ଭବାନୀପାଟଣା,୨।୧୧(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣା ସଦର ବ୍ଲକ ଅନ୍ତର୍ଗତ ବୋର୍ଡା ଫାଣ୍ଡି କାନ୍ଦୁଲଝର ଗାଁ ନିକଟରୁ ଅର୍ଥ ଲଗାଣକାରୀ ସଂସ୍ଥାର ଏଜେଣ୍ଟମାନଙ୍କଠାରୁ ୫ ଲକ୍ଷ ଟଙ୍କା ଲୁଟ୍ ହୋଇଛି। ଦୁର୍ବୃତ୍ତମାନେ ମାରଣାସ୍ତ୍ର ଦେଖାଇ ଟଙ୍କା ଲୁଟିନେଇ ଫେରାର୍ ହୋଇଯାଇଥିବା ନେଇ ବୋର୍ଡା ଫାଣ୍ଡିରେ ଅଭିଯୋଗ ହୋଇଛି।
ସୂଚନାନୁଯାୟୀ, ବଲାଙ୍ଗୀର ଜିଲା ସିନ୍ଧେକେଲାରେ ଥିବା ଭାରତ ଫାଇନାନ୍ସିଆଲ ପ୍ରାଇଭେଟ୍ ଲିମିଟେଡ୍ କାର୍ଯ୍ୟାଳୟର ଏଜେଣ୍ଟ ରମାକାନ୍ତ ମହାନନ୍ଦ, ପରମାନନ୍ଦ ହରିଜନ, ଉଦୟ ନାଗ ଓ ସୁନୀଲ ବାଗ ଗୋଲାମୁଣ୍ଡା, ବ୍ଲକର ଉଛୁଲା, ଚୁରାଗାଁ, ଗୁଣ୍ଡୁରି, କର୍ଲା, କୁଟ୍ରାବାହାଲି, ଫଟାମୁଣ୍ଡା ଓ ମେରମହୁଲ ଅଞ୍ଚଳରୁ ବିଭିନ୍ନ ଏସଏଚ୍ଜିରୁ ଋଣର ମାସିକ କିସ୍ତି ଆଦାୟ କରି ଫେରୁଥିଲେ। ବୋର୍ଡା କାନ୍ଦୁଲଝର ନିକଟରେ ୧୦ରୁ ୧୫ ଜଣ ଦୁର୍ବୃତ୍ତ ହଠାତ୍ ସଂଘବଦ୍ଧ ଭାବେ ମାରଣାସ୍ତ୍ର ଦେଖାଇ ଆକ୍ରମଣ କରିବା ସହ ନଗଦ ୫,୧୫,୬୦୦ଟଙ୍କା, ମୋବାଇଲ ଫୋନ, ବାୟୋମେଟ୍ରିକ ମେଶିନ୍ ଓ ଏକ ଟାବଲେଟ୍ ଲୁଟି ନେଇଥିଲେ। ଆକ୍ରମଣରେ ଏଜେଣ୍ଟ ରମାକାନ୍ତଙ୍କ ଡାହାଣ ଗୋଡରେ ଆଘାତ ଲାଗିଥିବା ଜଣାପଡିଛି। ସେ ବୋର୍ଡା ସିଏଚସିରେ ଚିକିତ୍ସାଧୀନ ଅଛନ୍ତି।