ ବୋଲି କୁହାଯାଇଛି।