ନୂଆଦିଲ୍ଲୀ,୭ା୬: କରୋନା ସଙ୍କଟ ବେଳେ କେନ୍ଦ୍ର ସରକାର ଗରିବଙ୍କୁ ନଗଦ ଟଙ୍କା ଦେଉନାହାନ୍ତି। ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ)ଗୁଡ଼ିକୁ ମଧ୍ୟ ଆର୍ଥିକ ସହାୟତା ଦେବାକୁ ମନାକରୁଛନ୍ତି। ଏହା ଜରିଆରେ ସରକାର ଦେଶର ଅର୍ଥନୀତିକୁ ଧ୍ୱଂସ କରୁଛନ୍ତି। କେନ୍ଦ୍ରର ଏହି ଆଭିମୁଖ୍ୟ ‘ବିମୁଦ୍ରୀକରଣ-୨’ ବୋଲି କଂଗ୍ରେସ ନେତା ରାହୁଲ ଗାନ୍ଧୀ ସମାଲୋଚନା କରିଛନ୍ତି। ଓ୍ବାୟନାଡ୍ ଏମ୍ପି ରାହୁଲ ଗାନ୍ଧୀ ଶନିବାର ଟୁଇଟରରେ ଏକ ନ୍ୟୁଜ୍ ରିପୋର୍ଟ ଶେୟାର କରିଛନ୍ତି। ଭାରତର ଅର୍ଥନୀତି ଏବଂ ଏମ୍ଏସ୍ଏମ୍ଇ କ୍ଷେତ୍ରର ୟୁନିଟଗୁଡ଼ିକ ଉପରେ ମହାମାରୀ କରୋନା କିପରି ପ୍ରଭାବ ପକାଇବ ସେନେଇ ଉକ୍ତ ରିପୋର୍ଟରେ ଦର୍ଶାଯାଇଛି। ବର୍ତ୍ତମାନର ସଙ୍କଟରୁ ଗରିବ ଲୋକଙ୍କୁ ଉଦ୍ଧାର କରିବା ପାଇଁ ୧୦,୦୦୦ ଟଙ୍କା ଲେଖାଏ ଏବଂ ଏମ୍ଏସ୍ଏମ୍ଇ ଶିଳ୍ପକୁ ଆର୍ଥିକ ପ୍ରୋତ୍ସାହନ ଦେବା ଲାଗି ତୁରନ୍ତ ପ୍ୟାକେଜ ବ୍ୟବସ୍ଥା କରିବାକୁ ରାହୁଲ ଦାବି କରିଛନ୍ତି। ଏଥିସହ ବହୁ ସଂଖ୍ୟକ ଲୋକଙ୍କୁ ନିଯୁକ୍ତି ପ୍ରଦାନ କରି ସେମାନଙ୍କ ହାତକୁ ନଗଦ ଟଙ୍କା ଦିଆଗଲେ ଚାହିଦା ସୃଷ୍ଟି ହେବ ବୋଲି କଂଗ୍ରେସ ଏମ୍ଏସ୍ଏମ୍ଇ କ୍ଷେତ୍ର ପାଇଁ ପ୍ୟାକେଜ୍ ଦାବି କରିଆସୁଛି। ଲୋକଙ୍କୁ ନଗଦ ଅର୍ଥ ନ ଦେବା ସରକାରଙ୍କ ପକ୍ଷେ ଏକ ଅପରାଧ ସଦୃଶ ବୋଲି ଏହା ପୂର୍ବରୁ ରାହୁଲ କେନ୍ଦ୍ର ସରକାରଙ୍କୁ ସମାଲୋଚନା କରିଥିଲେ। କରୋନା ସଂକ୍ରମଣ ରୋକିବା ଲାଗି ସରକାର ଘୋଷଣା କରିଥିବା ଲକ୍ଡାଉନ୍ ବିଫଳ ହୋଇଥିବା ସେ କହିଥିଲେ।