ନୂଆଦିଲ୍ଲୀ,୨୬।୭(ପିଟି)- ଭାରତୀୟ ଆଥ୍ଲେଟିକ୍ସ ଫେଡେରେଶନ (ଏଏଫ୍ଆଇ) ସଭାପତି ଆଦିଲେ ସୁମରିଓ୍ବାଲା ଏହି କ୍ରୀଡ଼ାର ବିଶ୍ୱ ପରିଚାଳନା ସଂସ୍ଥା ଆଇଏଏଏଫ୍ ଉପସଭାପତି ପଦ ପାଇଁ ନିର୍ବାଚନ ଲଢ଼ିବେ। ଆଇଏଏଏଫ୍ର ୫୨ତମ କଂଗ୍ରେସ ନିର୍ବାଚନ ବୈଠକ ସେପ୍ଟେମ୍ବର ୨୫ ଓ ୨୬ ତାରିଖରେ ଦୋହାଠାରେ ଅନୁଷ୍ଠିତ ହେବ। ସୁମରିଓ୍ବାଲା ଇଣ୍ଟନ୍ୟାଶନାଲ ଆସୋସିଏଶନ ଅଫ୍ ଆଥ୍ଲେଟିକ୍ସ ଫେଡେରେଶନ (ଆଇଏଏଏଫ୍) କାଉନ୍ସିଲର ଜଣେ ନିର୍ଭରଯୋଗ୍ୟ ସଦସ୍ୟ। ୪ ଉପସଭାପତି ପଦ ଲାଗି ୧୧ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି। ଏହି ୪ ଉପ ସଭାପତି ଆଇଏଏଏଫ୍ର ଶକ୍ତିଶାଳୀ କାର୍ଯ୍ୟକାରୀ ବୈଠକରେ ବସି ପାରିବେ। ଏମାନଙ୍କ ବ୍ୟତୀତ ବୈଠକରେ ସଭାପତି ଓ ୩ ପ୍ରୋଫେଶନାଲ କର୍ମକର୍ତ୍ତା ମଧ୍ୟ ଉପସ୍ଥିତ ରହିପାରିବେ। ସୁମରିଓ୍ବାଲା ଆଇଏଏଏଫ୍ ନିୟମ ଅନୁଯାୟୀ ବ୍ୟକ୍ତିଗତ କାଉନ୍ସିଲ ସଦସ୍ୟତା ପାଇଁ ମଧ୍ୟ ନାମାଙ୍କନ ଦାଖଲ କରିଛନ୍ତି। ମିଳିଥିବା ସୂଚନା ଅନୁଯାୟୀ, ଯଦି ସୁମରିଓ୍ବାଲା ଉପ ସଭାପତି ପଦରେ ବିଜୟୀ ହୁଅନ୍ତି, ତେବେ ତାଙ୍କୁ କାର୍ଯ୍ୟକାରୀ ବୈଠକରେ ବସିବାକୁ ମିଳିବ। ହାରିଲେ ସେ ବ୍ୟକ୍ତିଗତ କାଉନ୍ସିଲ ସଦସ୍ୟତା ପାଇଁ ନିର୍ବାଚନ ଲଢ଼ିବେ।