ନୂଆଦିଲ୍ଲୀ, ୨୨।୮: ଅଯୋଧ୍ୟା ମାମଲାରେ ଗୁରୁବାର ୧୦ମ ଦିନ ପାଇଁ ହୋଇଥିବା ଶୁଣାଣି ହୋଇଛି। ଏଥିରେ ଗୋପାଲ ସିଂ ବିଶାରଦଙ୍କ ପକ୍ଷରୁ ନିଯୁକ୍ତ ଆଇନଜୀବୀ ରଞ୍ଜିତ୍ କୁମାର ସୁପ୍ରିମ୍କୋର୍ଟ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କ ସମ୍ମୁଖରେ ଅବଦୁଲ୍ ଗନିଙ୍କ ଦ୍ୱାରା ଦିଆଯାଇଥିବା ତଥ୍ୟ ଆଧାରରେ ଉପସ୍ଥାପନ କରିଥିଲେ ଯେ, ବିବାଦୀୟ ସ୍ଥଳରେ ବ୍ରିଟିଶ୍ ଅମଳରେ ଏଠାରେ ପ୍ରତି ଶୁକ୍ରବାର ଜୁମା ନମାଜ ପାଠ ହେଉଥିଲା। ସେହିପରି ହିନ୍ଦୁ ମଧ୍ୟ ପୂଜା କରୁଥିଲେ। ତେବେ ମସଜିଦ୍ ଭାଙ୍ଗିଯିବା ପରେ ଏଠାରେ ନମାଜ ପାଠ ବନ୍ଦ ହୋଇଯାଇଥିଲା। ମାତ୍ର ପୂଜା ଜାରି ରହିଥିଲା। ତେଣୁ ହିନ୍ଦୁଙ୍କ ଉପାସନା ଅଧିକାର ଛଡ଼େଇ ନିଆଯିବା ଅନୁଚିତ ବୋଲି ସେ ଯୁକ୍ତି ଦର୍ଶାଇଥିଲେ।