ସିଡନୀ,୧୦।୪(ଏପି)- ଏକ ଦୁଇଟିକିଆ ଟେଷ୍ଟ ସିରିଜ ଖେଳିବା ପାଇଁ ଅଷ୍ଟ୍ରେଲିଆ ଆଗାମୀ ଜୁନ୍ରେ ବାଂଲାଦେଶ ଗସ୍ତ କରିବାର କାର୍ଯ୍ୟକ୍ରମ ଥିଲା। ତେବେ କରୋନା ଭାଇରସ ସଂକ୍ରମଣ ତଥା ମହାମାରୀକୁ ଦୃଷ୍ଟିରେ ରଖି ଏହାକୁ ସ୍ଥଗିତ ରଖାଯାଇଛି। ଚଟ୍ଟୋଗ୍ରାମ୍ରେ ଜୁନ୍ ୧୧ ତାରିଖରୁ ପ୍ରଥମ ଟେଷ୍ଟ ଓ ଦ୍ୱିତୀୟ ଟେଷ୍ଟ ମ୍ୟାଚ୍ ଢାକାରେ ୧୯ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ଥିଲା। ଏହି ଦୁଇଟି ମ୍ୟାଚ୍ ବିଶ୍ୱ ଟେଷ୍ଟ ଚାମ୍ପିୟନଶିପ ଅଂଶବିଶେଷ। କ୍ରିକେଟ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କେଭିନ ରୋବର୍ଟ ବାଂଲାଦେଶ ସହ ମିଳିତ ଭାବେ କାର୍ଯ୍ୟ କରିବାକୁ ବଦ୍ଧପରିକର ଓ ନୂଆ ତାରିଖରେ ଏହି ଦୁଇ ଟେଷ୍ଟ ଖେଳିବାକୁ ମିଳିତ ଭାବେ ନିଷ୍ପତ୍ତି ନେବୁ ବୋଲି ସେ କହିଛନ୍ତି। ଉଲ୍ଲେଖଥାଉ କି, ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଦ୍ୱିତୀୟ ସିରିଜ ଭାବେ ଏହି ଶୃଙ୍ଖଳା ପ୍ରଭାବିତ ହୋଇଛି। ପୂର୍ବରୁ ଇଂଲଣ୍ଡ- ଶ୍ରୀଲଙ୍କା ଟେଷ୍ଟ ସିରିଜ ମଧ୍ୟ କରୋନା ଭାଇରସ କାରଣରୁ ସ୍ଥଗିତ ରହିଥିଲା।