ପଟ୍ଟାମୁଣ୍ଡାଇ, ୨୫।୧୦ (ସ୍ବ.ପ୍ର.): ପଟ୍ଟାମୁଣ୍ଡାଇ ମ୍ୟୁନିସିପାଲିଟି ଏବେ ଅଳିଆ ଆବର୍ଜନାରେ ପରିପୂର୍ଣ୍ଣ ହୋଇ ପୂତିଗନ୍ଧମୟ ପରିବେଶ ସୃଷ୍ଟି କରିଛି। ମ୍ୟୁନିସିପାଲିଟି ପକ୍ଷରୁ ଡମ୍ପିଂୟାର୍ଡ ନିର୍ମାଣ ହେବା ନେଇ ୨୦୧୩ରୁ ଯୋଜନା ଚାଲିଥିଲେ ମଧ୍ୟ ତାହା ଏ ପର୍ଯ୍ୟନ୍ତ ହୋଇପାରି ନାହିଁ। ଅନ୍ୟପକ୍ଷେ ପଟ୍ଟାମୁଣ୍ଡାଇ ଏକ ବ୍ୟବସାୟିକ ପେଣ୍ଠ ହୋଇଥିବାରୁ ଦୈନିକ ଏଠାକୁ ରାଜନଗର, ଆଳି, ରାଜକନିକା, ମହାକାଳପଡା, କେନ୍ଦ୍ରାପଡା, ଡେରାବିଶ୍ ବ୍ଲକର ଶହ ଶହ ଲୋକେ କିଣାବିକା କରିବାକୁ ଆସିଥାନ୍ତି। ପ୍ରତ୍ୟହ ୧୦ ହଜାରରୁ ଊର୍ଦ୍ଧ୍ୱ ଲୋକଙ୍କ ଭିଡ଼ ହେଉଥିବା ବେଳେ ସହର ଓ ସହର ତଳି ଅଞ୍ଚଳର ଆବର୍ଜନା ଠିକ୍ ସ୍ଥାନରେ ପଡିପାରୁ ନାହିଁ। ସଫେଇ କର୍ମଚାରୀ ପ୍ରେତିଦିନ ପ୍ରାୟ ୨୦ରୁ ୨୫ ଟ୍ରଲି ଆବର୍ଜନା ବୋହି ନେଇ କଚେରି ପୋଖରୀ ଓ ତା’ ସମ୍ମୁଖରେ ଥିବା ମାର୍କେଟ କମ୍ପ୍ଲେକ୍ସ ସ୍ଥାନରେ ପକାଉଛନ୍ତି। ଫଳରେ ଉକ୍ତ ପୋଖରୀ ଅସ୍ଥାୟୀ ଡମ୍ପିଂୟାର୍ଡ ପାଲଟିଛି।
ପ୍ରକାଶ ଯେ, ଜମିଦାର ଅମଳରେ ପ୍ରାୟ ୧ ଏକର ଜମିରେ କଚେରି ପୋଖରୀ ଖନନ କରାଯାଇଥିଲା। ପୂର୍ବରୁ ପୋଖରୀରେ ଲକ୍ଷ ଲକ୍ଷ ଟଙ୍କାର ମାଛ ଉପତ୍ାଦନ ହେଉଥିବା ବେଳେ ଏହାର ପାଣି ବ୍ୟବହୃତ ହେଉଥିଲା। ମାତ୍ର ତାହା ରକ୍ଷଣାବେକ୍ଷଣ ଅଭାବରୁ ଏବେ ପରିତ୍ୟକ୍ତ ହୋଇପଡିଛି। ଫଳରେ ପଟ୍ଟାମୁଣ୍ଡାଇବାସୀ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ବ୍ରିଟିଶ୍ ଅମଳରୁ ପୋଖରୀ ଖନନ କରାଯାଇଥିଲା। କିସମ ବଦଳାଇବା ପାଇଁ ବାରମ୍ବାର ଦାବି ହୋଇଆସୁଥିଲେ ମଧ୍ୟ ତାହା ଏବେ ବଗାୟତ କିସମରେ ରହିଛି। ଏ ସମ୍ପର୍କରେ ତହସିଲଦାର ଶରତ କୁମାର ଗିରିଙ୍କୁ ପଚାରିବାରୁ ସେ କହିଥିଲେ, ଉକ୍ତ ପୋଖରୀର କିସମ ଖୁବ୍ଶୀଘ୍ର ପରିବର୍ତ୍ତନ କରାଯିବ। ପୌର କର୍ତ୍ତୃପକ୍ଷ ସମ୍ପଦ କୁମାର ସ୍ବାଇଁ କହନ୍ତି, କଚେରି ପୋଖରୀ ପୁନଃରୁଦ୍ଧାର ପାଇଁ ସରକାର ଦେଢ କୋଟି ଟଙ୍କା ମଞ୍ଜୁର କରିଥିବା ବେଳେ ଖୁବ୍ଶୀଘ୍ର ଏହାର ଟେଣ୍ଡର କରାଯିବ। କାୈଣସି ଅଳିଆ ଆବର୍ଜନା ରହିବ ନାହିଁ ବୋଲି ସେ କହିଛନ୍ତି।