ଅଯୋଧ୍ୟା,୭।୬: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶୁକ୍ରବାର ଅଯୋଧ୍ୟାରେ ଥିବା ଭଗବାନ ରାମଙ୍କ କୋଦଣ୍ଡ ପ୍ରତିମୂର୍ତ୍ତିକୁ ଉଦ୍ଘାଟନ କରିଛନ୍ତି। ୭ଫୁଟ ଉଚ୍ଚ ଥିବା ଏହି ପ୍ରତିମାର ବହୁ ମହତ୍ତ୍ୱ ରହିଛି। ରାମଙ୍କ ଏହି ପ୍ରତିମାକୁ କର୍ନାଟକରେ ତିଆରି କରାଯାଇଥିବା ବେଳେ ମାତ୍ର ଖଣ୍ଡେ ଶାଳ କାଠରେ ଏହାକୁ ନିର୍ମାଣ କରାଯାଇଥିବା ଜଣାପଡ଼ିଛି। ଦକ୍ଷିଣ ଭାରତରେ ଭଗବାନ ରାମଙ୍କ କୋଦଣ୍ଡ ରୂପକୁ ପୂଜା କରାଯାଇଥାଏ। ଶ୍ରୀରାମଙ୍କ ଏହି ମୂର୍ତ୍ତି ମଧ୍ୟ କୋଦଣ୍ଡ ଧନୁ ଧାରଣ କରିଥିବା ଦେଖିବାକୁ ମିଳିଛି। ସୂଚନାଯୋଗ୍ୟ, ଭଗବାନ ରାମଙ୍କ ଧନୁର ନାମ କୋଦଣ୍ଡ। ଯେତେବେଳେ ଶ୍ରୀରାମ ମାତା ସୀତାଙ୍କୁ ଖୋଜିବାକୁ ଦକ୍ଷିଣ ଭାରତରେ ପହଞ୍ଚିଥିଲେ ସେତେବେଳ ବନବାସୀ ରୂପେ ତାଙ୍କ ହାତରେ ଧନୁ ରହିଥିଲା। ଅଯୋଧ୍ୟାର ସୋଧ ସଂସ୍ଥାନ ମ୍ୟୁଜିୟମ୍ରେ ଯୋଗୀ ଆଦିତ୍ୟନାଥ ରାମଙ୍କ ମୂର୍ତ୍ତି ଉଦ୍ଘାଟନ କରିବା ପରେ ସେଠାକାର ଗ୍ୟାଲେରୀ ପରିଦର୍ଶନ କରିବା ସହ କିଛି ବହି ଓ ପୋଷ୍ଟାଲ କଭରର ଉନ୍ମୋଚନ କରିଥିଲେ।