ନୂଆଦିଲ୍ଲୀ,୧୪ା୫- କରୋନା ଭାଇରସ୍ ସାରା ବିଶ୍ୱର ଅର୍ଥନୀତିକୁ ଚରିଦେଇଛି। ଏହି ଭୂତାଣୁ ସଂକ୍ରମଣ ରୋକିବା ପାଇଁ ଭାରତ ସମେତ ବିଭିନ୍ନ ଦେଶରେ ଲକ୍ଡାଉନ୍ ଭଳି କଟକଣା ଜାରି କରାଯାଇଛି। ଏଥିଯୋଗୁ ଆର୍ଥିକ ଗତିବଧି ଏକପ୍ରକାର ଠପ୍ ହୋଇଯାଇଥିବାରୁ ଅର୍ଥନୀତି ଉପରେ କୋଭିଡ୍ର କୋରଡ଼ା ମାଡ଼ ପଡ଼ିଛି। ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ବଡ଼ଧରଣର ରିଲିଫ୍ ପ୍ୟାକେଜ ଘୋଷଣା କରିଛନ୍ତି। ନିକଟରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ପକ୍ଷରୁ ଘୋଷଣା କରାଯାଇଥିବା କେତେକ ପ୍ୟାକେଜ ସହ ଏହାକୁ ମିଶାଇଲେ ସମୁଦାୟ ପ୍ରାୟ ୨୦ ଲକ୍ଷ କୋଟି ଟଙ୍କା (୨୬୬ ବିଲିୟନ୍ ଡଲାର) ହେବ, ଯାହାକି ଦେଶର ମୋଟ ଘରୋଇ ଉତ୍ପାଦ (ଜିଡିପି)ର ୧୦%। ଏହି ମେଗା ପ୍ୟାକେଜ କ୍ଷୁଦ୍ର ବ୍ୟବସାୟିକ ସଂସ୍ଥା ଓ ଘରୋଇ ମାନୁଫାକ୍ଚରିଂ କ୍ଷେତ୍ରକୁ ବଳ ପ୍ରଦାନ ପୂର୍ବକ ଦେଶକୁ ଆମତ୍ନିର୍ଭରଶୀଳ କରିବ। ଏହାସହ ଭାରତର ଅର୍ଥନୀତିକୁ ଟ୍ରାକ୍କୁ ଫେରାଇ ଆଣିବାରେ ସହାୟକ ହେବ ବୋଲି ମନେକରାଯାଉଛି। ତେବେ କରୋନା ଭାଇରସ୍ ଯୋଗୁ କ୍ଷତିଗ୍ରସ୍ତ ହୋଇଥିବା କୌଣସି ରାଷ୍ଟ୍ର ଅଦ୍ୟାବଧି ଏତେ ବିପୁଳ ପରିମାଣର ଆର୍ଥିକ ପ୍ୟାକେଜ ଘୋଷଣା କରିନାହାନ୍ତି। ଭାରତରେ ଘୋଷଣା କରାଯାଇଥିବା ଏହି ଅର୍ଥରାଶିକୁ ବିଶ୍ୱର ବଡ଼ ପ୍ୟାକେଜଗୁଡ଼ିକ ମଧ୍ୟରୁ ଅନ୍ୟତମ ବୋଲି କୁହାଯାଉଛି। ତେବେ ପୂର୍ବ ଘୋଷଣାଗୁଡ଼ିକୁ ଦେଖିଲେ ସେସବୁ ଠିକ୍ ଭାବେ ଫଳ ଦେଉଥିବା ଜଣାପଡ଼ୁନାହିଁ। ଏବେ ଗରିବ, ଦାଦନ ଶ୍ରମିକ ଓ ଅନ୍ୟ ଅଣସଙ୍ଗଠିତ କ୍ଷେତ୍ରର କର୍ମଜୀବୀଙ୍କ ପାଇଁ ବ୍ୟବସ୍ଥା କରାଯାଇ ନ ଥିବାରୁ ବଡ଼ ପ୍ୟାକେଜ ସତ୍ତ୍ୱେ ଅର୍ଥନୀତି ସଜାଡ଼ିବା ପାଇଁ ଚ୍ୟାଲେଞ୍ଜ ବି କିଛି କମ୍ ନୁହେଁ।
ମିଳିଥିବା ସୂଚନାନୁସାରେ ଆମେରିକା ପକ୍ଷରୁ ଘୋଷଣା କରାଯାଇଥିବା ଆର୍ଥିକ ପ୍ୟାକେଜ ହେଉଛି ତା’ ଜିଡିପିର ୧୩%। ସେହିପରି ଜାପାନ ନିଜ ଜିଡିପିର ୨୧%ରୁ ଊର୍ଦ୍ଧ୍ୱ ପରିମାଣର ପ୍ୟାକେଜ ଘୋଷଣା କରିଛି। ଭାରତର ୨୦ ଲକ୍ଷ କୋଟିର ପ୍ୟାକେଜରେ ଗରିବଙ୍କୁ ମାଗଣାରେ ଖାଦ୍ୟଶସ୍ୟ ଏବଂ ଗରିବ ମହିଳା ଓ ବରିଷ୍ଠ ନାଗରିକଙ୍କୁ ଆର୍ଥିକ ସହାୟତା ପ୍ରଦାନ ପାଇଁ ମାର୍ଚ୍ଚରେ ଘୋଷଣା କରାଯାଇଥିବା ୧.୭ ଲକ୍ଷ କୋଟି ଟଙ୍କାର ପ୍ୟାକେଜ ଅନ୍ତର୍ଭୁକ୍ତ। ସେହିପରି ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)ର ଲିକ୍ୱିଡିଟି ପଦକ୍ଷେପ ଓ ସୁଧହାର ହ୍ରାସ ମଧ୍ୟ ଏଥିରେ ସାମିଲ ରହିଛି। ମାର୍ଚ୍ଚ ମାସର ପ୍ରୋତ୍ସାହନ ଜିଡିପିର ୦.୮% ହୋଇଥିବାବେଳେ ଆର୍ବିଆଇର ସୁଧହାର ହ୍ରାସ ଓ ଲିକ୍ୱିଡିଟି ବୃଦ୍ଧି ପାଇଁ ନିଆଯାଇଥିବା ପଦକ୍ଷେପକୁ ମିଶାଇ ଏହା ୩.୨% (୬.୫ ଲକ୍ଷ କୋଟି ଟଙ୍କା)ରେ ପହଞ୍ଚତ୍ଥିଲା। ପ୍ରଧାନମନ୍ତ୍ରୀ ସଦ୍ୟ ଘୋଷଣା କରିଥିବା ପ୍ୟାକେଜରୁ କେଉଁ କ୍ଷେତ୍ରକୁ କେତେ ମିଳିବ ତାହା ସ୍ପଷ୍ଟ କରି ନ ଥିଲେ। ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଏନେଇ ବୁଧବାର ବିସ୍ତୃତ ବିବରଣୀ ପ୍ରଦାନ କରିଛନ୍ତି। ତେବେ ପୂର୍ବ ଘୋଷଣାକୁ ବାଦ୍ ଦେଲେ ପ୍ରଧାନମନ୍ତ୍ରୀ ଘୋଷଣା କରିଥିବା ଆର୍ଥତ୍କ ପ୍ୟାକେଜର ଅତିରିକ୍ତ ପରିମାଣ ହେଉଛି ୧୨ ଲକ୍ଷ କୋଟି ଟଙ୍କା।
ଆକଳନ ଅନୁସାରେ ଲକ୍ଡାଉନ୍ ଯୋଗୁ ଏପ୍ରିଲରେ ୧୨.୨ କୋଟି ଲୋକ ନିଯୁକ୍ତି ହରାଇଛନ୍ତି। ସମୟକ୍ରମେ ଏହି ବେରୋଜଗାରି ହାର ବଢ଼ିବାରେ ଲାଗିଛି। ତେଣୁ ଭାରତର ଆମତ୍ନିର୍ଭରଶୀଳତା ଅର୍ଥନୀତି, ଭିତ୍ତିଭୂମି, ବ୍ୟବସ୍ଥା, ଜନସଂଖ୍ୟାର ପରିସଂଖ୍ୟାନ ଓ ଚାହିଦା (୫ଟି ସ୍ତମ୍ଭ) ଉପରେ ଛିଡ଼ା ହେବ ବୋଲି ପ୍ରଧାନମନ୍ତ୍ରୀ କହିଥିଲେ। ତେବେ ଏହି ଅର୍ଥର ବିନିଯୋଗ କରି ଦେଶକୁ ପୁଣିଥରେ ଛିଡ଼ା କରାଇବା ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ ବୋଲି କୁହାଯାଉଛି।