ନୂଆଦିଲ୍ଲୀ,୪ା୨
ଦେଶର ଅର୍ଥ ବ୍ୟବସ୍ଥାରେ ବର୍ତ୍ତମାନ ମାନ୍ଦାବସ୍ଥା ନ ଥିବା ସରକାରଙ୍କ ପକ୍ଷରୁ ସୋମବାର ସୂଚନା ଦିଆଯାଇଛି। ୨୦୧୪-୧୯ ମଧ୍ୟରେ ଭାରତ ଜି-୨୦ ଦେଶ ସମୂହଙ୍କ ମଧ୍ୟରେ ସର୍ବୋଚ୍ଚ ହାରାହାରି ଅଭିବୃଦ୍ଧି ହାସଲ କରିବାକୁ ସକ୍ଷମ ହୋଇଛି। ଲୋକସଭାକୁ ଏକ ଲିଖିତ ଉତ୍ତରରେ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର କହିଛନ୍ତି ଯେ, ଅନ୍ତର୍ଜାତୀୟ ମୁଦ୍ରା ପାଣ୍ଠି ଆକଳନ ମୁତାବକ ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ଭାବେ ପରିଗଣିତ ହେବା ସହ ଅଭିବୃଦ୍ଧି ଧାରା ଜାରି ରଖିବ। ୨୦୨୦-୨୧ରେ ଦେଶର ଜିଡିପି ଅଭିବୃଦ୍ଧି ୫.୮% ରହିବ। ୨୦୨୧-୨୨ରେ ଅଭିବୃଦ୍ଧିରେ ଏହା ଚାଇନାକୁ ଟପିବାର ସମ୍ଭାବନା ରହିଥିବା ଠାକୁର କହିଛନ୍ତି।
ଜାତୀୟ ପରିସଂଖ୍ୟାନ କାର୍ଯ୍ୟାଳୟ(ଏନ୍ଏସ୍ଓ) ଡାଟା ଆଧାରରେ ସେ କହିଛନ୍ତି ଯେ, ଦେଶରେ ମାନ୍ଦାବସ୍ଥା ନାହିଁ। ୨୦୧୪-୧୯ ମଧ୍ୟରେ ଜିଡିପି ଅଭିବୃଦ୍ଧି ୭.୫% ରହିଛି। ଯାହା ଜି-୨୦ ଦେଶ ସମୂହଙ୍କ ମଧ୍ୟରେ ସର୍ବାଧିକ। ଦେଶର ଅର୍ଥ ବ୍ୟବସ୍ଥା ଏକ ଦୁଃସମୟ ଦେଇ ଗତି କରୁଥିବା ଅନ୍ତର୍ଜାତୀୟ ଏଜେନ୍ସିଗୁଡିକ କହିଥିବା ନେଇ ଏକ ପ୍ରଶ୍ନର ଉତ୍ତର ମଧ୍ୟ ସେ ରଖିଛନ୍ତି। ନଭେମ୍ବରରେ ଶିଳ୍ପ ଉତ୍ପାଦନ ସୂଚୀ (ଆଇଆଇପି)ରେ ଉନ୍ନତି ଆସିବା ସହ ୧.୮% ରହିଛି। ଏହା ସେପ୍ଟେମ୍ବରରେ ୪.୩% ଏବଂ ଅକ୍ଟୋବରରେ ୪% ହ୍ରାସ ହୋଇଥିଲା। ୨୦୧୯ ସେପ୍ଟେମ୍ବରରେ ଶିଳ୍ପ କ୍ଷେତ୍ର ଉତ୍ପାଦନ ୬ ବର୍ଷର ତଳକୁ ଖସିଯାଇଥିଲା। ସେହିଭଳି ଦେଶର ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ବିତ କରିବା ଏବଂ ସାମଗ୍ରିକ ନିବେଶ ପରିବେଶକୁ ଉନ୍ନତ କରିବା ଲାଗି ସରକାର ବିଭିନ୍ନ ପଦକ୍ଷେପ ଗ୍ରହଣ କରିଥିବା ଠାକୁର କହିଛନ୍ତି।