ନୂଆଦିଲ୍ଲୀ, ୨୭ା୮ (ପି.ଟି.)-ସ୍ଥାନୀୟ ଫିରୋଜ ଶାହ କୋଟ୍ଲା ଷ୍ଟାଡିୟମର ନାମ ଅରୁଣ ଜେଟ୍ଲୀ ଷ୍ଟାଡିୟମ ନାମରେ ନାମିତ ହେବ। ଦିଲ୍ଲୀ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନ (ଡିଡିସିଏ) ମଙ୍ଗଳବାର ଏସଂକ୍ରାନ୍ତରେ ନିଷ୍ପତ୍ତି ନେଇଛି। ଶନିବାର ପରଲୋକ ଗମନ କରିଥିବା ପୂର୍ବତନ କେନ୍ଦ୍ରମନ୍ତ୍ରୀ ଓ ଡିଡିସିଏ ସଭାପତି ଅରୁଣ ଜେଟଲୀଙ୍କ ସ୍ମୃତି ଉଦ୍ଦେଶ୍ୟରେ ଏହା କରାଯିବ। ନାମକରଣ ଉତ୍ସବ ସେପ୍ଟେମ୍ବର ୧୨ ତାରିଖରେ ହେବ। ସୂଚନାଯୋଗ୍ୟ, ଏହା ପୂର୍ବରୁ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି କୋଟ୍ଲାର ଏକ ଷ୍ଟାଣ୍ଡ ଜେଟଲୀଙ୍କ ନାମରେ କରଯିବ ବୋଲି ଘୋଷଣା କରିଥିଲେ। ଡିଡିସିଏ ସଭପତି ରଜତ ଶର୍ମା କହିଛନ୍ତି, ଅରୁଣ ଜେଟଲୀଙ୍କ ସହାୟତା ଏବଂ ଉତ୍ସାହ ସହାୟତାରେ ବିରାଟ କୋହଲି, ବୀରେନ୍ଦ୍ର ସେହ୍ବାଗ, ଗୌତମ ଗମ୍ଭୀର, ଆଶିଷ ନେହେରା, ରିଷଭ ପନ୍ତ ସମେତ ଅନେକ ଭଲ ଖେଳାଳି ସୃଷ୍ଟି ହୋଇଛନ୍ତି ଯେଉଁମାନେ ଭାରତକୁ ଗର୍ବିତ କରାଇଛନ୍ତି। ଜେଟଲୀଙ୍କର ଡିଡିସିଏରେ କାର୍ଯ୍ୟକାଳ ସମୟରେ ଷ୍ଟାଡିୟମର ଆଧୁନିକୀ କରଣ ହୋଇଥିଲା। ଆସନ ସଂଖ୍ୟା ବୃଦ୍ଧି ସହ ବିଶ୍ୱ ଶ୍ରେଣୀର ଡ୍ରେସିଂ ରୁମ୍ କରାଯାଇଥିଲା। ନାମକରଣ ଉତ୍ସବ ଜବାହରଲାଲ ନେହେରୁ ଷ୍ଟାଡିୟମରେ ଅନୁଷ୍ଠିତ ହେବ। ଏଥିରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଏବଂ କ୍ରୀଡ଼ା ମନ୍ତ୍ରୀ କିରନ ରିଜିଜୁ ଉପସ୍ଥିତ ରହିବେ।