ରଣପୁର,୧୯।୮(ସ୍ବ.ପ୍ର.)-ନୟାଗଡ ଜିଲା ରଣପୁର ବ୍ଲକ ସୁଆଁସିଆ ସାହି ଅଙ୍ଗନୱାଡି କେନ୍ଦ୍ରରେ କାନ୍ଥ ଭୁଶୁଡି ୨୦୧୨ ଜୁଲାଇ ୯ରେ ୭ ଶିଶୁଙ୍କ ମୃତ୍ୟୁ ପରେ ବି ପ୍ରଶାସନ ସତର୍କ ହେଉ ନ ଥିବା ଅଭିଯୋଗ ହେଉଛି। ଅଘଟଣ ଘଟିବାର ୭ ବର୍ଷ ପରେବି ଅସୁରକ୍ଷିତ ଘରେ ପାଠପଢ଼ା, ଗଛମୂଳେ ରୋଷେଇ କରିବା ପରି ଘଟଣା ପୁଣି ଦେଖିବାକୁ ମିଳୁଛି।
ପ୍ରକାଶଯୋଗ୍ୟ, ଏ ସମସ୍ତ ଘଟଣା ପରେ ଓସ୍ତପଡା ଅଙ୍ଗନୱାଡି କେନ୍ଦ୍ରର ନିଜସ୍ବ ଗୃହ ନିର୍ମାଣ ହୋଇଥିବାବେଳେ ସ୍ଥାନୀୟ ପ୍ରାଥମିକ ସ୍କୁଲରେ କେନ୍ଦ୍ର ଚାଲୁଛି । ନବନିର୍ମିତ ଅଙ୍ଗନୱାଡି କେନ୍ଦ୍ର ହସ୍ତାନ୍ତର ହୋଇ ନ ଥିବାରୁ କେନ୍ଦ୍ରଟି ସ୍କୁଲରେ ଚାଲୁଛି । ସୂଚନାଯୋଗ୍ୟ, ଫନୀ ବାତ୍ୟା ପରେ ୩ ବିପନ୍ନ ପରିବାର ନବନିର୍ମିିତ ଅଙ୍ଗନୱାଡିି କେନ୍ଦ୍ରରେ ରହୁଥିଲେ । ୨ ପରିବାର ଚାଲି ଯାଇଥିବାବେଳେ ଘର ଭାଙ୍ଗି ଯାଇଥିବାରୁ ଜଣେ ବିପନ୍ନ ପରିବାର ସେଠାରେ ଅଟକି ରହିଯାଇଛନ୍ତି । ତେବେ ପ୍ରଶ୍ନ ଉଠୁଛି, ଗୋଟିଏ ପରିବାରକୁ ସୁରକ୍ଷା ଦେବାକୁ ଯାଇ ଅନେକ ଶିଶୁଙ୍କୁ ଅସୁରକ୍ଷିତ କରିବା ଘଟଣା କେତେଦୂର ଠିକ୍? ଛୋଟ ଛୋଟ ପିଲାମାନେ ବର୍ଷ ବର୍ଷ ଧରି ଅସୁରକ୍ଷିତ ଘରେ ପାଠ ପଢ଼ୁଥିଲେ ମଧ୍ୟ ପ୍ରତିକାର ବ୍ୟବସ୍ଥା ଗ୍ରହଣ କରା ନ ଯିବା ସାଧାରଣରେ ଅସନ୍ତୋଷର କାରଣ ପାଲଟିଛି । ରଣପୁର ସିଡିପିଓ ବ୍ରହ୍ମୋତ୍ରି ମିଶ୍ର ଏ ସମସ୍ୟା ନେଇ କୁହନ୍ତି, ନବନିର୍ମିତ ଘର ଆମକୁ ହସ୍ତାନ୍ତର କରାଯାଇନି। ପରିତ୍ୟକ୍ତ ଘରେ କେନ୍ଦ୍ର ଚାଲିଥିବା ସମ୍ପର୍କରେ ପଚାରିବାରୁ ତଦନ୍ତ ପରେ ସ୍ଥାନାନ୍ତର କରାଯିବ ବୋଲି ସେ ସୂଚନା ଦେଇଛନ୍ତି । ଅଙ୍ଗନୱାଡି କେନ୍ଦ୍ର ନିର୍ମାଣ ପରେ ବି ଛୋଟ ଛୋଟ ପିଲାମାନେ ପୁଣି ଭଙ୍ଗାଘରେ ପାଠ ପଢ଼ିବାରୁ ପିଲାଙ୍କ ଜୀବନ ପ୍ରତି ଅଣଦେଖା କରାଯାଉଥିବା ନେଇ ବିଭିନ୍ନ ମହଲରେ ଅଭିଯୋଗ ହେଉଛି। ଆଗାମୀ ଦିନରେ ଏହା ଆନ୍ଦୋଳନକୁ ଖୋରାକ ଯୋଗାଇପାରେ ବୋଲି କେତେଜଣ ସ୍ଥାନୀୟ ଲୋକେ କହିଛନ୍ତି। ସୂଚନାଯୋଗ୍ୟ, ରଣପୁର ବ୍ଲକରେ ୨୪୫ ଅଙ୍ଗନୱାଡି କେନ୍ଦ୍ର ଓ ୭୮ ମିନି ଅଙ୍ଗନୱାଡି କେନ୍ଦ୍ର ରହିଛି । ଅଙ୍ଗନୱାଡି ଓ ମିନି ଅଙ୍ଗନୱାଡି ମିଶି ୩୨୩ କେନ୍ଦ୍ରରୁ ୨୬୮ କେନ୍ଦ୍ରର ଗୃହନିର୍ମାଣ ପାଇଁ ଦିଆଯାଇଥିତ୍ଲା କାର୍ଯ୍ୟାଦେଶ । ଏଥିରୁ ୭ବର୍ଷରେ ମାତ୍ର ୯୬ ଘର ସମ୍ପୂର୍ଣ୍ଣ ହୋଇଛି । ସମ୍ପୂର୍ଣ୍ଣ ଘରଗୁଡିକ ଉଦ୍ଘାଟନ ହୋଇପାରି ନ ଥିବାରୁ ଅଧିକାଂଶ ପରିତ୍ୟକ୍ତ ହୋଇ ନଷ୍ଟ ହେବାକୁ ବସିଲାଣି ।