ବାଲୁଗାଁ ,୨୯।୧୦(ଡି.ଏନ.ଏ.)-ଖୋର୍ଦ୍ଧା ଜିଲା ବାଲୁଗାଁ ବଜାରସ୍ଥିତ ଏକ ଜୁଏଲେରୀ ଦୋକାନରୁ ଗତ ଶନିବାର ମଧ୍ୟାହ୍ନରେ ଅଳଙ୍କାର କିଣିବା ବାହାନାରେ ୪ ମହିଳା ରୁପା ଗହଣା ଲୁଟି ନେଇଥିଲେ । ଏ ନେଇ ସିସିଟିଭ ଫୁଟେଜରୁ ଉତ୍ତୋଳିତ ଚିତ୍ରରୁ ଜଣାପଡିଛି। ରବିବାର ପୁନର୍ବାର ସେମାନଙ୍କ ମଧ୍ୟରୁ ଦୁଇ ଜଣ ମହିଳା ଉକ୍ତ ଦୋକାନକୁ ଆସି ଲୁଟିବା ପାଇଁ ଉଦ୍ୟମ କରୁଥିବା ବେଳେ ଧରାପଡ଼ିଛନ୍ତି । ସେମାନେ ନଈରୀ ଗ୍ରାମର ବୋଲି ଜଣାପଡିଛି। ସେମାନଙ୍କଠାରୁ ୩ହଳ ରୁପା ପାଉଁଜି ପୋଲିସ ଜବତ କରିଛି । ଏହି ଘଟଣା ବାଲୁଗାଁ ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି ।
ଖବର ନେବାରେ ଜଣାଯାଇଛି ଶନିବାର ମଧ୍ୟାହ୍ନ ପ୍ରାୟ ୨ଟାରେ ଏସ୍ବି ଜୁଏଲାରୀ ଦୋକାନକୁ ୪ଜଣ ମହିଳା ଅଳଙ୍କାର କିଣିବା ନିମନ୍ତେ ଆସିଥିଲେ । ସେହି ସମୟରେ ଦୋକାନ ଭିଡ଼ ରହିଥିଲା, ଏହାର ସୁଯୋଗ ନେଇ ମହିଳାମାନେ ରୁପା ପାଉଁଜି ଦେଖାଇବା ପାଇଁ ମାଲିକଙ୍କୁ କହିଥିଲେ । ଦୀର୍ଘ ଦେଢ଼ ଘଣ୍ଟା ଧରି ମହିଳାମାନେ ଦୋକାନରେ ବିଭିନ୍ନ ଅଳଙ୍କାର ଘାଣ୍ଟି ସମୟ ବିତାଇଥିଲେ । ଇତିମଧ୍ୟରେ କିଛି ହଳ ରୁପା ପାଉଁଜି ସେମାନେ ଲୁଟି ନେବାରେ ସଫଳ ହୋଇଥିଲେ । ସେମାନେ ଯିବା ପରେ ମାଲିକ ପାଉଁଜି ବାକ୍ସକୁ ତଦାରଖ କରିବାରେ ଚୋରି ଯାଇଥିବା ଜାଣିବାକୁ ପାଇଥିଲେ । ପରେ ଦୋକାନରେ ଲାଗିଥିବା ସିସିଟିଭି ଫୁଟେଜ୍କୁ ଅନୁଧ୍ୟାନ କରିବାରେ ଲୁଟ୍ ହୋଇଥିବା ସ୍ପଷ୍ଟ ଭାବେ ଜାଣିପାରିଥିଲେ । ଏପରିସ୍ଥଳେ ରବିବାର ମଧ୍ୟାହ୍ନରେ ସେମାନଙ୍କ ମଧ୍ୟରୁ ଦୁଇ ମହିଳା ପୁନର୍ବାର ଅଳଙ୍କାର କିଣିବା ପାଇଁ ଉକ୍ତ ଦୋକାନକୁ ଆସିଥିଲେ । ମାଲିକ ସେମାନଙ୍କୁ ଚିହ୍ନିପାରି ସଙ୍ଗେ ସଙ୍ଗେ ବାଲୁଗାଁ ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚତ୍ ସିସିଟିଭି ଫୁଟେଜ୍ ତଦନ୍ତ କରିବା ପରେ ସମ୍ପୃକ୍ତ ମହିଳା ଦ୍ୱୟଙ୍କୁ ଥାନାରେ ଅଟକ ରଖି ପଚରାଉଚୁରା କରିଥିଲେ । ସେମାନଙ୍କଠାରୁ ପୋଲିସ ୩ହଳ ଚୋରି ପାଉଁଜି ଜବତ କରିବାରେ ସକ୍ଷମ ହୋଇଥିଲା । ତେବେ ଏହି ଘଟଣାରେ ଅନ୍ୟ ଦୁଇ ଅଭିଯୁକ୍ତ ମହିଳା ଫେରାର ଥିବା ବେଳେ ସେମାନଙ୍କୁ ଖୋଜି ପାଇବାରେ ପୋଲିସ୍ ବିଫଳ ହୋଇଛି । ତେବେ ଫେରାର ଅଭିଯୁକ୍ତଙ୍କୁ ଚିହ୍ନଟ ନିମନ୍ତେ ପୋଲିସକୁ ସହଯୋଗ କରିବା ପାଇଁ ଧାରା ୪୧ ଅନୁଯାୟୀ ଗିରଫ ମହିଳା ଦ୍ୱୟଙ୍କୁ ପୋଲିସ୍ ବ୍ୟକ୍ତିଗତ ମୁଚାଲିକାରେ ଛାଡ଼ିଦେଇଥିବା ଜଣାଯାଇଛି । ତଦନ୍ତରେ ଅସହଯୋଗ କଲେ ଅଭିଯୁକ୍ତ ମହିଳା ଦ୍ୱୟଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯିବ ବୋଲି ଥାନା ଆଇଆଇସି ରମାକାନ୍ତ ମହାଳିକ କହିଛନ୍ତି । ଦୋକାନ ମାଲିକ ଶିବ ପ୍ରସାଦ ପାତ୍ରଙ୍କ ଅଭିଯୋଗକ୍ରମେ ବାଲୁଗାଁ ପୋଲିସ୍ ୧୩୧/୧୯ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଅବ୍ୟାହତ ରଖିଛି ।