ଟୋକିଓ,୩୦।୧୦(ପି.ଟି.)- ପୂର୍ବତନ ବିଶ୍ୱ ଚାମ୍ପିୟନଶିପ୍ ବ୍ରୋଞ୍ଜ ପଦକଧାରୀ ଶିବ ଥପ୍ପା (୬୩ କେଜି) ଓ ପୂଜାରାଣୀ (୭୫ କେଜି) ଏଠାରେ ଚାଲିଥିବା ଅଲିମ୍ପିକ୍ ଟେଷ୍ଟ ବକ୍ସିଂ ଇଭେଣ୍ଟ ଫାଇନାଲରେ ପ୍ରବେଶ କରିଛନ୍ତି। ଅନ୍ୟପକ୍ଷରେ ଆଉ ଦୁଇ ବକ୍ସରଙ୍କୁ ବ୍ରୋଞ୍ଜ ପଦକରେ ସନ୍ତୁଷ୍ଟ ହେବାକୁ ପଡ଼ିଛି। ୪ ଥର ଏସିଆନ୍ ପଦକଧାରୀ ଶିବ କଡ଼ା ସଂଘର୍ଷପୂର୍ଣ୍ଣ ସେମିଫାଇନାଲରେ ଜାପାନର ଦାଇସୁକେ ନାରିମାତ୍ସୁଙ୍କୁ ହରାଇ ଦେଇଛନ୍ତି। ପୂର୍ବତନ ଏସିଆନ କ୍ରୀଡ଼ା ବ୍ରୋଞ୍ଜ ପଦକ ବିଜେତା ରାଣୀ ବ୍ରାଜିଲର ବେଟରିଜ ସୋଆରେସ୍ଙ୍କୁ ଏକତରଫା ବାଉଟ୍ରେ ଧୂଳି ଚଟାଇଛନ୍ତି। ରାଣୀ ଚଳିତ ବର୍ଷ ଏସିଆନ୍ ଚାମ୍ପିୟନଶିପ୍ରେ ରୌପ୍ୟ ପଦକ ଜିତିଥିଲେ। ପୂର୍ବତନ ଜୁନିୟର ବିଶ୍ୱ ଚାମ୍ପିୟନ ନିଖାତ ଜରିନ (୫୧ କେଜି) ଓ ବାଲିମ୍ପୁଆ (୭୫ କେଜି) ଯଥାକ୍ରମେ ନିଜ ନିଜ ସେମିଫାଇନାଲରେ ପରାଜୟ ବରଣ କରିଛନ୍ତି। ଏହି ଦୁଇ ବର୍ଗରେ ଖୁବ୍ କମ୍ ସଂଖ୍ୟାରେ ବକ୍ସର ଭାଗନେଇଥିବାରୁ ଉଭୟ ବକ୍ସର ବିନା କୌଣସି ମ୍ୟାଚ୍ରେ ସେମିଫାଇନାଲରେ ପ୍ରବେଶ କରିଥିଲେ। ଜରିନଙ୍କୁ ଜାପାନର ସାନା କାଓ୍ବାନୋ ହରାଇଥିଲାବେଳେ ବାଲିମ୍ପୁଆ ଘରୋଇ ଫେଭରାଇଟ୍ ୟୁଇତୋ ମୋରଓ୍ବାକିଙ୍କଠାରୁ ପରାସ୍ତ ହୋଇଛନ୍ତି।
