ଟୋକିଓ,୧୭।୮(ପି.ଟି.)- ଭାରତୀୟ ହକି ମହିଳା ଦଳ ବିଜୟ ସହ ଏଠାରେ ଚାଲିଥିବା ଅଲିମ୍ପିକ୍ ଟେଷ୍ଟ ଇଭେଣ୍ଟ ଆରମ୍ଭ କରିଛି। ଶନିବାର ଖେଳାଯାଇଥିବା ମ୍ୟାଚ୍ରେ ଭାରତ ୨-୧ ଗୋଲରେ ଆୟୋଜକ ଜାପାନକୁ ହରାଇ ଦେଇଛି। ବିଜୟୀ ଦଳ ପାଇଁ ପେନାଲ୍ଟି କର୍ନର ସ୍ପେଶାଲିଷ୍ଟ ଗୁର୍ଜିତ କୌର ଡବଲ ଗୋଲ ଦେଇଥିଲେ।
ଗୁର୍ଜିତ କୌରଙ୍କ ଯୋଗୁ ଏସିଆନ୍ ଗେମ୍ସ ରୌପ୍ୟ ପଦକ ବିଜେତା ଭାରତ ମ୍ୟାଚ୍ର ୯ମ ମିନିଟ୍ରେ ଖାତା ଖୋଲିଥିଲା। ଜବାବରେ ୧୬ତମ ମିନିଟ୍ରେ ଘରୋଇ ଖେଳାଳି ଆକି ମିତ୍ସୁହାସି ଗୋଲ ଦେଇ ମ୍ୟାଚ୍କୁ ବରାବର ସ୍ଥିତିକୁ ଆଣିଥିଲେ। ଏହି ସ୍କୋର ଲାଇନ ପ୍ରଥମାର୍ଦ୍ଧ ପର୍ଯ୍ୟନ୍ତ ବଳବତ୍ତର ରହିଥିଲା। ଦ୍ୱିତୀୟାର୍ଦ୍ଧ ତଥା ୩୫ତମ ମିନିଟ୍ରେ ଆଉ ଏକ ପେନାଲ୍ଟି କର୍ନରକୁ ଗୁର୍ଜିତ ଗୋଲରେ ପରିଣତ କରି ଦଳକୁ ୨-୧ରେ ଆଗୁଆ କରାଇଥିଲେ। ଏହାପରେ ଜାପାନ ଦଳ ପକ୍ଷରୁ ବାରମ୍ବାର ଉଦ୍ୟମ ହୋଇଥିଲେ ମଧ୍ୟ କୌଣସି ଖେଳାଳି ଗୋଲ ଦେବାରେ ସଫଳ ହୋଇ ନ ଥିଲେ। ଉଭୟ ଦଳ ଅଲିମ୍ପିକ୍ ଗେମ୍ସ ନିୟମ ଅନୁଯାୟୀ ମ୍ୟାଚ୍ରେ ୧୬ଜଣ ଲେଖାଏ ଖେଳାଳିଙ୍କୁ ଖେଳାଇଥିଲେ।