ଲାଉସେନ,୨୫।୪ (ଏପି): କୋଭିଡ୍ -୧୯ ମହାମାରୀ ରୂପ ନେଇଥିବା ବେଳେ ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ଫଳରେ ଆଥଲେଟ୍ ଓ ବିଭିନ୍ନ ଦଳଗୁଡିକର ଆର୍ଥିକ ସମସ୍ୟାରେ ପଡିଛନ୍ତି। ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ଏହାକୁ ହୃଦୟଙ୍ଗମ କରି ଆଥ୍ଲେଟ ଓ ଟିମ୍ଗୁଡିକୁ ୨୫ ମିଲିୟନ ଡଲାରରୁ ଊର୍ଦ୍ଧ୍ୱ ଅର୍ଥ ପ୍ରଦାନ କରିଛି।
୨୦୨୧ ଅଲିମ୍ପିକ୍ସରେ ଆୟୋଜନ ହେବାକୁ ଯାଉଥିବା ବେଳେ ଯେଉଁ ଦେଶଗୁଡିକ କ୍ରୀଡ଼ା ପାଇଁ ଅପେକ୍ଷାକୃତ କମ୍ ଅର୍ଥ ପ୍ରଦାନ କରିଥାନ୍ତି ସେହି ଦେଶର ଆଥ୍ଲେଟଙ୍କ ପାଇଁ ଅତିରିକ୍ତ ୧୫ ମିଲିୟନ ଅର୍ଥ ପ୍ରଦାନ କରାଯିବ ବୋଲି ଆଇଓଏ କହିଛି। ଫଳରେ ଏହାଦ୍ୱାରା ୧୮୫ଟି ଦେଶର ୧,୬୦୦ ଆଥ୍ଲେଟ ଲାଭବାନ ହୋଇପାରିବେ। ସେହିପରି ୧୦ ମିଲିୟନ ଡଲାରରୁ ଅଧିକ ଅର୍ଥ ବିଭିନ୍ନ ଦେଶର ଅଲିମ୍ପିକ୍ ଆସୋସିଏଶନକୁ ମିଳିବ। ବିଭିନ୍ନ ଅଫିସିଆଲଙ୍କ ଯାତ୍ରା, ରହଣି ଓ ପରିଚାଳନାଗତ ବ୍ୟୟଜନିତ ଅତିରିକ୍ତ ଖର୍ଚ୍ଚ ତୁଲାଇବାରେ ଏହି ଅର୍ଥ ବିନିଯୋଗ କରାଯିବ। ଅଲିମ୍ପିକ୍ ସଲିଡାରିଟି ପ୍ରୋଗ୍ରାମ ମାଧ୍ୟମରେ ଏହି ପରିମାଣର ଅର୍ଥ ପ୍ରଦାନ କରାଯିବ। ୨୦୬ ଜାତୀୟ ଅଲିମ୍ପିକ୍ସ ଟିମ୍ ଓ ରେଫ୍ୟୁଜି ଟିମ୍ଗୁଡିକୁ ସାହାଯ୍ୟ କରିବା ଏହି ପ୍ରୋଗ୍ରାମର ଉଦ୍ଦେଶ୍ୟ ରହିଛି। ଏହି ଟିମ୍ଗୁଡିକ ଅଲିମ୍ପିକ୍ସକୁ ଆଥ୍ଲେଟମାନଙ୍କୁ ଅଂଶଗ୍ରହଣ ପାଇଁ ପଠାଇଥାନ୍ତି।