ଭୁବନେଶ୍ୱର, ୬।୧୦(ସ୍ପୋଟର୍ସ ବ୍ୟୁରୋ)- ଓଡ଼ିଆ ହକି ତାରକା ତଥା ଅଭିଜ୍ଞ ଭାରତୀୟ ଡିଫେଣ୍ଡର ବୀରେନ୍ଦ୍ର ଲାକ୍ରା ୟୁରୋପ ଗସ୍ତ ସାରି ପ୍ରତ୍ୟାବର୍ତ୍ତନ କରିଛନ୍ତି। ଶନିବାର ସକାଳେ ସେ ବିଜୁ ପଟ୍ଟନାୟକ ବିମାନବନ୍ଦରରେ ପହଞ୍ଚିଛନ୍ତି। ସେ ଆଗକୁ ଆୟୋଜନ ହେବାକୁ ଥିବା ଅଲିମ୍ପିକ୍ସ କ୍ୱାଲିଫାୟର ପାଇଁ ପ୍ରସ୍ତୁତି ଆରମ୍ଭ କରିବେ। ଏହି ୟୁରୋପ ଗସ୍ତ ବେଶ୍ ଭଲ ଥିଲା ଓ ବିଶ୍ୱସ୍ତରୀୟ ଅଭିଜ୍ଞତା ନେଇ ଭାରତୀୟ ଦଳ ପ୍ରତ୍ୟାବର୍ତ୍ତନ କରିଛି ବୋଲି ବୀରେନ୍ଦ୍ର କହିଛନ୍ତି। ପ୍ରଥମଥର ପାଇଁ ଏମିତି ହୋଇଛି ଯେ, ଭାରତ କୌଣସି ଗସ୍ତରେ ଯାଇ ଗୋଟିଏ ହେଲେ ବି ମ୍ୟାଚ ହାରିନାହିଁ। ତେବେ ଦଳରେ ଥିବା କେତୋଟି ତ୍ରୁଟି ସୁଧାରିବା ଆମ ପାଇଁ ଜରୁରୀ ହୋଇପଡିଛି। ପେନାଲ୍ଟି କର୍ନର ସୃଷ୍ଟି କରିବାରେ ଆମକୁ ଆହୁରି ଅଧିକ ଧ୍ୟାନ ଦେବାକୁ ହେବ। ଡ୍ରାଗ ଫ୍ଲିକର ରୂପିନ୍ଦର ପାଲ ସିଂ, ଅମିତ ରୋହିଦାସ, ହରମନପ୍ରୀତ ସିଂ ଓ ବରୁଣ କୁମାର ଏହି ଗସ୍ତରେ ଉଚ୍ଚକୋଟୀର ପ୍ରଦର୍ଶନ କରିଛନ୍ତି। ଏହି ବିଭାଗରେ ଆମକୁ ଆହୁରି ଅଧିକ ଭଲ ପ୍ରଦର୍ଶନ କରିବାକୁ ହେବ। ଆଗକୁ ଆୟୋଜନ ହେବାକୁ ଥିବା ଅଲିମ୍ପିକ୍ସ କ୍ୱାଲିଫାୟର ନିଶ୍ଚିତ ଭାବେ ଏକ ବଡ଼ ଚ୍ୟାଲେଞ୍ଜ୍। ଆମକୁ ଏଥିରେ ଶତପ୍ରତିଶତ ପ୍ରଦର୍ଶନ କରି ଭଲ ଖେଳିବାକୁ ହେବ। ପ୍ରତିପକ୍ଷ ଦଳକୁ ଆଦୌ ହେୟ ମନେ କରିହେବ ନାହିଁ। ର଼୍ୟାଙ୍କିଙ୍ଗ୍କୁ ନେଇ କୌଣସି ଦଳର ଦକ୍ଷତା ମାପି ହେବନାହିଁ। ନିଜର ତ୍ରୁଟି ସୁଧାରି ପ୍ରତିପକ୍ଷ ଦଳର ଦୁର୍ବଳତାରୁ ଫାଇଦା ଉଠାଇ ମ୍ୟାଚ୍କୁ ଆଗକୁ ନେଲେ ଆମେ ଫାଇଦାରେ ରହିବୁ। ଗତ ବିଶ୍ୱକପ୍ରେ ବେଲଜିୟମ ବିପକ୍ଷରେ ଭାରତ କଡ଼ା ସଂଘର୍ଷର ସମ୍ମୁଖୀନ ହୋଇଥିଲା। ତେବେ ଏହି ଗସ୍ତରେ ଭାରତ ଅତି ସହଜରେ ବେଲଜିୟମକୁ ହରାଇବାରେ ସକ୍ଷମ ହୋଇଛି। ବେଲଜିୟମ ଦଳରେ ଉଭୟ ଅଭିଜ୍ଞ ଓ ଯୁବ ଖେଳାଳି ରହିଥିଲେ। ସେମାନେ ମଧ୍ୟ ଯୁବ ଖେଳାଳିଙ୍କୁ ନେଇ ପରୀକ୍ଷା ନିରୀକ୍ଷା କରିଥିଲେ। ଆମ ଦଳରେ ମଧ୍ୟ କେତେକ ଯୁବ ଖେଳାଳି ରହିଥିଲେ। ଏହି ଗସ୍ତରେ ବେଲଜିୟମକୁ ହରାଇବା ଆମ ପାଇଁ ଆଦୌ ସହଜ ନ ଥିଲା। ତେବେ ଆମେ ଆରମ୍ଭରୁ ଗୋଲ ଦେଇ ଚାପ ପ୍ରୟୋଗ କରିବାରେ ସଫଳ ହୋଇଥିଲୁ। ଅଲିମ୍ପିକ୍ସ କ୍ୱାଲିଫାୟର ପୂର୍ବରୁ ଏହି ଗସ୍ତ ବେଶ୍ କାମରେ ଆସିଛି। ଆମ ପ୍ରସ୍ତୁତିରେ ଏହା ସହାୟ ହେବ। ଏବେ କିନ୍ତୁ ଫିଟ୍ନେସ ଉପରେ ଧ୍ୟାନ ଦେବୁ। ନୂଆ କ୍ୟାମ୍ପରେ ନୂଆ ରଣନୀତି ନେଇ ଆଲୋଚନା ହେବ। ଅଲିମ୍ପିକ୍ସ କ୍ୱାଲିଫାୟରରେ ଆମେ ଭଲ ପ୍ରଦର୍ଶନ କରିବୁ ଓ ୨୦୨୦ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବୁ ବୋଲି ବୀରେନ୍ଦ୍ର କହିଛନ୍ତି। ସ୍ଥାନୀୟ କଳିଙ୍ଗ ଷ୍ଟାଡିୟମରେ ଭାରତୀୟ ପୁରୁଷ ଓ ମହିଳା ଦଳ ଅଲିମ୍ପିକ୍ସ କ୍ୱାଲିଫାୟର ମ୍ୟାଚ ଖେଳିବେ। ନଭେମ୍ବର ୧ ଓ ୨ ତାରିଖରେ ଏହି ମ୍ୟାଚ୍ଗୁଡିକ ଆୟୋଜନ ହେବ। ଭାରତୀୟ ପୁରୁଷ ଦଳ ରୁଷିଆ ଓ ମହିଳା ଦଳ ଆମେରିକାକୁ ଭେଟିବ।