ମେଲବୋର୍ନ, ୧୩ା୫ (ପି.ଟି.)- କରୋନା ଭାଇରସ୍ ମହାମାରୀ ଯୋଗୁ ବର୍ତ୍ତମାନ ସ୍ଥିତିରେ ଇଣ୍ଟରନ୍ୟାଶନାଲ ଟୁର୍ ସମ୍ଭବନା ଦେଖା ଯାଉ ନ ଥିବାରୁ ଦୁଇ ପଡ଼ୋଶୀ ଦେଶ ମଧ୍ୟରେ ମ୍ୟାଚ ଆୟୋଜନ ପାଇଁ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ କ୍ରିକେଟ ବୋର୍ଡ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଦୁଇ ଦେଶର ସରକାର କ୍ୱାରାଣ୍ଟାଇନ୍ ଫ୍ରି ଟ୍ରାଭେଲ ପାଇଁ ଅନୁମତି ଦେବା ପାଇଁ ଯୋଜନା କରୁଛନ୍ତି। ମ୍ୟାଚ ଆୟୋଜନ ସମ୍ଭାବନାକୁ ନେଇ ନ୍ୟୁଜିଲାଣ୍ଡ କ୍ରିକେଟ ମୁଖ୍ୟ କାର୍ଯ୍ୟନିର୍ବାହୀ ଡେଭିଡ୍ ହ୍ବାଇଟ୍ ପ୍ରତିପକ୍ଷ କ୍ରିକେଟ ଅଷ୍ଟ୍ରେଲିଆର କେଭିନ୍ ରବଟର୍ସଙ୍କ ସହ ଯୋଗାଯୋଗ ଅବ୍ୟହତ ରଖିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୩ ତମ ସଂସ୍କରଣ ଅନିର୍ଦ୍ଦିଷ୍ଟକାଳ ପାଇଁ ଘୁଞ୍ଚାଇ ଦିଆଯାଇଛି। ବାଂଲାଦେଶର ଟେଷ୍ଟ ଟୁର୍ ବାତିଲ ହୋଇଛି। ଜୁଲାଇରେ ଇଂଲଣ୍ଡର ଏକ ସୀମିତ ଓଭର ଟୁର୍ ବାତିଲ ସମ୍ଭାବନା ରହିଛି। ଫଳରେ ଶୀତଋତୁରେ ଅଷ୍ଟ୍ରେଲିଆ ପାଇଁ କ୍ରିକେଟ ମ୍ୟାଚ ନାହିଁ। ପୁନଶ୍ଚ ଅକ୍ଟୋବର-ନଭେମ୍ବରରେ ଅଷ୍ଟ୍ରେଲିଆରେ ଟି୨୦ ବିଶ୍ୱକପ୍ ହେବ କି ନା ସେ ନେଇ ସନ୍ଦେହ ଦେଖା ଦେଇଛି। ଅନ୍ୟପକ୍ଷରେ ନ୍ୟୁଜିଲାଣ୍ଡର ଘରୋଇ ଅନ୍ତର୍ଜାତୀୟ ସିରିଜଗୁଡ଼ିକ ଖେଳାଯାଇ ପାରିବ କି ନା ସେ ନେଇ ଅନିଶ୍ଚିତତା ଦେଖା ଦେଇଛି। ଟେଷ୍ଟ ସିରିଜ ଖେଳିବାକୁ ପାକିସ୍ତାନ ଓ ଓ୍ବେଷ୍ଟଇଣ୍ଡିଜ ଏବଂ ଶ୍ରୀଲଙ୍କା ଶର୍ଟ ଫର୍ମାଟ କ୍ରିକେଟ ଖେଳିବାକୁ ଆସିବା କାର୍ଯ୍ୟସୂଚୀ ରହିଛି। ସୂଚନାଯୋଗ୍ୟ, କରୋନା ଭାଇରସ୍ ଯୋଗୁ ଗତ ମାର୍ଚ୍ଚରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ୩ ମ୍ୟାଚବିଶିଷ୍ଟ ଅନ୍ତର୍ଜାତୀୟ ଦିନିକିଆ ସିରିଜର ପ୍ରଥମ ମ୍ୟାଚ ରୁଦ୍ଧଦ୍ୱାରରେ ଖେଳାଯିବା ପରେ ଅବଶିଷ୍ଟ ଦୁଇଟିକୁ ବାତିଲ କରିଦିଆଯାଇଥିଲା।