ପୁଟାନ(ଚାଇନା),୨୧।୧୧(ପି.ଟି.)- ଆଇଏସ୍ଏସ୍ଏଫ୍ ବିଶ୍ୱକପ୍ର ଗୋଟିଏ ଦିନରେ ଭାରତୀୟ ଶୁଟରମାନେ ସର୍ବାଧିକ ସଫଳତା ପାଇଛନ୍ତି। ଯୁବ ଶୁଟର ମନୁ ଭାକର, ଇଲାଭେନିଲ ଭାଲରିଭାନ ଓ ଦିବ୍ୟାଂଶୁ ପାନ୍ବାର ନିଜ ନିଜ ବର୍ଗରେ ସ୍ବର୍ଣ୍ଣ ପଦକ ଜିତିଛନ୍ତି। ପ୍ରଥମ ଥର ପାଇଁ ଆଇଏସ୍ଏସ୍ଏଫ୍ ବିଶ୍ୱକପ୍ର ଗୋଟିଏ ଦିନରେ ଭାରତୀୟ ଶୁଟରମାନେ ଏତେ ସଂଖ୍ୟକ ସ୍ବର୍ଣ୍ଣ ପଦକ ହାତେଇଛନ୍ତି। ୧୭ ବର୍ଷୀୟ ଭାକର ମହିଳା ୧୦ ମିଟର ଏୟାର ପିସ୍ତଲ ଇଭେଣ୍ଟରେ ସର୍ବାଧିକ ସଫଳତା ପାଇଛନ୍ତି। ସେହିଭଳି ଇଲାଭନେିଲ (୨୦) ୧୦ ମି. ଏୟାର ରାଇଫଲ ପ୍ରତିଯୋଗିତାରେ ପୋଡିୟମର ଶୀର୍ଷ ସ୍ଥାନ ଅଧିକାର କରିଛନ୍ତି। ଏମାନଙ୍କ ଭଳି ୧୭ ବର୍ଷୀୟ ଦିବ୍ୟାଂଶୁ ପୁରୁଷ ୧୦ ମି. ଏୟାର ରାଇଫଲ ଇଭେଣ୍ଟର ଫାଇନାଲରେ ସର୍ବାଧିକ ୨୫୦.୧ ସ୍କୋର କରି ସମାନ ସଫଳତା ହାତେଇଛନ୍ତି। ପ୍ରତିଯୋଗିତାରେ ଏପର୍ଯ୍ୟନ୍ତ ଭାରତୀୟ ୩ ସ୍ବର୍ଣ୍ଣ ପଦକ ସହ ତାଲିକା ଶୀର୍ଷରେ ରହିଛି। ଆୟୋଜକ ଚାଇନା ଦ୍ୱିତୀୟ ସ୍ଥାନ ଅଧିକାର କରିଛି। ଚାଇନା ନିକଟରେ ୨ ସ୍ବର୍ଣ୍ଣ, ଗୋଟିଏ ଲେଖାଏ ରୌପ୍ୟ ଓ ବ୍ରୋଞ୍ଜ ରହିଛି।
ଚଳିତ ସିଜନର ଅନ୍ତର୍ଜାତୀୟ ଶୁଟିଂ ସ୍ପୋର୍ଟ ଫେଡେରେଶନ (ଆଇଏସ୍ଏସ୍ଏଫ୍) ଅନ୍ତିମ ପ୍ରତିଯୋଗିତାର ୧୦ ମିଟର ଏୟାର ପିସ୍ତଲ ଇଭେଣ୍ଟ ଫାଇନାଲରେ ଭାକର ୨୪୪.୭ ସ୍କୋର କରିଥିଲେ। ଏଥିରେ ଅଂଶଗ୍ରହଣ କରିଥିବା ଅନ୍ୟ ଭାରତୀୟ ଶୁଟର ଯଶସ୍ବିନୀ ସିଂ ଦେଶ୍ୱାଲ ଫାଇନାଲରେ ୬ଷ୍ଠ ସ୍ଥାନରେ ରହି ଅଭିଯାନ ଶେଷ କରିଥିଲେ। ସର୍ବିଆର ଜୋରାନା ଅରୁନୋଭିକ୍ (୨୪୧.୯) ଓ ଚାଇନାର କ୍ୱିଆନ ଓ୍ବାଙ୍ଗ (୨୨୧.୮) ଦ୍ୱିତୀୟ ଓ ତୃତୀୟ ସ୍ଥାନରେ ରହି ରୌପ୍ୟ ଓ ବ୍ରୋଞ୍ଜ ପଦକ ଜିତିଥିଲେ। ୧୦ ମି. ଏୟାର ରାଇଫଲ ପ୍ରତିଯୋଗିତାରେ ତାଇଓ୍ବାନର ଲିନ ୟିଙ୍ଗ ଶିନ(୨୫୦.୭)ଙ୍କୁ ମାତ୍ର ଦଶମିକ ଏକ ପଏଣ୍ଟରେ ପଛରେ ପକାଇ ଇଲାଭେନିଲ (୨୫୦.୮) ସ୍ବର୍ଣ୍ଣ ପଦକ ହାତେଇଥିଲେ। ମେହୁଲ ଘୋଷ ଫାଇନାଲରେ ପ୍ରବେଶ କରିଥିଲେ ମଧ୍ୟ ପଦକ ଜିଣିବାକୁ ସଫଳ ହୋଇ ନ ଥିଲେ। ୧୦ ମି. ଏୟାର ପିସ୍ତଲ ଇଭେଣ୍ଟରେ ଅଭିଷେକ ବର୍ମା ଓ ସୌରଭ ଚୌଧାରୀ ଫାଇନାଲରେ ପ୍ରବେଶ କରି ଥିଲେ ମଧ୍ୟ ପଦକ ହାତେଇବାରେ ବିଫଳ ହୋଇଥିଲେ। ଯୋଗ୍ୟତା ପର୍ଯ୍ୟାୟର ସଫଳ ପ୍ରଦର୍ଶନ କରି ଫାଇନାଲରେ ପ୍ରବେଶ କରିଥିବା ବର୍ମା (୧୭୯.୪) ୫ମ ସ୍ଥାନରେ ଓ ଚୌଧାରୀ (୧୫୯.୮) ୬ଷ୍ଠ ସ୍ଥାନରେ ରହିଥିଲେ।
