ନୂଆଦିଲ୍ଲୀ,୨୩।୪: କରୋନା ଭାଇରସ୍ ଲାଗି କ୍ଷତିଗ୍ରସ୍ତ ହୋଇଥିବା ଅର୍ଥ ବ୍ୟବସ୍ଥାରେ ଜୀବନ ସଞ୍ଚାର କରିବା ଲାଗି କେନ୍ଦ୍ର ସରକାର ପ୍ରୟାସ ଜାରି ରଖିଛନ୍ତି। ଟେକ୍ନୋଲୋଜିର ସହାୟତା ଦ୍ୱାରା ବିଭିନ୍ନ ସମସ୍ୟାକୁ କିଭଳି ସମାଧାନ କରାଯାଇପାରିବ ସେ ଦିଗରେ ସରକାର ଏବେ କାର୍ଯ୍ୟରତ ଅଛନ୍ତି। ସରକାରଙ୍କ ଏକ ଥିଙ୍କ ଟ୍ୟାଙ୍କ ଏ ସଂକ୍ରାନ୍ତ ପଲିସି ପେପର ଉପରେ ଏବେ କାର୍ଯ୍ୟ କରୁଛି। ଅର୍ଥ ବ୍ୟବସ୍ଥାକୁ ଶୀଘ୍ର ଟ୍ରାକ୍କୁ ଫେରାଇ ଆଣିବା ଲାଗି ଟେକ୍ନୋଲୋଜି ବ୍ୟବହାର ଉପରେ ଏହା ସରକାରଙ୍କୁ ପ୍ରସ୍ତାବ ଦେବ। ବିସ୍ତୃତ ଅଧ୍ୟୟନ ପରେ ପଲିସି ପେପରକୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ, ନୀତି ଆୟୋଗ ଏବଂ ବିଜ୍ଞାନ ଏବଂ ପ୍ରଯୁକ୍ତି ବିଭାଗକୁ ପ୍ରଦାନ କରାଯିବ। ବିଜ୍ଞାନ ଏବଂ ପ୍ରଯୁକ୍ତି ବିଦ୍ୟା ଅଧୀନ ସ୍ବୟଂଶାସିତ ସଂସ୍ଥା ଟେକ୍ନୋଲୋଜି, ଇନ୍ଫର୍ମେଶନ, ଫୋରକାଷ୍ଟିଂ ଆଣ୍ଡ ଆସେସମେଣ୍ଟ କାଉନସିଲ(ଟିଆଇଏଫ୍ଏସି) ଏ ଦିଗରେ ଏବେ କାର୍ଯ୍ୟକ୍ରମ ଜାରି ରଖିଛି। ସରକାରଙ୍କ ମେକ୍ ଇନ୍ ଇଣ୍ଡିଆକୁ ପ୍ରୋତ୍ସାହନ, ଦେଶୀୟ ଟେକ୍ନୋଲୋଜିର ବାଣିଜ୍ୟକରଣ, ଗ୍ରାମୀଣ କ୍ଷେତ୍ର ସ୍ବାସ୍ଥ୍ୟ ବ୍ୟବସ୍ଥାକୁ ଦୃଢୀକରଣ ଏବଂ ଆମଦାନୀ କମ୍ କରିବା ଉପରେ ଏବେ ଫୋକସ କରାଯାଉଛି।
ଆର୍ଟିଫିସିଆଲ ଇଣ୍ଟେଲିଜେନ୍ସ, ମେଶିନ ଲର୍ନିଂ, ଡାଟା ଆନାଲିଟିକ୍ସ ଭଳି ନୂଆ ଟେକ୍ନୋଲୋଜି ଉପରେ ଏହା ଏବେ କାମ କରୁଛି। ଏ ସଂକ୍ରାନ୍ତ ପେପରକୁ ଶୀଘ୍ର ପ୍ରଦାନ କରାଯିବ ବୋଲି ଟିଆଇଏଫ୍ଏସିର ନିର୍ଦ୍ଦେଶକ ପ୍ରଦୀପ ଶ୍ରୀବାସ୍ତବ କହିଛନ୍ତି। କରୋନା ଏବେ ସାରା ବିଶ୍ୱକୁ କବଳିତ କରି ରଖିଛି। ଅର୍ଥ ବ୍ୟବସ୍ଥା ଉପରେ ପ୍ରଭାବକୁ କମ୍ କରିବା ଦିଗରେ ସରକାର ଉଦ୍ୟମ କରୁଛନ୍ତି। ବିଭିନ୍ନ କ୍ଷେତ୍ରରେ ଟେକ୍ନୋଲୋଜି ହସ୍ତକ୍ଷେପ ଦ୍ୱାରା କରୋନାର ପ୍ରଭାବକୁ କମ୍ କରିବା ଦିଗରେ ଯୋଜନା ହାତକୁ ନିଆଯାଇଛି ବୋଲି ବିଜ୍ଞାନ ଏବଂ ପ୍ରଯୁକ୍ତି ବିଭାଗର ମୁଖପାତ୍ର ଆଶୁତୋଷ ଶର୍ମା କହିଛନ୍ତି।