ମେଲବୋର୍ନ,୨୧।୨(ଏଏଫ୍ପି)- ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟେନିସ ଟୁର୍ନାମେଣ୍ଟ ଅଷ୍ଟ୍ରେଲିଆନ୍ ଓପନ ମଙ୍ଗଳବାର ଦ୍ୱିତୀୟ ଦିବସରେ ପହଞ୍ଚିଛି। ବିଶ୍ୱର ୧ ନମ୍ବର ପୁରୁଷ ଖେଳାଳି ସ୍ପେନର ରାଫାଲ ନାଡାଲଙ୍କ ସମେତ ସିଡେଡ ଖେଳାଳିମାନେ ବିଜୟରୁ ଅଭିଯାନ ଆରମ୍ଭ କରିଛନ୍ତି। ପୁରୁଷ ସିଙ୍ଗଲ୍ସ ଇଭେଣ୍ଟରେ ଟପ୍ ସିଡ ନାଡ଼ାଲ ବଲଭିଆର ହୁଗୋ ଡେଲିଏନଙ୍କୁ ୬-୨, ୬-୩, ୬-୦ ସେଟ୍ରେ ହରାଇ ଅଭିଯାନ ଆରମ୍ଭ କରିବା ସହ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ଏଥର ସଫଳ ହେଲେ ନାଡ଼ାଲ ସ୍ବଇଜରଲାଣ୍ଡର ରୋଜର ଫେଡେରରଙ୍କ ୨୦ଟି ଗ୍ରାଣ୍ଡସ୍ଲାମ ଟାଇଟଲ ହାସଲ ରେକର୍ଡର ସମକକ୍ଷ ହେବେ। ୩୩ ବର୍ଷୀୟ ନାଡ଼ାଲ ବିଶ୍ୱର ପ୍ରଥମ ଖେଳାଳିଭାବେ ସବୁ ୪ଟି ଗ୍ରାଣ୍ଡସ୍ଲାମ ଟୁର୍ନାମେଣ୍ଟକୁ ଅତିକମ୍ରେ ଦୁଇଥର ଜିତି ଏକ ବିରଳ ସଫଳତାର ଅଧିକାରୀ ହୋଇଛନ୍ତି। ସେହିପରି ୨୩ତମ ସିଡ ଅଷ୍ଟେଲିଆର ନିକ୍ କିର୍ଗିୟସ୍ ୬-୨, ୭-୬, ୭-୬ ସେଟ୍ରେ ଇଟାଲୀର ଲୋରେଞ୍ଜୋ ସୋନେଗୋଙ୍କୁ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ଅନ୍ୟଏକ ପ୍ରଥମ ରାଉଣ୍ଡ ମ୍ୟାଚ୍ରେ ୧୦ମ ସିଡ୍ ଖେଳାଳି ଫ୍ରାନ୍ସର ଗାଏଲ ମନ୍ଫିଲ୍ସ ୬-୧, ୬-୪, ୬-୨ ସେଟରେ ଚାଇନିଜ ତାଇପେର ୟେନ୍- ସୁନ୍ ଲୁଙ୍କୁ ହରାଇ ଅଗ୍ରଗତି କରିଛନ୍ତି। କ୍ରୋଏସିଆ ଇଭୋ କାର୍ଲୋଭିକ୍ ୭-୬, ୬-୪, ୭-୫ ସେଟ୍ରେ କାନାଡ଼ାର ଭାସେକ ପସ୍ପିସିଲଙ୍କୁ ହରାଇ ଅଗ୍ରଗତି କରିଛନ୍ତି। ସେହିପରି ପଞ୍ଚମ ସିଡ ମାନ୍ୟତା ପାଇଥିବା ଅଷ୍ଟ୍ରିଆର ଡୋମିନିକ୍ ଥିମ୍ ୬-୩, ୭-୫, ୬-୨ ସେଟ୍ରେ ଫ୍ରାନ୍ସର ଆଡ୍ରିଆନ ମାନାରିନୋଙ୍କୁ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେହିପରି ଅନ୍ୟ ପ୍ରଥମ ରାଉଣ୍ଡ ମ୍ୟାଚ୍ଗୁଡିକରେ କାନାଡ଼ାର ମିଲୋସ ରାଓନିକ, କ୍ରୋଏସିଆର ମାରିନ ସିଲିକ୍, ୯ମ ସିଡ୍ ସ୍ପେନର ରୋବେର୍ଟୋ ବତିସ୍ତା ଅଗୁଟ ବିଜୟ ହୋଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି।