ଚିତ୍ରଡ଼ା,୨୧ା୫(ଡି.ଏନ୍.ଏ.): ମୟୂରଭଞ୍ଜ ଜିଲା ମୋରଡ଼ା ବ୍ଲକରେ ବାତ୍ୟା ଅମ୍ପନ୍ର ପ୍ରଭାବ ବୁଧବାର ଦେଖିବାକୁ ମିଳିଥିଲା। ଫଳରେ ବିଭିନ୍ନ ଘର କ୍ଷତିଗ୍ରସ୍ତ ହେବା ସହ ଗଛ ଏବଂ ବିଦ୍ୟୁତ୍ ଖୁଣ୍ଟ ଉପୁଡ଼ି ପଡ଼ିଛି। ଏଥିନେଇ ବିଦ୍ୟୁତ୍ ସେବା ବୁଧବାରଠାରୁ ଗୁରୁବାର ଅପରାହ୍ନ ପର୍ଯ୍ୟନ୍ତ ସ୍ବାଭାବିକ ହୋଇନାହିଁ। ମୋରଡ଼ା ବ୍ଲକର ବିଭିନ୍ନ ପଞ୍ଚାୟତର ଲୋକମାନଙ୍କ ଘର ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ଚିତ୍ରଡ଼ା ପଞ୍ଚାୟତର ପ୍ରସାଦ ବେହେରା, କୁଞ୍ଜଳତା ବଡ଼ମାଝି, ମୋରଡ଼ା ପଞ୍ଚାୟତର ଝରଣା ବେହେରାଙ୍କ ଘର ସମ୍ପୂର୍ଣ୍ଣ ରୂପେ ଭାଙ୍ଗିଯାଇଛି। ସେହିପରି ଚିତ୍ରଡ଼ା ପଞ୍ଚାୟତର ମିହିର କବାଟ, ସରସ୍ବତୀ ମାର୍ଣ୍ଡି, ପରେଶ ଚନ୍ଦ୍ର ରଣା, ମୋରଡା ପଞ୍ଚାୟତର ସନ୍ତୋଷ ମହାପାତ୍ର, ପଇଁତା ମହାକୁଡ଼, ଯୋଗେଶ୍ୱର ଦେହୁରୀ, ସୁଶାନ୍ତ ଦେହୁରୀ, ପୋଲସମୁଣ୍ଡୁଲି ପଞ୍ଚାୟତର ଟିକ ସିଂ ଏବଂ ଚିକଟାମାଟିଆ ପଞ୍ଚାୟତର ଛତିଶ୍ଚନ୍ଦ୍ର ମହାନ୍ତ, କାର୍ତ୍ତିକ ଚନ୍ଦ୍ର ମହାନ୍ତ ଏବଂ ପ୍ରଭାକର ମହାନ୍ତଙ୍କ ଘର ଆଂଶିକ କ୍ଷତି ହୋଇଥିବା ଦେଖିବାକୁ ମିଳିଛି। ଚିତ୍ରଡ଼ା ରାଜସ୍ବ ନିରୀକ୍ଷକ ଗାଁକୁ ଯାଇ କ୍ଷତିଗ୍ରସ୍ତ ଲୋକଙ୍କୁ ପଲିଥିନ୍ ପ୍ରଦାନ କରିଛନ୍ତି। ଅମ୍ଫନ୍ ପ୍ରଭାବରେ ସମ୍ପୂର୍ଣ୍ଣ କ୍ଷତିଗ୍ରସ୍ତଙ୍କୁ ପ୍ରଶାସନ ଯଥାଶୀଘ୍ର ଘର ଯୋଗାଇ ଦେବାକୁ ସାଧାରଣରେ ଦାବି ହେଉଛି।