ନୂଆଦିଲ୍ଲୀ, ୧୫।୭: ଟୋକିଓ ଅଲିମ୍ପିକ୍ସ ପାଇଁ ଭାରତୀୟ ହକି ଦଳରେ ଆଉ ୨ ଜଣ(ମହିଳା ଓ ପୁରୁଷ) ଲେଖାଏ ଖେଳାଳିଙ୍କୁ ସାମିଲ କରାଯାଇଛି। ଏହି ପରିପ୍ରେକ୍ଷୀରେ ଓଡ଼ିଶାର ଅଭିଜ୍ଞ ମିଡ୍ଫିଲ୍ଡର ନମିତା ଟପ୍ପୋ ଦଳରେ ସାମିଲ ହୋଇଛନ୍ତି। ପୂର୍ବରୁ ଓଡ଼ିଶାର କେବଳ ଦୀପ୍ ଗ୍ରେସ୍ ଏକ୍କା ଭାରତୀୟ ଦଳର ସଦସ୍ୟା ଥିଲେ। ନମିତାଙ୍କ ସାମିଲ ଫଳରେ ଭାରତୀୟ ଓଡ଼ିଆ ଖେଳାଳିଙ୍କ ସଂଖ୍ୟା ୨ରେ ପହଞ୍ଚତ୍ଛି। ତାଙ୍କ ସମେତ ରୀନା ଖୋଖର ମଧ୍ୟ ମହିଳା ଦଳରେ ସ୍ଥାନ ପାଇଛନ୍ତି। ସେହିପରି ପୁରୁଷ ଦଳରେ ଡିଫେଣ୍ଡର ବରୁଣ କୁମାର ଏବଂ ମିଡ୍ ଫିଲ୍ଡର ସିମରନଜିତ ସିଂଙ୍କୁ ସାମିଲ କରାଯାଇଛି। କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ଅଧିକ ଖେଳାଳିଙ୍କୁ ପ୍ରସ୍ତୁତ କରି ରଖିବାକୁ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ପକ୍ଷରୁ ଅନୁମତି ଦିଆଯାଇଛି। ଫଳରେ ହକି ଇଣ୍ଡିଆ ପକ୍ଷରୁ ଘୋଷିତ ୧୬ ଜଣିଆ ଦଳ ଏବେ ୧୮ ଜଣିଆରେ ପରିଣତ ହୋଇଛି।
ଟୋକିଓ ୨୦୨୦ ପାଇଁ ଆଇଓସିର ସ୍ବତନ୍ତ୍ର ଗାଇଡ୍ଲାଇନ ଅନୁସାରେ ଅତିରିକ୍ତଭାବେ ଦଳରେ ସାମିଲ ହୋଇଥିବା ଖେଳାଳିମାନେ ପ୍ରତି ମ୍ୟାଚ ପାଇଁ ଖେଳାଳି ଚୟନ ସମୟରେ ଉପଲବ୍ଧ ହୋଇପାରିବେ। ସାଧାରଣତଃ ଅଲିମ୍ପିକ୍ସ ପାଇଁ ପ୍ରତି ଦଳରେ ୧୬ ଖେଳାଳିଙ୍କୁ ଅନୁମତି ମିଳିଥାଏ। ମାତ୍ର ଏଥର ମହାମାରୀକୁ ଆଖି ଆଗରେ ରଖି ଆଇଓସି ନିୟମରେ ପରିବର୍ତ୍ତନ କରି ପ୍ରତିଯୋଗିତାରେ ଭାଗ ନେବାକୁ ଯାଉଥିବା ସବୁ ଦଳରେ ଅତିରିକ୍ତ ୨ ଖେଳାଳିଙ୍କୁ ସାମିଲ ପାଇଁ ଅନୁମତି ଦେଇଛି। ହକି, ଫୁଟ୍ବଲ, ହ୍ୟାଣ୍ଡବଲ, ରଗ୍ବୀ ଓ ଓ୍ବାଟରପୋଲୋ କ୍ରୀଡ଼ାରେ ବଦଳ ଖେଳାଳିଙ୍କୁ ଆଇଓସି ସବୁଜ ସଙ୍କେତ ଦେଖାଇଛି। ପୂର୍ବ ଅଲିମ୍ପିକ୍ସଗୁଡ଼ିକରେ ଦଳ ସହ ଯାତ୍ରା କରିଥିବା ଷ୍ଟାଣ୍ଡବାଇ ଖେଳାଳିମାନେ ୧୬ ଜଣିଆ ଦଳରୁ କେହି ଆହତ ହେଲେ ସୁଯୋଗ ପାଇଥାନ୍ତି। ଆଇଓସି ଏଥର ୧୮ ଜଣିଆ ଖେଳାଳିଙ୍କୁ ଅନୁମତି ଦେଇଥିଲେ ହେଁ ମ୍ୟାଚ ପାଇଁ ୧୬ ଖେଳାଳିଙ୍କ ତାଲିକା ହିଁ ଦିଆଯାଇ ପାରିବ। ବରୁଣ, ସିମରନଜିତ ଓ ରୀନା ଏଥର ଅଲିମ୍ପିକ୍ସ ପଦାର୍ପଣ କରିବାକୁ ଯାଉଥିବାବେଳେ ନମିତାଙ୍କ ପାଇଁ ଏହା ଦ୍ୱିତୀୟ ଅଲିମ୍ପିକ୍ସ ହେବ। ଦୀର୍ଘ ୩୬ ବର୍ଷ ବ୍ୟବଧାନରେ ରିଓ ଅଲିମ୍ପିକ୍ସକୁ ଯୋଗ୍ୟତା ଅର୍ଜନ କରିଥିବା ଭାରତୀୟ ଦଳର ସେ ସଦସ୍ୟା ଥିଲେ। ଡ୍ରାଗ୍ଫ୍ଲିକର ବରୁଣ ୨୦୧୬ ଜୁନିୟର ବିଶ୍ୱକପ ବିଜେତା ଭାରତୀୟ ହକି ଦଳର ସଦସ୍ୟ ଥିଲେ। ପେନାଲ୍ଟି କର୍ନର ସମୟରେ ହରମନପ୍ରୀତ ସିଂ, ରୂପିନ୍ଦରପାଲ ସିଂ, ଅମିତ ରୋହିଦାସଙ୍କ ସହିତ ବରୁଣ ଦଳକୁ ସହାୟକ ହୋଇପାରିବେ। ସିମରନଜିତ ସିଂଙ୍କ ଉପସ୍ଥିତି ଭାରତୀୟ ମିଡ୍ଫିଲ୍ଡ ବିଭାଗକୁ ଦୃଢ଼ କରିବ। ଜଳନ୍ଧରସ୍ଥିତ ସୁରଜିତ ସିଂ ହକି ଏକାଡେମୀରେ ପ୍ରଶିକ୍ଷଣପ୍ରାପ୍ତ ସିମରନଜିତ ମଧ୍ୟ ୨୦୧୬ ଜୁନିୟର ବିଶ୍ୱକପ ବିଜୟୀ ଭାରତୀୟ ଦଳର ସଦସ୍ୟ ଥିଲେ।