କାକଟପୁର,୨ା୪(ଡି.ଏନ୍.ଏ.): କରୋନା ଭୂତାଣୁର ମୁକାବିଲା ପାଇଁ ସରକାର ଲକଡାଉନ ଘୋଷଣା କରିଥିବାବେଳେ ଦିନ ମଜୁରିଆ, ଶ୍ରମିକ, ଅସହାୟ, ନିରାଶୟମାନଙ୍କ ପାଇଁ ଚଡ଼କ ସଦୃଶ ପାଲଟିଛି। ଏମାନଙ୍କ ରୋଜଗାର ବନ୍ଦ ହୋଇଯିବାରୁ ଦାନା ଯୋଗାଡ଼ କରିବାରେ ଅସମର୍ଥ ହୋଇପଡିଛନ୍ତି। ଏଭଳି ସମୟରେ କେତେକ ସହୃଦୟ ବ୍ୟକ୍ତି ଏମାନଙ୍କ ସାହା ହୋଇପଡ଼ନ୍ତି। ସେହିଭଳି କାକଟପୁର ବ୍ଲକ ଅନ୍ତର୍ଗତ ସୁହାଣପୁର ପଞ୍ଚାୟତ ଅଧୀନସ୍ଥ ଗୋପୀକାନ୍ତପୁର ଗ୍ରାମରେ ଲକଡାଉନ ଯୋଗୁ ଗ୍ରାମର କୈଳାସ ରଥ ଏକରକମ ଅସହାୟ ହୋଇପଡ଼ିଥିଲେ। ଏହି ସମୟରେ ଖବରପାଇ ସୁହାନପୁର ପଞ୍ଚାୟତ ତରଫରୁ ସରପଞ୍ଚ ସନ୍ଧ୍ୟାରାଣୀ କାଣ୍ଡି ନିଜେ ଯାଇ କୈଳାସଙ୍କୁ ଭେଟି ଚାଉଳ, ଡାଲି, ଆଳୁ, ବିସ୍କୁଟ ଇତ୍ୟାଦି ଖାଦ୍ୟ ସାମଗ୍ରୀ ପ୍ରଦାନ କରିଥିବା ସୂଚନା ମିଳିଛି। ଏଥିରେ ସରପଞ୍ଚ କାଣ୍ଡିଙ୍କ ସମେତ ଝୁମମଣୀ ସାହୁ, ସାମାଜିକ କର୍ମୀ ଆଶିଷ କାଣ୍ଡି, ପ୍ରଫୁଲ୍ଲ ଦାଶ ପ୍ରମୁଖ ଉପସ୍ଥିତ ଥିଲେ। ଏହାକୁ ନେଇ ଉକ୍ତ ଅଞ୍ଚଳର ଗ୍ରାମବାସୀ ସରପଞ୍ଚଙ୍କୁ ପ୍ରଶଂସା କରିଛନ୍ତି। ସେହିପରି କାକଟପୁର ଅଞ୍ଚଳର ସ୍ବେଚ୍ଛାସେବୀ ସଂଗଠନ ୟୁଥ ମାସ ପକ୍ଷରୁ ମେଡିକାଲ ଛକ, କାକଟପୁର ବଜାରର ବିଭିନ୍ନ ସ୍ଥାନରେ ଅସହାୟ ବ୍ୟକ୍ତିମାନଙ୍କୁ ଖାଦ୍ୟ ବଣ୍ଟନ କରାଯାଇଛି। ଏଥିସହ ବଜାରରେ ବୁଲୁଥିବା ଗୋରୁମାନଙ୍କୁ ମଧ୍ୟ ତୋରାଣି ଓ ଗୋଖାଦ୍ୟ ବଣ୍ଟନ କରିଥିଲେ। ଏହି ସ୍ବେଚ୍ଛାସେବୀ କାର୍ଯ୍ୟକ୍ରମରେ କାକଟପୁର ଥାନା ପୋଲିସ ଅଧିକାରୀ ଯୋଗ ଦେଇଥିବାବେଳେ ଲୋକମାନଙ୍କୁ ସଚେତନତା ବାର୍ତ୍ତା ଦେଇଥିଲେ।