ରାଇରଙ୍ଗପୁର, ୩ା୪(ଡି.ଏନ୍.ଏ.)- ମୟୂରଭଞ୍ଜ ଜିଲା ରାଇରଙ୍ଗପୁର ପୌର ପରିଷଦ ପକ୍ଷରୁ ସହରରେ ଥିବା ଗରିବ, ଅସହାୟ ଓ ଅଟକି ରହିଥିବା ପଡ଼ୋଶୀ ଝାରଖଣ୍ଡ ଓ ପଶ୍ଚିମବଙ୍ଗ ରାଜ୍ୟର ଶ୍ରମିକମାନଙ୍କୁ ଖାଦ୍ୟ ସାମଗ୍ରୀ ପ୍ରଦାନ କରାଯାଇଛି। ପୌରାଞ୍ଚଳର ୧୫ଟି ଓ୍ବାର୍ଡର ମୋଟ ୭୭୯ ଜଣଙ୍କୁ ଶୁଖିଲା ଖାଦ୍ୟ ଦିଆଯାଇଛି। ପଡ଼ୋଶୀ ରାଜ୍ୟର ୪୫୯ ଜଣ ଶ୍ରମିକ ଲକଡାଉନ ଯୋଗୁ ନିଜ ରାଜ୍ୟକୁ ଫେରି ପାରି ନ ଥିତ୍ବାରୁ ସେମାନଙ୍କୁ ମଧ୍ୟ ଖାଦ୍ୟ ସାମଗ୍ରୀ ବଣ୍ଟନ କରାଯାଇଛି। ସ୍ଥାନୀୟ ମେଡିକାଲରେ ଚିକିତ୍ସାଧୀନ ରୋଗୀ ଓ ସେମାନଙ୍କ ସମ୍ପର୍କୀୟମାନଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଇଥିବା ଜଣା ପଡ଼ିଛି। ସେହିପରି କରୋନା ଭାଇରସ୍ ସଂକ୍ରମଣକୁ ରୋକିବା ଲାଗି ରାଇରଙ୍ଗପୁର ଦମକଳ ବାହିନୀ ପକ୍ଷରୁ ସହରାଞ୍ଚଳକୁ ସାନିଟାଇଜ କରାଯାଇଛି। କୁଚେଇବୁଢି, ବାଇଦାପୋଷି, ପୁରୁଣାଘାଟି, ଅଁଳାଡୁବା, ପୁରୁଣାପାଣି ଓ ମହୁଲଡିହା ଆଦି ବସ୍ତୀ ଅଞ୍ଚଳକୁ ସାନିଟାଇଜ କରାଯାଇଛି। ଦମକଳ କେନ୍ଦ୍ର ଅଧିକାରୀ ଶରତ ଚନ୍ଦ୍ର ସିଂଙ୍କ ନେତୃତ୍ୱରେ ବିଭାଗୀୟ କର୍ମଚାରୀମାନେ ସାନିଟାଇଜ କାର୍ଯ୍ୟରେ ସହଯୋଗ କରିଥିଲେ।