କୋଲକାତା, ୧୦।୧୧ (ପି.ଟି.)- ଇଣ୍ଡିଆନ ସୁପର୍ ଲିଗ୍ (ଆଇଏସ୍ଏଲ୍)ରେ ଶନିବାର ଖେଳାଯାଇଥିବା ଏକ ମ୍ୟାଚ୍ରେ ଦୁଇଥରର ଚାମ୍ପିୟନ ଘରୋଇ ଏଟିକେ ଦଳ ୩-୧ ଗୋଲରେ ଜାମସେଦପୁର ଏଫ୍ସିକୁ ପରାସ୍ତ କରିଛି। ସାମୁଦ୍ରିକ ଝଡ଼ ‘ବୁଲ୍ବୁଲ’ ପଶ୍ଚିମବଙ୍ଗ ସମୁଦ୍ରକୂଳ ନିକଟରେ ଲ୍ୟାଣ୍ଡଫଲ୍ କରିଥିଲେ ମଧ୍ୟ ଏହି ମ୍ୟାଚ୍ ଉପରେ କୌଣସି ପ୍ରଭାବ ପଡ଼ି ନ ଥିଲା। ସ୍ଥାନୀୟ ସଲ୍ଟ ଲେକ୍ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ର ପ୍ରଥମାର୍ଦ୍ଧ ଗୋଲଶୂନ୍ୟ ରହିଥିଲା। ତେବେ ଦ୍ୱିତୀୟାର୍ଦ୍ଧ ପ୍ରାରମ୍ଭରୁ ଘରୋଇ ଏଟିକେ ଅଗ୍ରଣୀ ନେବାରେ ସଫଳ ହୋଇଥିଲା। ଫିଜିର ଷ୍ଟାର୍ ଫର୍ଓ୍ବାର୍ଡ ରୟ କ୍ରିଷ୍ଣା ୧୪ ମିନିଟ୍ ଅନ୍ତରରେ ୨ଟି ଗୋଲସ୍କୋର କରି ଏଟିକେକୁ ୨-୦ ଗୋଲରେ ଅଗ୍ରଣୀ କରାଇଥିଲେ। ସେ ୫୭ତମ ଓ ୭୧ତମ ମିନଟ୍ରେ ଏହି ଦୁଇଟି ଗୋଲ ଦେଇଥିଲେ। ଏହାପରେ ଜାମସେଦପୁରର ସର୍ଜିଓ କାଷ୍ଟେଲ ୮୫ତମ ମିନିଟ୍ରେ ଏକ ଗୋଲସ୍କୋର ମ୍ୟାଚ୍କୁ ୧-୨ ସ୍ତରକୁ ଆଣିଥିଲେ। ତେବେ ଅତିରିକ୍ତ ମିନିଟ୍ରେ ଏଡୁ ଗ୍ରାସିଆ (୯୦+୨)ଙ୍କ ଗୋଲ ବଳରେ ଏଟିକେ ୩-୧ରେ ବିଜୟୀ ହୋଇଥିଲା। ଏହି ବିଜୟ ସହ ଦଳ ପଏଣ୍ଟ ଟେବୁଲ ତାଲିକାର ଶୀର୍ଷକୁ ଉଠିଛି।