ଟୋକିଓ,୧୮।୮(ପି.ଟି.): ଏଠାରେ ଆରମ୍ଭ ହୋଇଥିବା ଅଲିମ୍ପିକ୍ ହକି ଟେଷ୍ଟ ଇଭେଣ୍ଟର ଏକ ରାଉଣ୍ଡ- ରବିନ ଲିଗ୍ ମ୍ୟାଚ୍ରେ ଭାରତୀୟ ମହିଳା ଦଳ ଦମ୍ଦାର ଖେଳ ପ୍ରଦର୍ଶନ କରି ଶକ୍ତିଶାଳୀ ଅଷ୍ଟ୍ରେଲିଆ ବିପକ୍ଷରେ ୨-୨ ଗୋଲରେ ମ୍ୟାଚ୍ ଡ୍ର’ ରଖିଛି। ରବିବାର ଅନୁଷ୍ଠିତ ଏହି ମ୍ୟାଚ୍ରେ ଭାରତ ପଛରେ ଥିଲେ ମଧ୍ୟ ପ୍ରତ୍ୟାବର୍ତ୍ତନ କରି ଦୁଇଟି ଗୋଲ ଦେଇ ମ୍ୟାଚ୍ ଡ୍ର ରଖିବାକୁ ସକ୍ଷମ ହୋଇଛି। ଏହି ମ୍ୟାଚ୍ରେ ଜବରଦସ୍ତ ସଂଘର୍ଷ ଦେଖିବାକୁ ମିଳିଥିଲା। ଏହା ପୂର୍ବରୁ ପ୍ରଥମ ମ୍ୟାଚ୍ରେ ଭାରତ ଶନିବାର ଆୟୋଜକ ଜାପାନକୁ ୨-୧ ଗୋଲରେ ପରାସ୍ତ କରି ଅଭିଯାନ ଆରମ୍ଭ କରିଥିଲା।
ମ୍ୟାଚ୍ର ୧୪ତମ ମିନିଟ୍ରେ ଅଷ୍ଟ୍ରେଲିଆ ତରଫରୁ କେଟଲିନ୍ ନୋବ୍ସ ପ୍ରଥମ ଗୋଲ ଦେଇଥିଲେ। ଏହାପରେ ଭାରତୀୟ ଖେଳାଳିମାନେ ପ୍ରତ୍ୟାବର୍ତ୍ତନ କରିଥିଲେ। ଭାରତ ପକ୍ଷରୁ ବନ୍ଦନା କାଟାରିୟା ୩୬ତମ ମିନିଟ୍ରେ ଗୋଲ ଦେଇ ମ୍ୟାଚ୍କୁ ସମାନ ସ୍ଥିତିକୁ ଆଣିଥିଲେ। ଗ୍ରେସ ଷ୍ଟିଓ୍ବାର୍ଟ ୪୩ତମ ମିନିଟ୍ରେ ଅଷ୍ଟ୍ରେଲିଆ ତରଫରୁ ଦ୍ୱିତୀୟ ଗୋଲ ସ୍କୋର କରିଥିଲେ ଓ ଅଷ୍ଟ୍ରେଲିଆକୁ ୨-୧ରେ ଅଗ୍ରଣୀ କରାଇଥିଲେ। ତେବେ ଗୁରଜିତ କୌର ୫୯ତମ ମିନିଟ୍ରେ ଗୁରଜିତ କୌର ଗୋଲ ଦେଇ ମ୍ୟାଚ୍କୁ ୨-୨ ଗୋଲ ସମାନ ସ୍ତରକୁ ଆଣିଥିଲେ। ବିଶ୍ୱ ର଼୍ୟାଙ୍କିଙ୍ଗ୍ର ଦଶମ ସ୍ଥାନରେ ଥିବା ଭାରତ ଆରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା। ପ୍ରଥମେ ଉଭୟ ଦଳ ପେନାଲ୍ଟି କର୍ନର ପାଇଥିଲେ ଏହାର ଫାଇଦା ଉଠାଇପାରି ନ ଥିଲେ। ଏହାପରେ ୧୪ତମ ମିନିଟ୍ରେ ମିଳିଥିବା ଏକ ପେନାଲ୍ଟି କର୍ନରକୁ ଗୋଲରେ ପରଣିତ କରିଥିଲେ ନୋବ୍ସ। ବିଶ୍ୱର ୨ ନମ୍ବର ଦଳ ଅଷ୍ଟ୍ରେଲିଆ ଦ୍ୱିତୀୟ କ୍ୱାର୍ଟରରେ ପ୍ରଭାବ ବିସ୍ତାର କରି ଖେଳିଥିଲା। ଏକାଧିକ ପେନାଲ୍ଟି ସୁଯୋଗ ପାଇଥିଲେ ମଧ୍ୟ ଭାରତୀୟ ଡିଫେନ୍ସକୁ ଭେଦ କରି ନ ପାରି ଗୋଲ ଦେବାର ସଫଳ ହୋଇ ନ ଥିଲା। ତୃତୀୟ କ୍ୱାର୍ଟରରେ ମଧ୍ୟ ଅଷ୍ଟ୍ରେଲିଆ ଆଧିପତ୍ୟ ଜାହିର କରିଥିଲା। ଭାରତୀୟ ଗୋଲ କିପର ସବିତା ମଧ୍ୟ ଅଷ୍ଟ୍ରେଲିଆର କେତୋଟି ଆକ୍ରମଣକୁ ପ୍ରତିହତ କରିଥିଲେ। ୩୬ତମ ମିନିଟ୍ରେ ବନ୍ଦନା ଏକ ସୁନ୍ଦର ଗୋଲ ଦେଇ ମ୍ୟାଚ୍କୁ ୧-୧ ଗୋଲ ସମାନସ୍ତରକୁ ଆଣିଥିଲେ। ତେବେ ଏହା ବେଶି ସମୟ ତିଷ୍ଠି ନ ଥିଲା। ଶେଷରେ ଷ୍ଟିଓ୍ବାର୍ଟ ୪୩ତମ ମିନିଟ୍ରେ ଗୋଲ ଦେଇ ଦଳକୁ ୨-୧ରେ ଅଗ୍ରଣୀ କରାଇଥିଲେ। ଏହାପରେ ପ୍ରତ୍ୟାବର୍ତ୍ତନ କରିବା ସେତେଟା ସହଜ ନ ଥିଲେ ମଧ୍ୟ ଭାରତୀୟ ଖେଳାଳିମାନେ ବେଶ୍ ଉଚ୍ଚକୋଟୀର ପ୍ରଦର୍ଶନ କରିଥିଲେ। ମ୍ୟାଚ୍ ଶେଷ ହେବାକୁ ଆଉ ମାତ୍ର ୨ ମିନିଟ ବାକିଥିବା ବେଳେ ମଳିଥିବା ପେନାଲ୍ଟି କର୍ନରକୁ ଡ୍ରାଗ୍ ଫ୍ଲିକର ଗୁରଜିତ କୌର ଗୋଲରେ ପରିଣତ କରି ମ୍ୟାଚ୍କୁ ସମାନ ସ୍ଥିତିକୁ ଆଣିଥିଲେ। ଭାରତ ତା’ର ତୃତୀୟ ତଥା ଶେଷ ରାଉଣ୍ଡ- ରବିନ ମ୍ୟାଚ୍ରେ ଚାଇନାକୁ ମଙ୍ଗଳବାର ଭେଟିବ।