ସିଡନୀ,୨୮।୩ (ଏ.ପି.): ଅଷ୍ଟ୍ରେଲିଆର ଜଣେ ଏ-ଲିଗ୍ ଫୁଟବଲର କାରୋନା ଭାଇରସ୍ରେ ଆକ୍ରାନ୍ତ ହୋଇଛନ୍ତି। ପ୍ରଥମ ଅଷ୍ଟ୍ରେଲୀୟ ପେସାଦାର ଫୁଟବଲ ଭାବା ସେ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି। ତେବେ ଏହି ଖେଳାଳିଙ୍କ ନାମ ଜଣାପଡିନାହିଁ। ଏହି ଫୁଟବଲର ଜଣକ ନ୍ୟୁ ସାଉଥ୍ ଓ୍ବେଲ୍ସ ରାଜ୍ୟର ନ୍ୟୁକ୍ୟାସଲ ଜେଟ୍ସ ତରଫରୁ ଖେଳିଥାନ୍ତି। ଏକ ଆନ୍ତର୍ଜାତୀୟ ବିମାନ ଉଡାଣ ପୂର୍ବରୁ ଶୁକ୍ରବାର ତାଙ୍କର ଟେଷ୍ଟ କରାଯାଇଥିଲା। ଏଥିରେ ସେ ପଜିଟିଭ ଥିବା ଜଣାପଡିଥିଲା। କିଛ ଦିନ ତଳେ ସେ ବ୍ରିସ୍ବେନ ଓ ମୋଲବୋର୍ନ ସିଟି ବିପକ୍ଷରେ ମ୍ୟାଚ୍ ଖେଳିଥିଲେ। ଏବେ ତାଙ୍କର ସ୍ବାସ୍ଥ୍ୟବସ୍ଥା ଭଲ ଅଛି ବୋଲି ଜେଟ୍ସ ମୁଖ୍ୟ କାର୍ଯ୍ୟନିର୍ବାହୀ ଲଉଣି ମ୍ୟାକ୍କିନ୍ନା କହିଛନ୍ତି। ଲକ୍ଷଣ ଦେଖା ଦେଇଥିଲେ ମଧ୍ୟ ସେ ବେଶ୍ ସୁସ୍ଥ ଅଛନ୍ତି। ତାଙ୍କ ପରିବାରକୁ ଆଇସୋଲେଶନରେ ରଖାଯାଇଛି। ତେବେ ଦଳରେ ବାକି ଖେଳାଳିଙ୍କୁ ଆଇସୋଲେଶନରେ ରଖିବାର ଆବଶ୍ୟକତା ନାହିଁ। ସମ୍ପୃକ୍ତ ଫୁଟବଲର ଜଣକୁ କ୍ୱାରେଣ୍ଟାଇନ୍ରେ ରଖାଯାଇଛି। ଏ- ଲିଗ୍ ମଧ୍ୟ ଏପ୍ରିଲ ୨୨ ପର୍ଯ୍ୟନ୍ତ ସ୍ଥଗିତ ହୋଇଛି। ଦଳର ସବୁ ଖେଳାଳିଙ୍କ ସ୍ବାସ୍ଥ୍ୟାବସ୍ଥା ଉପରେ ନଜର ରଖାଯାଇଛି। ଯଦି କାହା ପାଖରେ କିଛି ବି ଲକ୍ଷଣ ଦେଖାଯାଏ ତାହେଲେ ତାଙ୍କୁ ଆଇସୋଲେଟ କରାଯିବ ବୋଲି ସେ କହିଛନ୍ତି। ଉଲ୍ଲେଖଥାଉ କି, କରୋନା ଭାଇରସ୍ କାରଣରୁ ସାରା ବିଶ୍ୱରେ ୨୪,୦୦୦ ବ୍ୟକ୍ତି ମୃତ୍ୟୁମୁଖରେ ପଡିଛନ୍ତି ଓ ପ୍ରାୟ ୬ଲକ୍ଷ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି।