ବ୍ରହ୍ମପୁର ଅଫିସ,୧ା୮-ବ୍ରହ୍ମପୁର ମହାନଗରରେ ଏବେ ଆପରାଧୀକ କାର୍ଯ୍ୟକଳାପ ଦିନକୁ ଦିନ ବଢ଼ିବାରେ ଲାଗିଛି। ବୁଧବାର ବୈଦ୍ୟନାଥପୁର ଥାନା ଅନ୍ତର୍ଗତ ଡି ପଲ ସ୍କୁଲ ନିକଟରେ ଥିବା ଆଇଆଇଏଫଏଲ ଗୋଲଡ଼ ଲୋନ ସଂସ୍ଥାରେ ଦୁର୍ବୃତ୍ତମାନେ ସଶସ୍ତ୍ର ଡକାୟତି ଉଦ୍ୟମ କରିଛନ୍ତି। ୪/୫ ଜଣ ମୁଖାପିନ୍ଧା ବନ୍ଧୁକଧାରି ଉକ୍ତ ସଂସ୍ଥାରୁ ସୁନା ଗହଣା ଓ ଟଙ୍କା ଲୁଟରେ ବିଫଳ ହେବା ପରେ ୩ ଜଣ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରିଛନ୍ତି। ଆହତ କର୍ମଚାରୀଙ୍କୁ ନଗର ଚିକିତ୍ସାଳୟରେ ଭର୍ତ୍ତି କରାଯାଇଛି। ସାଇଣ୍ଟିିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ଫିଙ୍ଗରପ୍ରିଣ୍ଟ ସଂଗ୍ରହ କରିଛି। ଡକାୟତଙ୍କୁ ଧରିବା ପାଇଁ ପୋଲିସ ସହରର ସମସ୍ତ ଥାନା ଇଲାକାରେ ନାକାବନ୍ଦୀ କରିଛି। ସଂସ୍ଥା ଭିତରେ ଖଞ୍ଜାଯାଇଥିବା ସିସି ଟିଭିରୁ ଫୁଟେଜ ସଂଗ୍ରହ କରିଛି। ଏଥିରେ ୪ ଜଣ ମୁଖାପିନ୍ଧା ଦୁର୍ବୃତ୍ତ ରହିଥିବା ବୈଦ୍ୟନାଥପୁର ଥାନାଧିକାରୀ ସାରଦା ପ୍ରସନ୍ନ ଦାସ ସୂଚନା ଦେଇଛନ୍ତି।
ପ୍ରକାଶ ଯେ ବୁଧବାର ପୂର୍ବାହ୍ନ ପ୍ରାୟ ସାଢ଼େ ୧୦ ଟାରେ ଉକ୍ତ ସଂସ୍ଥା ଖୋଲିଥିଲା। ୪ ଜଣ ଦୁର୍ବୃତ୍ତ ଭିତରେ ପଶିଥିଲେ। ଅନ୍ୟ ଜଣେ ହେଲମେଟ ପିନ୍ଧି ବାହାରେ ଗାଡି ଉପରେ ବସିଥିଲେ। ଭିତରେ ଥିବା ଦୁର୍ବୃତ୍ତମାନେ ୩ ଜଣ କର୍ମଚାରୀଙ୍କୁ ଲକର ଚାବି ମାଗିବା ସହ ସୁନାଗହଣା ଓ ଟଙ୍କା ଦେବାକୁ କହିଥିଲେ। ଏପରିକି ବନ୍ଧୁକ ବାହାର କରି ଦୁର୍ବୃତ୍ତମାନେ କର୍ମଚାରୀଙ୍କୁ ଭୟଭୀତ କରିଥିଲେ। କ୍ୟାଶିୟର ମିହିର ପ୍ରଧାନ ଅପରାଧୀମାନଙ୍କୁ କହିଥିଲେ, ଏହି ସଂସ୍ଥାଟି ଏକ ଶାଖା ସଂସ୍ଥା। ଏହାର ମୁଖ୍ୟ କାର୍ଯ୍ୟାଳୟ ମୁମ୍ବାଇରେ ଅଛି। ସେଠାରୁ ୱାନ୍ ଟାଇମ୍ ପାସ୍ୱାର୍ଡ (ଓଟିପି) ନମ୍ବର ମିଳିଲେ ହିଁ ଏଠାରେ ଥିବା ଲକର ଆପେଆପେ ଖୋଲିବ। ଆମ ପାଖରେ ଲକର ଖୋଲିବା ପାଇଁ କୌଣସି ଚାବି ନାହିଁ। ଏକଥା ଶୁଣିବା ପରେ ଡକାୟତମାନେ ସଂସ୍ଥାରେ କାମ କରୁଥିବା ମିହିର ପ୍ରଧାନ, ଡ଼ି. ଶ୍ରୀଧର ଆଚାରୀ ଓ ମୃତ୍ୟୁଞ୍ଜୟ ନାହାକଙ୍କୁ ବନ୍ଧୁକ ମୁନରେ ଆକ୍ରମଣ କରିଥିଲେ। ପରେ ସେମାନଙ୍କୁ ଏକ ଜିଆଇ ତାରରେ ବାନ୍ଧି ବାଥରୁମ୍ ଭିତରେ ପୁରାଇ ବାହାର ପଟୁ ଗେଡା ଦେଇ ଚମ୍ପଟ ମାରିଥିଲେ। ସଂସ୍ଥା ବାହାରେ କାମ କରୁଥିବା ମହିଳା ସୁଇପରଙ୍କୁ ମଧ୍ୟ ଡକାୟତମାନେ ଯିବା ପୂର୍ବରୁ ଧମକ ଦେଇ ଚମ୍ପଟ ମାରିଥିଲେ। ଡ଼କାୟତମାନେ ହିନ୍ଦୀ ଭାଷାରେ କଥାବାର୍ତ୍ତା କରୁଥିଲେ ବୋଲି ସୁଇପର ଜଣଙ୍କ ପୋଲିସକୁ କହିଛନ୍ତି। ଏପରିକି ମଙ୍ଗଳବାର ଜଣେ ଯୁବକ ଟଙ୍କା ଋଣ ନେବା ପାଇଁ ଆସିଥିଲେ। ସେ ଦେଖାଇଥିବା କାଗଜପତ୍ର ବାହାର ରାଜ୍ୟର ହୋଇଥିବାରୁ ତାଙ୍କୁ ଋଣ ଦିଆଯାଇପାରିବ ନାହିଁ ବୋଲି କୁହାଯାଇଥିଲା ବୋଲି ମିହିର ପୋଲିସକୁ କହିଛନ୍ତି। ପୋଲିସ ଏବେ ଘଟଣାର ସମସ୍ତ ଦିଗକୁ ନେଇ ତନାଘନା ଚଳାଇଥିବା କହିଛି। ସଂସ୍ଥା ଶାଖା ପ୍ରବନ୍ଧକ ୧ ମାସ ହେଲା ଛୁଟିରେ ଥିବା ବେଳେ ସେଠାରେ ସୁରକ୍ଷାକର୍ମୀ ନିୟୋଜିତ ହୋଇ ନ ଥିବା ପୋଲିସ ସୂଚନା ଦେଇଛି। ଖବର ପାଇ ଅତିରିକ୍ତ ଏସ୍ପି ପ୍ରଭାତ ରାଉତରାୟ, ଥାନାଧିକାରୀ ସାରଦା ପ୍ରସନ୍ନ ଦାସ ଓ ଲାଞ୍ଜିପଲ୍ଲୀ ଫାଣ୍ଡି ଅଧିକାରୀ ନାରାୟଣ ସ୍ବାଇଁ ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ।