ଅନୁଗୋଳ ଅଫିସ, ୨୭।୩: ଲକ୍ଡାଉନ୍ ବେଳେ ବିଭିନ୍ନ ରାଶନ ସାମଗ୍ରୀ କିପରି ସହଜରେ ଲୋକଙ୍କ ପାଖରେ ପହଞ୍ଚତ୍ପାରିବ ସେଥିପାଇଁ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଶୁକ୍ରବାର ବିଭିନ୍ନ ପାଇକାରୀ ବିକ୍ରେତାମାନଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି। ହୋମ୍ ଡେଲିଭରି ବ୍ୟବସ୍ଥା ଶନିବାର ଠାରୁ ଆରମ୍ଭ ହେବ। ୫ ଶହ ଟଙ୍କାରୁ ୧ ହଜାର ଟଙ୍କା ମଧ୍ୟରେ ସାମଗ୍ରୀ ମଗାଇଲେ ଡେଲିଭରି ଦେୟ ୨୦ ଟଙ୍କା ପଡ଼ିବ। ୫ ଶହ ଟଙ୍କାରୁ କମ୍ ମୂଲ୍ୟରେ ସାମଗ୍ରୀ ମଗାଯାଇପାରିବ ନାହିଁ। ୧ ହଜାରରୁ ଊର୍ଦ୍ଧ୍ୱ ଟଙ୍କାର ସାମଗ୍ରୀ ମଗାଇଲେ କୌଣସି ଡେଲିଭରି ଦେୟ ଦେବାକୁ ପଡ଼ିବ ନାହିଁ। ଜଣେ ଗ୍ରାହକ ଥରକେ ୧୦ କିଲୋଗ୍ରାମର ଚାଉଳ, ୧୦ କିଲୋଗ୍ରାମର ଅଟା ଓ ୨ କିଲୋଗ୍ରାମ ପରିମାଣର ଡାଲି ମଗାଇପାରିବେ। ସାମଗ୍ରୀ ପାଇଁ ଅନୁମତି ଦେବାର ୧୨ ଘଣ୍ଟା ମଧ୍ୟରେ ଘରେ ପହଞ୍ଚତ୍ବ। ଅନୁଗୋଳ ସହରର ୫ଟି ହୋମ୍ ଡେଲିଭରି ବିକ୍ରେତାଙ୍କୁ ଏହି କାର୍ଯ୍ୟ ପାଇଁ ନିୟୋଜିତ କରାଯାଇଛି। ଏହି ବୈଠକରେ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଅତୁଲ୍ୟ କୁମାର ଚମ୍ପତିରାୟ, ଅତିରିକ୍ତ ଜିଲାପାଳ (ରାଜସ୍ବ) ସନ୍ତୋଷ କୁମାର ପ୍ରଧାନ, ଅନୁଗୋଳ ଉପଜିଲାପାଳ ବାସୁଦେବ ଶତପଥୀଙ୍କ ସମେତ ବିଭିନ୍ନ ରାଶନ ବିକ୍ରେତାମାନେ ଯୋଗଦେଇଥିଲେ।