ମେଲବୋର୍ନ,୨୩।୧(ପିଟି)- ଅଷ୍ଟ୍ରେଲିଆନ ଓପନରେ ଭାରତୀୟ ଖେଳାଳିମାନେ ପୁରୁଷ ଡବଲ୍ସରେ ମିଶ୍ର ପ୍ରଦର୍ଶନ କରିଛନ୍ତି। ଦିଭିଜ ଶରନ ତାଙ୍କ ନ୍ୟୁଜିଲାଣ୍ଡ ପାର୍ଟନର ଆର୍ଟିମ ସିଟାକଙ୍କ ସହ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ଏହି ଯୋଡି ପ୍ରତିପକ୍ଷ ପର୍ତ୍ତୁଗାଲ ଓ ସ୍ପେନ୍ ଯୋଡି ପାବ୍ଲୋ କାରୋନୋ ବୁଷ୍ଟା ଓ ଜୋଆଓ ସୋଉସାଙ୍କୁ ୬-୪, ୭-୫ ସେଟରେ ହରାଇ ଅଗ୍ରଗତି କରିଛନ୍ତି। ପରବର୍ତ୍ତୀ ରାଉଣ୍ଡରେ ଶରନ- ସିଟାକ ମାଟେ ପାଭିକ- ବ୍ରୁନୋ ସୋଆରେସ କିମ୍ବା ବେନ୍ ମୋଲାଚ୍ ଇଆନ- ଲ୍ୟୁକ ବାମ୍ବ୍ରିଜଙ୍କୁ ଭେଟିବେ।
ଅପରପକ୍ଷରେ ଅନ୍ୟତମ ଅଭିଜ୍ଞ ଭାରତୀୟ ଖେଳାଳି ରୋହନ ବୋପାନ୍ନା ପୁରୁଷ ଡବଲ୍ସ ପ୍ରଥମ ରାଉଣ୍ଡ ମ୍ୟାଚ୍ରେ ପରାସ୍ତ ହୋଇ ବିଦାୟ ନେଇଛନ୍ତି। ବୋପାନ୍ନା ଓ ତାଙ୍କ ଜାପାନ ପାର୍ଟନର ୟୁସୁଟାକା ଉଚିୟାମା ପ୍ରତିପକ୍ଷ ଆମେରିକାର ଦୁଇ ଭାଇ ବବ୍ ଓ ମାଇକ ବ୍ରାଏନ ଯୋଡିଙ୍କଠାରୁ ୧-୬, ୬-୩, ୩-୬ ସେଟ୍ରେ ପରାସ୍ତ ହୋଇ ବିଦାୟ ନେଇଛନ୍ତି। ବୋପାନ୍ନା ଓ ତାଙ୍କ ସାଥୀ ମାତ୍ର ଏକ ଘଣ୍ଟା ୧୭ ମିନିଟ୍ରେ ପରାସ୍ତ ହୋଇଥିଲେ। ଏବେ ବୋପାନ୍ନା ନିଜ ଦେଶର ସାନିଆ ମିର୍ଜାଙ୍କ ସହିତ ମିକ୍ସଡ ଡବଲ୍ସ ଇଭେଣ୍ଟରେ ଅଭିଯାନ ଆରମ୍ଭ କରିବେ। ପୂର୍ବରୁ ମଙ୍ଗଳବାର ଅନ୍ୟତମ ଭାରତୀୟ ଖେଳାଳି ପ୍ରଜନେଶ ଗୁଣେଶ୍ୱରନ ପୁରୁଷ ସିଙ୍ଗଲ୍ସ ପ୍ରଥମ ରାଉଣ୍ଡରେ ପରାସ୍ତ ହୋଇ ବିଦାୟ ନେଇଥିଲେ।