ବରଗଡ଼ ଅଫିସ୍,୧୯।୪-କରୋନା ବିପର୍ଯ୍ୟୟ ସମୟରେ ବରଗଡ଼ ଜିଲା ଅତାବିରା ବ୍ଲକ ଅନ୍ତର୍ଗତ ଲସ୍ତଲା ହାଇସ୍କୁଲର ବିଜ୍ଞାନ ଶିକ୍ଷକ ବୈଲୋଚନ ପ୍ରଧାନ ଏବଂ ଜୀବନ ବୀମା ନିଗମ(ଏଲଆଇସି)ରେ କାମ କରୁଥିବା ତାଙ୍କ ଜଣେ ବନ୍ଧୁ ଶେଷଦେବ ଗିରି ଅସହାୟଙ୍କୁ ସହଯୋଗର ହାତ ବଢ଼ାଇଛନ୍ତି । ନିଜ ଦରମାରୁ ବୈଲୋଚନ କରୋନା ମୁକାବିଲା ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ୫ହଜାର ଟଙ୍କା ସହାୟତା ରାଶି ପ୍ରଦାନ କରିଛନ୍ତି । ସେହିପରି ବୈଲୋଚନ ଏବଂ ଶେଷଦେବ ଗତ ୯ତାରିଖରୁ ଗରିବ, ଅସହାୟଙ୍କୁ ସହାୟତା ଅଭିଯାନରେ ବାହାରିଛନ୍ତି । ଇତିମଧ୍ୟରେ ଉଭୟେ ବରଗଡ଼ ଗୋବିନ୍ଦପାଲିର ୫୦ ପରିବାର, ପଞ୍ଚାୟତ କଲେଜ ନିକଟସ୍ଥ ବସ୍ତିର ୩୫ ପରିବାର, ମୁଣ୍ଡାପଡ଼ାର ୫ପରିବାର, ନୂଆପଡ଼ାର ୬ ପରିବାର, ମୁସଲିମପଡ଼ାର ୧୧ ପରିବାର, ନଦୀପଡ଼ାର ୭ପରିବାର, ବାନ୍ଦୁଟିକ୍ରାର ୨ପରିବାରକୁ ନିଜ ଖର୍ଚ୍ଚରେ ରାଶନ ସାମଗ୍ରୀ ଯୋଗାଇ ଦେଇଛନ୍ତି । ଆବଶ୍ୟକତା ଅନୁସାରେ କାହାକୁ ୫ଦିନ, ୧୦ଦିନ ଏବଂ ଆଉ କାହାକୁ ମାସକ ପାଇଁ ଚାଉଳ, ଚୂଡ଼ା, ଚିନି, ଆଳୁ, ତେଲ, ପରିବା ଆଦି ରାଶନ ସାମଗ୍ରୀ ପ୍ରଦାନ କରିଥିବା ବୈଲୋଚନ କହିଛନ୍ତି।